Þórir Tryggvason var að vanda mættur í Höllina á fimmtudaginn og tók helling af myndum frá leik Akureyrar og Fram. Þórir sendi okkur slatta af myndunum og er hægt að skoða þær hér á síðunni.
Bjarni skoraði 10 mörk í leiknum
Sveinbjörn með þennan bolta
Gleðistemming á Akureyrarbekknum
Hörður Fannar var valinn besti leikmaður Akureyrar í leiknum
Einhverra hluta vegna var fáliðað í blaðamannastúkunni á leik Akureyrar og Fram í gær. Vikudagur og Sport.is stóðu vaktina en ekkert sást til Morgunblaðsins eða Fréttablaðsins. Guðmundur Egill Gunnarsson fréttamaður Sport.is ræddi við þjálfara liðanna í leikslok:
Atli Hilmarsson: Ef við spilum okkar leik er allt hægt
Atli Hilmarsson, þjálfari Akureyringa, var að vonum kampakátur með níu marka sigur á Fram í lokaleik liðsins í N1-deild karla þetta tímabilið. „Þetta var alveg frábær leikur, það var til fyrirmyndar hvernig við nálguðumst leikinn. Við vorum afslappaðir og það var mikil stemning í hópnum, menn höfðu gaman af því sem þeir voru að gera hvort sem það var í vörn eða sókn. Bekkurinn var með í þessu og allir einhvernvegin samtaka og mjög gaman að sjá liðið í dag. Ég er mjög ánægður með hvernig markaskorun dreifðist í leiknum, varnarleikurinn var náttúrulega frábær og við fengum fullt af hraðaupphlaupsmörkum sem eru nauðsynleg í okkar leik en það er alls ekki sjálfgefið að vinna Fram með níu mörkum. Eftir deildarkeppnina erum við með yfirhöndina gegn öllum liðum í deildarkeppninni og það er frábært.“
Akureyri mætir HK í úrslitakeppninni og er Atli mjög bjartsýnn á þá viðureign en segir ekkert gefið þegar komið er í úrslitakeppni þó að allir fjórir leikirnir hafi unnist gegn HK í vetur. „Mér líst mjög vel á að mæta HK, við erum búnir að vinna alla fjóra leikina gegn þeim í vetur en tvo þeirra unnum við með einu marki og lentum svo í bullandi vandræðum með þá í síðasta leik. Þetta verða hörkuleikir, HK er búið að standa sig frábærlega í vetur og hafa sýnt að þeir eru með mjög gott lið. Við erum með þannig lið að ef okkar leikur er í lagi þá förum við alla leið og ef við spilum okkar leik er allt hægt.“
Varnarjaxlinn Hreinn Þór Hauksson kom aftur inn í lið Akureyringa eftir að hafa meiðst illa í bikarúrslitaleiknum gegn Val og segir Atli það gefa liðinu mjög mikið sérstaklega í fjarveru Guðlaugs Arnarsonar. „Ég er mjög ánægður að fá Hrein aftur inn í okkar leik, ég er stoltur að hann skyldi halda þetta út. Hann gefur okkur aðra vídd í varnarleiknum og á meðan Gulli er meiddur. Ég er ánægður með að allir leikmenn liðsins skyldu komast áfallalaust í gegnum þennan leik. Það fengu margir strákar séns í leiknum í dag og stóðu sig vel þannig það er ekkert hægt að setja út á frammistöðuna í dag.“
Atli sendi „kjúklinginn“ Sissa inná í leiknum.
Atli segir ekkert annað koma til greina en að fara í úrslitin en hann vonast þó eftir fleiri áhorfendum en mættu í Höllina í kvöld. „Við stefnum að því að fara í úrslitin en það verður ekki létt verkefni og við þurfum að fá fleiri áhorfendur á völlinn en mættu hér í dag. Ég skil ekki alveg afhverju mætingin var svona léleg í dag þó við skyldum tapaða síðasta leik má fólk ekki hætta að koma, við erum búnir að vinna fimmtán leiki í vetur og ég er sannfærður um að allir mæti næsta fimmtudag þegar við fáum HK í heimsókn.“
Reynir Þór: Það vantaði allt malt í okkur í dag
Reynir Þór Reynisson, þjálfari Fram, í N1-deild karla var allt annað en ánægður með máttlausan leik liðsins gegn toppliði Akureyrar í kvöld þar sem aldrei var spurning hvort liðið hefði betur í leiknum.
