Warning: Undefined array key "frettanr" in /web/akhandadmin/public_html/index.php on line 15 Góður sigur á Aftureldingu og Akureyri með fullt hús stiga - Akureyri Handboltafélag
Dómarar: Gísli H. Jóhannsson og Hafsteinn Ingibergsson
Umfjöllun
Tengdar fréttir
Öflugur stuðningsmaður hér á ferð
10. október 2010 - Akureyri handboltafélag skrifar
Áhorfendur á leik Akureyrar og Aftureldingar - myndir
Það var að vanda fínasta stemming í stúkunni á leik Akureyrar og Aftureldingar á fimmtudagskvöldið. Stuðningsmenn voru greinilega búnir að bíða lengi eftir að komast á alvöru handboltaleik.
Þórir Tryggvason hefur verið iðinn við að beina myndavélinni að stúkunni og gerði enga undantekningu á þessum leik.
Þórir sendi okkur góðan slatta af myndum af áhorfendum og frá leiknum sjálfum, hér koma nokkur sýnishorn úr stúkunni en neðst á síðunni er hægt að skoða alla myndasyrpuna frá leiknum.
10. október 2010 - Akureyri handboltafélag skrifar
Landsbankinn og Akureyri Handboltafélag styðja Hetjurnar
Fyrir leik Akureyrar og Aftureldingar síðastliðinn fimmtudag afhenti Landsbankinn veglegan styrk til Hetjanna, félags langveikra barna á Norðurlandi.
Landsbankinn sem hefur undanfarin ár verið einn af öflugustu bakhjörlum Akureyrar Handboltafélags hefur jafnframt verið með auglýsingu á búningi Akureyrarliðsins. Fulltrúar Landsbankans höfðu á dögunum samband við stjórn Akureyrar og tilkynntu nýja útfærslu á stuðningi sínum sem felst í því að Landsbankinn afsalar sér auglýsingu á búningum Akureyrar Handboltafélags en bauð liðinu þess í stað að velja sér gott málefni til liðveislu og myndi viðkomandi fá bæði myndarlegan fjárstyrk og pláss á búningunum. Akureyri Handboltafélag valdi samtökin Hetjurnar, félag langveikra barna á Norðurlandi. Merki Hetjanna prýðir því búning félagsins í vetur. Í tilefni af þessu færði Landsbankinn Hetjunum 500.000 kr. styrk í upphafi leiksins gegn Aftureldingu.
Fulltrúi Landsbankans afhendir Hetjunum styrkinn
Stofnaður hefur verið áheitasjóður fyrir Hetjurnar og greiðir bankinn ákveðna upphæð í hann fyrir hvern sigur Akureyrar Handboltafélags í N1-deildinni. Öðrum fyrirtækjum og einstaklingum er frjálst að heita á liðið sitt og leggja þannig góðu málefni lið.
Íþróttir geta sannarlega verið gefandi. Hver sigur Akureyrar Handboltafélags er því í leiðinni ávinningur fyrir Hetjurnar.
Landsbankinn er stoltur bakhjarl Akureyrar Handboltafélags og óskar Akureyri Handboltafélagi velgengni á vellinum í vetur.
Atli Hilmarsson rædi við Hjalta Þór Hreinsson á Akureyri eftir leikinn: Atli Hilmarsson stýrði Akureyri í sínum fyrsta heimaleik í kvöld. Hann fer vel af stað með liðið, það hefur unnið báða leikina sína í deildinni til þessa.
„Umgjörðin er mjög fín og það var gaman að sjá þennan stuðning. En það komast enn fleiri áhorfendur að og það fólkið kemst meira að segja nær. En þetta var virkilega skemmtilegt, ég get alls ekki kvartað,“ sagði Atli en stemningin í Höllinni var góð og um 800 manns í húsinu. „Spilamennskan var á köflum fín og á öðrum mjög léleg. Við vinnum þetta á frábærri varnarvinnu í byrjun seinni hálfleiks. En við töpum of mörgum boltum og klárum færin ekki nógu vel.
Ég er heldur ekki nógu ánægður með varnarleikinn, við fengum á okkur klaufaleg mörk sem við eigum ekki að fá á okkur. Við fengum heldur ekki nógu mörg hraðaupphlaup sem eru okkar helsti styrkur.
