Friðrik Svavarsson
| | 28. október 2014 - Akureyri handboltafélag skrifarFriðrik Svavarsson kominn til NoregsEins og kunnugt er þá er Jónatan Þór Magnússon, fyrrum leikmaður Akureyrar og KA þjálfari norska 1. deildarliðsins Kristiansund. Jónatan kom til Kristiansund sumarið 2010 sem leikmaður en var spilandi þjálfari liðsins síðasta tímabil. Í sumar lagði Jonni leikmannaskóna á hilluna og einbeitir sér nú að þjálfun liðsins.
Gengi liðsins hefur ekki verið sem skyldi það sem af er og liðið án stiga eftir sex umferðir. Nokkur meiðsli hafa verið í herbúðum liðsins og hefur Jónatan því verið að leita að mönnum til að fylla í skörðin.
Friðrik Svavarsson, einn af línumönnum Akureyrar, er kominn út til Jónatans og lék með liðinu á laugardaginn þegar Kristiansund mætti St. Hallvard á útivelli. Friðrik, er tuttugu og eins árs gamall og hefur verið viðloðandi Akureyrarliðið undanfarin þrjú ár auk þess sem hann lék með Hömrunum í fyrravetur. Hann er eitilharður varnarmaður og hraustur með afbrigðum og gekk greinilega vasklega fram í fyrsta leiknum með Kristiansund því hann fékk beint rautt spjald snemma í leiknum. Leiknum lauk síðan með sautján marka tapi Kristiansund 34-17.
En það eru fleiri Íslendingar sem leika með liðinu, FH ingarnir Halldór Guðjónsson og Sigurgeir Árni Ægisson, Fannar Helgi Rúnarsson úr Aftureldingu og Guðmundur S. Guðmundsson frá Stjörnunni.
Við sendum þeim öllum góðar kveðjur og vonandi fer lukkan að ganga í lið með þeim á næstunni.
Friðrik í leik með Akureyri gegn Stjörnunni
|
Fréttir 
Þú flettir milli frétta með örvalyklunum eða smellir á bláu örvarnar!
Efst á síðu