Bergvin og Geir voru magnaðir í kvöld
| | 22. nóvember 2012 - Akureyri handboltafélag skrifarGóður sjö marka sigur á Fram í kvöldAkureyri landaði góðum sigri á heimavelli í kvöld gegn Fram og er komið á gott skrið á ný eftir að hafa hikstað í nokkrum leikjum þar á undan. Leikurinn fór fjörlega af stað en eftir að hafa lent undir 2-3 tóku heimamenn heldur betur við sér og skoruðu fjögur mörk í röð. Staðan orðin 6-3 og Bergvin Gíslason sjóðheitur í sókninni.
Akureyri réð ferðinni áfram og munurinn varð mestur fjögur mörk, 10-6 og 11-7 en þá kom bakslag þar sem ekkert gekk upp og vörnin missti taktinn. Fram skoraði fjögur mörk í röð, jafnaði leikinn í 11-11 og spennustigið hækkaði heldur betur. En Akureyrarliðið tók upp þráðinn á ný og hafði eins marks forystu í hálfleik, 13-12.
Varnarleikurinn var býsna sterkur, fyrir utan síðustu tíu mínútur hálfleiksins og í sóknarleiknum voru þeir Bergvin og Guðmundur Hólmar í miklum ham.
Í seinni hálfleik var aldrei spurning um það hvort liðið var sterkara. Varnarleikur Akureyrar var gríðarlega öflugur og Jovan Kukobat lokaði markinu til að byrja með. Eftir tíu mínútna leik var forysta Akureyrar aftur orðin fjögur mörk, 17-13.
Samvinnan í vörninni var til fyrirmyndar
Framarar voru hálf ráðvilltir í sóknarleiknum og Róbert Aron Hostert eiginlega sá eini sem komst eitthvað áleiðis og kom skotum á markið. Framarar fengu reyndar ein sjö vítaköst en Jovan varði tvö þeirra og eitt fór í þverslána.
Geir Guðmundsson fór mikinn í sóknarleiknum í seinni hálfleik og þegar tíu mínútur voru til leiksloka kom Heimir Örn Árnason muninn upp í fimm mörk, 23-18 og ljóst í hvað stefndi. Framarar gáfust eiginlega upp á þessum kafla og skoruðu ekki mark það sem eftir lifði leiks á meðan Akureyri bætti við tveimur mörkum og magnaður sjö marka sigur, 25-18 staðreynd.
Frábær sigur á heimavelli eftir tvo tapleiki í röð í Höllinni og ljóst að með því hugarfari sem liðið kom til leiks í dag eru því flestir vegir færir. Vörnin var frábær mestallan leikinn eins og áður segir, Jovan góður í markinu, þó að varin skot séu kannski ekki neitt gríðarlega mörg þá er það kannski fyrst og fremst vegna þess að Fram kom einfaldlega ekki mörgum skotum á markið. Þannig skora þeir einungis sex mörk í öllum seinni hálfleiknum.
Það var oft ástæða til að fagna á varamannabekknum
Bergvin Þór Gíslason átti enn einn stórleikinn og var í einu orði sagt frábær, enda valinn maður leiksins. Frændurnir Guðmundur Hólmar og Geir Guðmundsson voru sömuleiðis mjög öflugir í sóknarleiknum.
Í vörninni voru þeir Guðlaugur Arnarsson og Hreinn Þór Hauksson ekki árennilegir og stjórnuðu varnarleiknum af mikilli röggsemi. Hornamennirnir fengu ekki úr miklu að moða í dag en þeirra dagur kemur þá bara síðar.
Mörk Akureyrar: Bergvin Þór Gíslason 8, Guðmundur Hólmar Helgason 6, Geir Guðmundsson 5, Bjarni Fritzson 4 (tvö úr vítum), Heimir Örn Árnason 1 og Hreinn Þór Hauksson 1.
Í markinu varði Jovan Kukobat 15 skot, þar af 2 vítaköst. Stefán Guðnason spreytti sig í einu víti en hafði ekki árangur að þessu sinni.
Mörk Fram: Róbert Aron Hostert 6, Haraldur Þorvarðarson 4 (3 úr vítum), Stefán Darri Þórsson 2, Elías Bóasson 1, Garðar Sigurjónsson 1 (úr vítakasti), Ólafur Jóhann Magnússon 1, Sigurður Eggertsson 1, Stefán Baldvin Stefánsson 1 og Ægir Hrafn Jónsson 1.
Í markinu varði Björn Viðar Björnsson 7 skot og Magnús Erlendsson 3.
Næsti leikur Akureyrar í N1 deildinni er útileikur gegn ÍR og eru allar líkur á að hann verði spilaður miðvikudaginn 28. nóvember og að Akureyri mæti svo Aftureldingu í bikarleik laugardaginn 1. desember í Mosfellsbæ. |
Fréttir 
Þú flettir milli frétta með örvalyklunum eða smellir á bláu örvarnar!
Efst á síðu