„Það vantaði allt malt í okkur í dag og ég hefði viljað enda síðasta leikinn fyrir úrslitakeppnina öðruvísi en hér í dag en það var alls ekki nógu mikill kraftur í okkur.“
Framarar virtust eitthvað utan gátta í leiknum í kvöld og spurning hvort að hausinn hjá leikmönnum hafi verið kominn í úrslitakeppnina. „Það er ómögulegt að segja hvort að menn séu komnir við hugann við úrslitakeppnina. Ég lagði mikið upp úr því að fara í þennan leik af krafti og fara með sigur inn í úrslitakeppnina en áhuginn var ekki til staðar í dag og ég veit í raun ekki hver orsökin er. Við getum svosem ekki verið lengi að velta okkur upp úr þessum leik því nú er að byrja ný keppni og það þýðir ekkert annað en að mæta af fullum krafti í hana.“
Eftir úrslit kvöldsins er ljóst að Fram mætir FH í úrslitakeppninni og líst Reyni Þór vel á andstæðinginn. „Mér er í raun sama hvort við hefðum mætt FH eða Akureyri, ég vildi fara í þennan leik í kvöld til að klára hann og taka þriðja sæti í deildinni. Það var óskastaðan mín og ég hefði viljað gera það svoleiðis í staðinn fyrir að vera að treysta á aðra en við tökum bara þeim andstæðingum sem við fáum, við getum unnið hvern sem er. Við erum bjartsýnir, við erum með fínan hóp og það er allt til staðar hjá okkur, það er ekkert annað en að fara áhyggjulausir inn í úrslitakeppnina og hin liðin mega bara vara sig á okkur“ sagði Reynir Þór að lokum.
Reynir Þór fylgist með sínum mönnum í leiknum.
Þröstur Ernir Viðarsson á Vikudegi ræddi við Heimi Örn Árnason fyrirliða Akureyrar eftir leikinn og þegar ljóst var að andstæðingar Akureyrar yrðu HK:
Heimir Örn Árnason: Verður erfitt gegn HK
Úrslitakeppnin hefst fimmtudaginn eftir viku þann 14. apríl og verður fyrsti leikur Akureyri og HK fyrir norðan. „Mér var alveg sama hvort við myndum mæta Fram eða HK. Þetta eru allt fjögur mjög góð lið og það getur allt gerst. Við höfum heimavöllinn sem kemur til með að hjálpa okkur gríðarlega,“ sagði Heimir Örn Árnason.
Akureyri hefur gengið vel með HK-menn í vetur. Fjórum sinnum hafa liðin mæst og alltaf hafa norðanmenn haft betur. Heimir segir það þó ekki skipta neinu máli þegar sjálf úrslitakeppnin hefst. „Það var bara fyrsti leikurinn sem var öruggur sigur hjá okkur en hinir þrír leikirnar voru hörkuleikir. HK-menn hafa verið stígandi í síðustu leikjum og þeir verða án efa erfiðir. Ég var ánægður með mjög margt í okkar leik í kvöld og það var sérstaklega frábært að fá Hreinsa (Hrein Þór Hauksson) inn í liðið aftur. Við spiluðum hraðan bolta. Við höfum verið þungir upp á síðkastið og lögðum upp með það í kvöld að spila hraða miðju og hafa gaman af þessu,“ sagði Heimir.
Heimir Örn fór hamförum í upphafi leiks og skoraði fyrstu þrjú mörk Akureyrar.
Bjarni ætlar að gefa tóninn fyrir úrslitakeppnina
7. apríl 2011 - Akureyri handboltafélag skrifar
Leikur dagsins: Akureyri - Fram í textalýsingu
Í kvöld klukkan 19:30 hefst lokaumferð N1 deildarinnar með leik Akureyrar og Fram hér í Íþróttahöllinni. Eins og við greindum frá hér á síðunni þá er helsta keppikefli Akureyrarliðsins í leiknum að hafa yfirhöndina gegn öllum öðrum liðum deildarinnar og til þess þarf sigur. Fram liðið er hins vegar í keppni við HK um sæti í deildinni en liðin berjast um 3. sætið þar sem Fram hefur eins stigs forskot. Á sama tíma leikur HK einmitt við FH.
