Stórleikur Akureyrar og FH í Höllinni á föstudaginn

Einvígi Akureyrar og FH hófst með miklum látum í fyrsta leik þar sem þurfti framlengingu til að knýja fram úrslit, eins marks sigur FH staðreynd. En fjörið heldur áfram í Íþróttahöllinni á föstudaginn en leikur liðanna hefst klukkan 20:00.

Mikilvægar upplýsingar fyrir áhorfendur
Athugið að stuðningsmannaskírteinin og ársmiðakort gilda ekki sem aðgöngumiði á leiki úrslitakeppninnar og því þurfa allir að greiða aðgangseyri að þessu sinni. Sama á við um handboltaiðkendur í KA og Þór, við getum ekki afhent boðsmiða á úrslitakeppnisleikina.

Fyrir vikið má búast við auknu álagi í miðasölunni fyrir leik og það er því vinsamleg ábending til áhorfenda að hafa með sér aðgangseyrinn í reiðufé þar sem slíkur greiðslumáti er mun fljótlegri en kortaviðskiptin.
Eldri en 15 ára greiða 1.500 krónur en yngri greiða 500 krónur.

Kaffiveitingar verða fyrir leik og í hálfleik fyrir handhafa stuðningsmannaskírteina. Líkt og í síðasta heimaleik (gegn Val) verður aðstaða stuðningsmannaklúbbsins væntanlega niðri á fyrstu hæð þar sem ýmislegt er um að vera í Höllinni í tengslum við Andrésar Andarleikana.
Þá geta handhafar stuðningsmannaskírteinanna gengið að fráteknum sætum sínum eins og vanalega.

Nú er bara að fjölmenna í Höllina og halda uppi þeirri frábæru stemmingu sem hefur svo sannarlega vakið athygli þannig að Akureyri hefur eitt félaga fengið viðurkenningar HSÍ fyrir umgjörð leikjanna í vetur.