Við bættum í undir lokin gegn HK og kláruðum leikinn en það tókst ekki í kvöld. Afturelding er með gott lið og við lentum í mesta basli. Við eigum þó ýmislegt inni,“ sagði Atli.Sveinbjörn Pétusson ræddi sömuleiðis við Hjalta og kvaðst ekki hafa verið svona stressaður fyrir leik lengi
Markmaðurinn Sveinbjörn Pétursson sneri aftur í lið Akureyrar í sumar og hann átti fínan leik í sigrinum á Aftureldingu í kvöld. Norðanmenn unnu 28-23.
Sveinbjörn varði sextán skot, þar af tvö víti og var með 41% markvörslu.
„Ég hef ekki verið stressaður fyrir leik ansi lengi en ég var það núna. Það tók tíu mínútur að fá hrollinn úr mér og svo fór mér að líða betur.Þetta var þokkalegur leikur hjá mér og við unnum, sem er fyrir öllu. Við gerum ákveðin mistök í vörninni og vorum oft óskynsamir í sókninni. Við héldum forskotinu sem við náðum í byrjun seinni hálfleiks en tókum oft vitlausar ákvarðarnir.
Við héldum ekki taktinum varnarlega en við skiluðum tveimur stigum í hús. Við förum brosandi út í kvöldið og lögum það sem má laga fyrir næsta leik,“ sagði Sveinbjörn.
Hjalti Þór ræddi einnig við Hafþór Einarsson: Hefðum mátt kroppa í annað stigið
Hafþór Einarsson gat ekki komið í veg fyrir tap sinna manna í Aftureldingu gegn sínum gömlu félögum í Akureyri í kvöld. Mosfellingar töpuðu 28-23 norðan heiða. Hafþór átti fínan leik í markinu og varði alls tólf skot þann tíma sem hann spilaði, með 39% markvörslu alls.
Hafþór er nýfluttur suður og hefur haldið sér í formi á fjölum Hallarinnar þar sem spilað var í kvöld en hann fór frá Akureyri í sumar.
„Það var ömurlegt að tapa þessum leik,“ sagði Hafþór. „Við vorum í bullandi séns og áttum alls ekki að vera þremur mörkum undir í hálfleik.
Þeir koma sterkir inn í seinni hálfleikinn en við erum á hælunum. Við komum sterkir til baka og hefðum alveg mátt kroppa í annað stigið. Við klikkum á þremur vítum og þetta gekk ekki alveg nægilega vel.
Hafþór Einarsson klæðist búningi Aftureldingar í vetur
Þetta er þó framför frá FH-leiknum og það er stígandi í liðinu sem er jákvætt. Ef höldum áfram að bæta okkur þá kroppum við stig af liðunum úr efri hlutanum. Við förum þetta á gleðinni og njótum þessa að vera í efstu deild,“ sagði Hafþór áður en blaðamaður innti að honum að reynsluleysi hefði komið liðinu um koll.
„Reynsla og ekki reynsla, allir verða að byrja einhverntíman,“ sagði hinn síungi Hafþór. „Það tekur bara smá tíma og ég efast ekki um að við verðum sterkari þegar á líður á mótið. Við eigum fyrsta heimaleikinn næst og þá mun Rothöggið koma gríðarlega sterkt til leiks að Varmá. Það verður eitthvað,“ sagði Hafþór.
Merkisdagur hjá Herði Fannari, gerum hann sem eftirminnilegastan
7. október 2010 - Akureyri handboltafélag skrifar
Leikur dagsins: Akureyri – Afturelding í textalýsingu
Fyrsti heimaleikjadagurinn er runninn upp og ekkert annað í stöðunni en að berjast fyrir tveim stigum og fylgja eftir góðri byrjun frá síðasta leik.
En hvað um það, þá má reikna með hörkuleik enda Afturelding mikið stemmingslið sem okkar menn þurfa að taka föstum tökum.
Reynsluboltinn Hörður Fannar Sigþórsson nær þeim merka áfanga í dag, fyrstur manna að spila 100. leikinn fyrir Akureyri Handboltafélag og ástæða til að allir taki þátt í því að gera það að eftirminnilegum viðburði.
Hörður Fannar í leik á Opna Norðlenska mótinu 2010
Hörður Fannar í leik gegn Val á fyrsta tímabili Akureyrar Handboltafélags 2006
Leikurinn hefst klukkan 19:00 en ástæða til að hvetja fólk til að koma tímanlega því búast má við fjölmenni.
Leikurinn í beinni textalýsingu Við gerum ráð fyrir að halda okkar vana og vera með leikinn í beinni textalýsingu þannig að þeir sem ekki eiga heimangengt geta fylgst með hér á heimasíðunni. Beina lýsingin virkar þannig að hún opnast í sérstökum glugga og uppfærist sjálfkrafa á 20 sekúndna fresti.