„Menn eru farnir að undirbúa sig fyrir úrslitakeppnina og þetta verður örugglega eins og góður æfingaleikur fyrir hana,” segir Bjarni Fritzson leikmaður Akureyrar um leikinn í viðtali við Vikudag. „Ég reikna með að þeir sem eru heilir muni spila að fullu. Það er ágætis hvíld á milli leikja og núna verður reynt að setja tóninn fyrir úrslitakeppnina og koma okkur í góðan gír.“
Við verðum með að venju með beina textalýsingu frá leiknum.
Það er ekkert annað í boði en að enda deildina með sigri
5. apríl 2011 - Akureyri handboltafélag skrifar
Lokaumferð N1 deildarinnar, Akureyri - Fram
Á fimmtudagskvöldið lýkur N1 deildarkeppninni að þessu sinni. Í lokaumferðinni leika Akureyri og Fram en leikurinn hefst klukkan 19:30 í Íþróttahöllinni. Bæði liðin eru örugg í úrslitakeppnina en Fram á í baráttu við HK um hvort liðið hafnar í 3. sæti deildarinnar. Á sama tíma leika HK og FH í Kópavoginum þannig að úrslit beggja leikjanna hafa áhrif.
Þó að Akureyrarliðið hafi tryggt sér efsta sætið og þar með Deildarmeistaratitilinn þá hefur leikurinn töluverða þýðingu því að með sigri mun Akureyri hafa betur í viðureignum við öll hin liðin í deildinni. Fyrir leikinn er Fram með betri stöðu í innbyrðis viðureignum, Akureyri vann fyrsta leik liðanna á útivelli 31-32 en Fram vann þegar liðin mættust hér á Akureyri 30-34 þannig að Fram hefur þrjú mörk í plús. Akureyri verður því að sigra í leiknum til að ná yfirhöndinni gegn Fram.
Fram liðið hefur átt misjöfnu gengi að fagna í vetur, í fyrstu tíu umferðunum vann liðið alla leikina nema hvað þeir töpuðu leik á móti Akureyri og síðan HK og liðið virtist líklegt til afreka. Þá kom arfaslakur kafli þar sem margir leikir töpuðust og margir hverjir með miklum mun. Þá komu tveir mikilvægir sigrar í röð, sérstaklega var mikilvægur stórsigur gegn Haukum og liðið virtist hafa náð sér á strik á ný. Í síðustu umferð mátti Fram liðið hins vegar þola skell á móti HK þar sem Fram tapaði með níu marka mun á heimavelli 26-35.
En Fram liðið mun örugglega mæta af fullum krafti til leiks á fimmtudaginn líkt og Akureyrarliðið enda mikilvægt að enda deildina með sigri og koma til leiks í úrslitakeppnina með vindinn í seglin. Eins og kom fram hér að framan sigraði Fram þegar liðin mættust hér í Höllinni í vetur og voru það fyrstu stigin sem Akureyri tapaði á tímabilinu. Fram liðið er gríðarlega vel mannað, trúlega með breiðasta hópinn í deildinni. Fyrstan skal telja markvörðinn Magnús Erlendsson en hann hefur verið besti maður liðsins í vetur.
Útileikmennirnir hafa skipst nokkuð á að láta ljós sitt skína. Þannig var Magnús Stefánsson frá Fagraskógi þeirra markahæstur í síðasta leik og þar á eftir komu línumaðurinn Jóhann Karl Reynisson (sem lék í fjarveru Haraldar Þorvarðarsonar) og hægri hornamaðurinn Einar Rafn Eiðsson sem er einn klárlega einn hættulegasti maður liðsins. Það er hægt að telja upp þó nokkur nöfn, Halldór Jóhann Sigfússon er liðinu mjög dýrmætur svo og skytturnar Jóhann Gunnar Einarsson og Andri Berg Haraldsson svo einhverjir séu nefnir að ógleymdum Róbert Aron Hostert sem hefur reynst okkur afar erfiður í síðustu leikjum. Þá hefur Arnar Birkir Hálfdánarson komið mjög sterkur upp í síðustu leikjum, ekki síst sem skytta þó hann sé hornamaður að upplagi.
Gulli, Heimir og Höddi hafa örugglega ekkert á móti því að taka á Frömurum á fimmtudaginn
Það er allavega ljóst að það verður hörkuleikur í boði í Höllinni á fimmtudagskvöldið.
Úrvalsdeild karla
Senda skilaboð
Vefur KA
Vefur Þór
Fréttaleit
Ljósmyndir frá leiknum
Textalýsing frá leiknum
Tölfræði leiksins 
Senda á Facebook