Spennandi lokaumferðir í Olís-deildinni

Akureyri mætir aftur í Hafnarfjörðinn á fimmtudaginn og mætir þá Haukum í næstsíðustu umferð Olís-deildarinnar. Það er gríðarlega mikið undir hjá báðum liðum en Haukar geta tryggt sér deildarmeistaratitilinn á meðan Akureyri er í hörku baráttu um að sleppa við umspilið.

Staða liðanna í deildinni getur ennþá breyst á ýmsan hátt, það sem er þó ljóst á þessari stundu er að Haukar og ÍBV verða í tveim efstu sætunum, þó að Haukar standi betur að vígi þá á ÍBV ennþá möguleika á að ná deildarmeistaratitlinum.
Valur er sömuleiðis öruggur um sæti í úrslitakeppninni en Fram og FH berjast um síðasta lausa sætið.

Þá er ljóst að HK verður í neðsta sætinu og þar með fallið úr deildinni miðað við núverandi skipulag. Akureyri, FH og ÍR eru síðan í baráttu um að forðast næstneðsta sætið eða umspilssætið en öll þessi lið gætu hafnað í því.

Staðan í deildinni er þannig núna:

Nr.	Félag	Leikir	U	J	T	Mörk	Hlutfall	Stig		-
1.	Haukar	19	15	1	3	507 : 426	81	31	:	7
2.	ÍBV	19	14	0	5	526 : 480	46	28	:	10
3.	Valur	19	10	2	7	529 : 456	73	22	:	16
4.	Fram	19	10	0	9	430 : 449	-19	20	:	18
5.	FH	19	8	1	10	483 : 473	10	17	:	21
6.	ÍR	19	8	0	11	507 : 518	-11	16	:	22
7.	Akureyri	19	7	1	11	454 : 490	-36	15	:	23
8.	HK	19	1	1	17	423 : 567	-144	3	:	35

Það er því margt og mikið undir í þessum tveim síðustu umferðum deildarinnar. Enda gilda þær reglur að alla leiki hvorrar umferðar skuli leika samtímis.
Næstsíðasta umferðin fer fram fimmtudaginn 10. apríl klukkan 19:30 og þá eigast við:
ÍBV – Valur, Fram – ÍR, FH – HK og Haukar – Akureyri.
Lokaumferðin er svo mánudaginn 14. apríl klukkan 19:30, leikirnir þá eru: Haukar – ÍBV, Valur – Fram, ÍR – FH og Akureyri - HK

Eini möguleiki ÍBV á að ná deildarmeistaratitlinum er að Akureyri vinni Hauka á fimmtudaginn og síðan þarf ÍBV að vinna bæði Val á fimmtudaginn og einnig Hauka í seinustu umferðinni.
Fram stendur betur að vígi en FH um sæti í úrslitakeppninni en þarf tvö stig úr leikjunum gegn ÍR og Val til að vera öruggt með sætið. Fái Fram eitt stig eða ekkert getur FH, sem er núna þrem stigum á eftir þeim komist uppfyrir Fram eða jafnað þá að stigum og þar sem FH stendur betur í innbyrðis viðureignum liðanna færi FH áfram á kostnað Fram.
Það er því ljóst að Fram hlýtur að leggja alla áherslu á að vinna ÍR á fimmtudaginn til að tryggja sætið.

Barátta Akureyrar, ÍR og FH um að forðast umspilssætið er býsna flókin og getur tekið á sig ýmsar myndir. Fái Akureyri fleiri stig en ÍR í þessum tveim lokaumferðum þá sleppur Akureyri og sömuleiðis ef Akureyri fær tveim stigum fleiri en FH þá sleppur Akureyri líka. Það má því búast við að leikur ÍR og FH í lokaumferðinni verði æsilegur.

En Akureyri á sem sé eftir tvo leiki, Hauka á útivelli á fimmtudaginn og síðan HK hér á Akureyri mánudaginn 14. apríl, að sjálfsögðu munu strákarnir berjast fyrir öllum stigunum í báðum þessum leikjum og gulltryggja þar með að lenda ekki í umspilinu.

Fletta milli frétta

Til baka

Senda á Facebook

Efst á síðu

Umsjón og hönnun:
Stefán Jóhannsson og Ágúst Stefánsson