Hafþór Einarsson mun verja mark Aftureldingar í vetur
5. október 2010 - Akureyri handboltafélag skrifar
Mótherjar okkar á fimmtudaginn eru Afturelding
Á fimmtudaginn fáum við fyrsta heimaleikinn á tímabilinu þegar Mosfellingarnir í Aftureldingu koma í heimsókn. Við kynnum hér stuttlega lið Aftureldingar sem kom upp úr 1. deildinni síðastliðið vor eftir að hafa sigrað fyrst ÍBV og síðan Stjörnuna í hörkuspennandi einvígi um sætið í N1-deildinni. Þrátt fyrir að vera nýliðar í deildinni þá skyldi enginn reikna með auðveldum stigum á móti þeim, Afturelding gerði FH-ingum virkilega erfitt fyrir í síðustu viku og það var ekki fyrr en á lokamínútum leiksins sem FH seig framúr.
Gunnar Andrésson, sem lengi lék með Aftureldingu tók við þjálfun liðsins um mitt síðasta tímabil og náði að byggja upp mikla og góða stemmingu í liðinu. Gunnar bjó um tíma í Sviss en er nú að hefja sitt fyrsta tímabil sem þjálfari í úrvalsdeild karla. Honum til aðstoðar er annar reynslubolti frá gullaldarárum Aftureldingar, Þorkell Guðbrandsson sem reyndar reimar skóna á sig enn þann dag í dag.
Afturelding fékk til liðs við sig nýjan markvörð fyrir tímabilið og sá þekkir heldur betur til Akureyrarliðsins, hér er á ferðinni enginn annar en Hafþór Einarsson sem hefur staðið í marki Akureyrar síðastliðin tvö tímabil. Hafþór er svo sannarlega betri en enginn og var til dæmis valinn besti leikmaður Akureyrarliðsins tímabilið 2008-2009.
Þá fengu Aftureldingarmenn til sín leikstjórnandann Arnar Freyr Theodórsson frá Gróttu en misstu reyndar tvo leikmenn til Danmerkurr, hornamanninn Magnús Einarsson og varnarjaxlinn Þránd Gíslason, sem gekk til liðs við Odder Håndbold líkt og okkar maður Andri Snær Stefánsson.
Einn lykilmaður Aftureldingar er hornamaðurinn Hilmar Stefánsson sem lék hér á árum áður með KA, Hilmar er reyndar að jafna sig eftir krossbandsslit og mun væntanlega ekki leika með liðinu á fimmtudaginn.
Í leik Aftureldingar gegn FH var markaskorunin að mestu í höndum þriggja leikmanna, skyttan Bjarni Aron Þórðarson gerði heil 10 mörk en leikstjórnandinn Arnar Freyr Theódórsson og skyttan Jóhann Jóhannsson sex mörk hvor. Aðrir leikmenn skoruðu samtals þrjú mörk og ef þetta gefur rétta mynd af liðinu er ljóst að vörn Akureyrar þarf að mæta þessum þremur af fullum krafti.
Bjarni Aron Þórðarson skoraði 10 mörk gegn FH. Mynd: Tomasz Kolodziejski sport.is
Jóhann (20) og Arnar Freyr (22) skoruðu 6 mörk hvor gegn FH. Mynd: Tomasz Kolodziejski sport.is
Mosfellingar stóðu hressilega í FH-ingum í fyrstu umferð N1-deildarinnar og hér grípum við niður í umfjöllun Snorra Sturlusonar á sport.is um liðið.
„Afturelding er með skemmtilegt lið sem líklega á eftir að koma mörgum á óvart í vetur. Smári Guðfinnsson átti fínan leik í markinu, reyndar fjaraði aðeins undan honum þegar leið á síðari hálfleikinn og Hafþór Einarsson stillti sér þá upp á milli stanganna og stóð sig ágætlega. Varnarleikurinn er á köflum svolítið villtur, en Mosfellingar sýndu það að þeir ráða ágætlega við fleiri en eitt og fleiri en tvö varnarafbrigði. Bjarni Aron Þórðarson er hrikalega sterkur sóknarmaður, skorar nánast að vild og sogar til sín varnarmenn til að losa um fyrir félaga sína og Arnar Theódórsson er flinkur sóknarmaður sem skorar sinn skerf af mörkum. Jóhann Jóhannsson er líka frambærilegur, og vel það, hægra megin í sókninni. Afturelding skartaði „eldri hetju“ í kvöld rétt eins og FH-ingar, en Þorkell Guðbrandsson lét talsvert að sér kveða og ber aldurinn ljómandi vel. Það má nokkuð ljóst vera að Mosfellingar eiga eftir að hirða slatta af stigum í deildinni í vetur.“
Það er líka ljóst að Afturelding ætlar að berjast fyrir tilveru sinni í deildinni og mun ekkert gefa eftir. Í viðtali við Ívar Benediktsson á Morgunblaðinu segir Smári Guðfinnsson markvörður liðsins: „Við erum alls óhræddir og stefnum á að halda sæti okkar í deildinni. Flestir í liðinu eru uppaldir hjá Aftureldingu. Við þekkjumst vel og stöndum þétt saman þegar á reynir. Við tökum einn leik fyrir í einu en viljum helst komast upp í miðja deild áður en deildarkeppnin verður úti,“ sagði Smári.
