Kristján Orri og Tomas voru í sviðsljósinu í kvöld
| | 9. desember 2015 - Akureyri handboltafélag skrifarDramatískt jafntefli í EyjumÞað var vægast sagt sveiflukenndur leikur sem Akureyri og ÍBV buðu upp á í Eyjum í kvöld. Framan af leik var allt í járnum, liðin skiptust á að hafa forystuna upp í stöðuna 5-5. Þá tók Akureyri yfir og staðan skyndilega orðin 5-10. Eyjamenn komust ekkert áfram gegn sterkri vörn og frábærri markvörslu Tomasar sem stóð vaktina með sóma í fjarveru Hreiðars Levý.
Smelltu hér til að sjá myndband frá leiknum.
Eyjamenn klóruðu í bakkann en máttu sjá á eftir línutröllinu Kára Kristjánssyni útaf með beint rautt spjald fyrir að fara harkalega í andlit Ingimundar í sókninni. Staðan í hálfleik 9-12 fyrir Akureyri.
Í fyrri hálfleiknum skoraði Kristján Orri Jóhannsson 5 mörk, Bergvin 3, Halldór Logi 2 og Sigþór Árni 2. Tomas var frábær með 12 varin skot og þar af eitt vítakast.
Seinni hálfleikurinn hófst með flugeldasýningu Akureyringa sem náðu sjö marka forskoti 10-17 eftir rúmlega tíu mínútna leik í seinni hálfleiknum. Eyjamenn sem ekki höfðu litið vel út komu til baka í kjölfarið og hægt og bítandi unnu þeir upp forskotið. Þegar um sjö mínútur voru til leiksloka náðu þeir að jafna leikinn í 20-20 og komust raunar yfir 21-20.
Sigþór Árni Heimisson jafnaði strax í næstu sókn og enn rúmar fimm mínútur eftir af leiknum. Þessar lokamínútur reyndust síðan eign markvarðanna, Akureyri fékk reyndar kjörið tækifæri til að innbyrða sigurinn þegar Sigþór Árni vann vítakast þegar 30 sekúndur voru til leiksloka. Andri Snær fór á vítapunktinn en Stephen Nielsen markvörður Eyjamanna kórónaði sinn leik með því að verja vítið. Eyjamenn fengu í kjölfarið síðustu sókn leiksins en tókst ekki að nýta hana og jafntefli 21-21 því niðurstaðan.
Vissulega svekkjandi að missa niður sjö marka forystu á lokahlutanum en stig í Eyjum er þó alltaf stig og við að sjálfsögðu þiggjum það.
Mörk Akureyrar: Kristján Orri Jóhannsson 7, Bergvin Þór Gíslason 5, Sigþór Árni Heimisson 4, Halldór Logi Árnason 2, Brynjar Hólm Grétarsson 1, Heiðar Þór Aðalsteinsson 1 og Hörður Másson 1.
Tomas Olason stóð í markinu allan tímann og varði 20 skot, þar af 1 víti.
Mörk IBV: Grétar Þór Eyþórsson 5, Magnús Stefánsson 4, Andri Heimir Friðriksson 3, Dagur Arnarsson 3, Einar Sverrisson 2, Hákon Daði Styrmisson 2, Brynjar Karl Óskarsson 1 og Nökkvi Dan Elliðason 1.
Stephen Nielsen varði líkt og Tomas, 20 skot og þar af 1 víti.
Næsti leikur Akureyrar er á laugardaginn þegar liðið mætir Gróttu á Seltjarnarnesi en liðin eru nú jöfn að stigum í 6. og 7. sætinu. Síðasti leikur ársins verður svo heimaleikur gegn ÍBV fimmtudaginn 17. desember. |
Fréttir 
Þú flettir milli frétta með örvalyklunum eða smellir á bláu örvarnar!
Efst á síðu