Spurður hvort hann telji það vera raunhæft markmið svarar Smári hiklaust: „Já, við eigum að geta unnið alla leiki, hver sem mótherjinn er. Getan er fyrir hendi í liðinu, liðsheildin einnig og menn tilbúnir að berjast til síðasta blóðdropa í hverjum leik. Við munum treysta á það auk þess að vera með sterkan heimavöll og frábært stuðningsmannalið, hóp sem kallast Rothöggið. Við munum spila í gamla salnum á Varmá þar sem hægt er að ná upp gríðarlegri stemningu á leikjum eins og menn fengu að kynnast í úrslitakeppninni í vor. Það verður erfitt að sækja okkur heim í vetur,“ segir Smári sem er 22 ára gamall og hefur æft og leikið handknattleik með Aftureldingu síðan hann var smápolli eins og hann kemst sjálfur að orði.
Smári segir að Gunnar Andrésson þjálfari hafi haldið leikmönnum Aftureldingar vel við efnið. Þeir hafi haldið áfram að æfa út júní þrátt fyrir að keppni á Íslandsmótinu hafi lokið í byrjun maí. „Við fengum frí í júlí en mættum síðan til æfinga á nýjan leik í byrjun ágúst. Það er klárlega meira kjöt á mönnum en áður og fyrir vikið verðum við sterkari en áður. Okkar stefna er að byggja á sterkum varnarleik og markvörslu,“ segir Smári en auk hans mun Hafþór Einarsson standa í marki Aftureldingar í vetur. Hafþór hefur leikið einkar vel með Akureyri síðustu tvö keppnistímabil.
„Markmið mitt persónulega er fyrst og fremst að standa mig vel og leggja þannig mitt lóð á vogarskálina svo við getum haldið okkur uppi í deildinni. Við erum með fínan mannskap í Aftureldingu og eigum vel að geta komist í gegnum mótið með sóma,“ segir Smári Guðfinnsson, markvörður Aftureldingar.
Leikmannalisti Aftureldingar
Hafþór Einarsson, 31 árs - markvörður Smári Guðfinnsson, 22 ára - markvörður Kristófer F. Guðmundsson, 19 ára - markvörður Jón Andri Helgason, 23 ára - vinstra horn Fannar Rúnarsson, 21 árs - vinstra horn Reynir Árnason, 26 ára - vinstra horn Guðbrandur Jóhannesson, 25 ára - vinstra horn Þorlákur Sigurjónsson, 19 ára - vinstra horn Bjarni Aron Þórðarson, 22 ára - vinstri skytta Eyþór Vestmann, 22 ára - vinstri skytta Arnar Theodórsson, 28 ára - miðjumaður Hrafn Ingvarsson, 25 ára - vinstri skytta Jóhann Jóhannsson, 24 ára vinstri/hægri skytta Aron Gylfason, 20 ára - hægra horn Hilmar Stefánsson, 30 ára - hægra horn Ásgeir Jónsson, 27 ára - línumaður Pétur Júníusson, 18 ára - línumaður Daníel Jónsson, 25 ára - miðjumaður Vlad Trúfan, 27 ára - vinstri skytta Þorkell Guðbrandsson, 39 ára - hægri skytta.
Úrvalsdeild karla
Senda skilaboð
Vefur KA
Vefur Þór
Fréttaleit
Ljósmyndir frá leiknum
Textalýsing frá leiknum
Tölfræði leiksins 
Einn lykilmaður Aftureldingar er hornamaðurinn Hilmar Stefánsson sem lék hér á árum áður með KA, Hilmar er reyndar að jafna sig eftir krossbandsslit og mun væntanlega ekki leika með liðinu á fimmtudaginn.
Senda á Facebook