
Fréttir - Leikir tímabilsins - Leikmenn - Stjórn - Saga og tölfræði - Höllin - Lagið - Myndir - Myndbönd - Tenglar
- Úrvalsdeild karla - Senda skilaboð - Vefur KA - Vefur Þór - Fréttaleit

Fyrri leiktímabil

Tímabilið 2011-12

Úrslit leikja

Deild karla

Ljósmyndir frá leiknum

Textalýsing frá leiknum

Tölfræði leiksins

		Akureyri - HK 25-27 (11-13)
		N1 deild karla
		Íþróttahöllin
		Fim 2. febrúar 2012 klukkan: 19:00
		Dómarar: Gísli H. Jóhannsson og Hafsteinn Ingibergsson, eftirlitsmaður Valgeir Ómarsson

Umfjöllun


Heimir fékk harkalegar móttökur af HK-ingum í leiknum		2. febrúar 2012 - Akureyri handboltafélag skrifar Svekkjandi tap fyrir HK í kvöld Það var sveiflukenndur leikur sem fór fram í Íþróttahöllinni í kvöld þegar Akureyri og HK mættust. Akureyri byrjaði leikinn af miklum krafti og náði fjögurra marka forystu snemma leiks, 8-4 og áfram upp í 10-6. Liðið virtist hafa örugg tök á leiknum og HK liðið komst ekkert áleiðis. En þar með fór allt í baklás, ekkert gekk í sóknarleiknum og HK skoraði næstu sex mörk í leiknum og staðan orðin 10-12 fyrir gestina. bæði lið skoruðu eitt mark fram að leikhléi og hálfleiksstaðan því 11-13 fyrir HK. Guðlaugur Arnarsson og Atli Hilmarsson trúlega hissa á ákvörðunum dómaranna Byrjun seinni hálfleiks var afleit, fjöldinn allur af glötuðum boltum sem færðu HK hraðaupphlaupsmörk á silfurfati og staðan skyndilega orðin 11-17. Þennan kafla vann HK sem sagt með 11 mörkum gegn 1 og ástandið ískyggilegt. Bjarni Fritzson tók þá til sinna ráða og hélt Akureyrarliðinu á floti en munurinn hélst svipaður allt upp í stöðuna 19-25 en þá má segja að hlutirnir hafi farið að gerast. Bjarni Fritzson skorar eitt af níu mörkum sínum í leiknum Daníel Berg Grétarsson braut gróflega á Heimi í hraðaupphlaupi og fékk beint rautt spjald fyrir. Mikill hiti færðist í leikinn og var Heimir mjög ósáttur við framkomu Daníels en Heimir þurfti að yfirgefa völlinn um tíma eftir þessi viðskipti. Akureyrarliðinu óx ásmegin við þetta, Sveinbjörn skellti í lás og sóknarleikurinn hresstist með þeim árangri að lið skoraði næstu sex mörk og staðan orðin jöfn 25-25. Bæði lið misstu menn útaf, þar á meðal fékk Hörður Fannar sína þriðju brottvísun og þar með útilokun. Akureyri fékk tækifæri til að komast yfir en æsingurinn varð fullmikill. Oddur fékk dæmda á sig línu í hraðaupphlaupi og boltinn glataðis tvívegis. HK héldu hins vegar haus og skoruðu tvö síðustu mörk leiksins og fögnuðu því tveggja marka sigri 25-27 og nældu þar með í tvö dýrmæt stig. Arfaslakur kafli í lok fyrri hálfleiks og í upphafi þess seinni fór alveg með leikinn fyrir Akureyri að þessu sinni en nú þýðir ekkert annað en að standa upp og klára það sem eftir er af mótinu af fullum krafti. Þessi úrslit ásamt öðrum úrslitum kvöldsins þýða það að Akureyri verður ekki á meðal fjögurra efstu liða eftir þegar þriðja umferð deildarinnar hefst og þar með ljóst að í þeirri umferð fær liðið þrjá heimaleiki en fjóra útileiki. Markaskorunin var sem hér segir: Bjarni Fritzson 9 (3 úr vítum), Geir Guðmundsson 4, Guðmundur Hólmar Helgason 3, Hörður Fannar Sigþórsson 3, Heimir Örn Árnason 2, Oddur Gretarsson 2, Bergvin Gíslason og Daníel Örn Einarsson 1 mark hvor. Sveinbjörn Pétursson stóð í markinu allan tíma og varði 18 skot, þar af 1 vítakast og var valinn besti maður liðsins. Sveinbjörn Pétursson varði vel í leiknum Hjá HK var Ólafur Bjarki valinn bestur og fengu báðir matarkörfu frá Norðlenska að launum.


Tengdar fréttir
Heimir Árnason fékk fyrir ferðina í leiknum		3. febrúar 2012 - Akureyri handboltafélag skrifar Myndir frá leik Akureyrar og HK Nú eru komnar í hús myndir Þóris Tryggvasonar frá leik Akureyrar og HK frá því í gærkvöldi. Þó að úrslit leiksins hafi orðið með öðrum hætti en stuðningsmenn liðsins ætluðu þá þýðir ekki gráta það heldur snúa bökum saman og safna þeim stigum sem eru í boði fyrir þá átta leikim sem eftir eru í deildinni. Ásgeir Jónsson hitaði upp með leikmönnunum Svipmynd úr stúkunni Daníel Berg fær hér líta rauða spjaldið fyrir brot á Heimi sem er ekki sáttur Oddur með frábært mark úr horninu Smelltu hér til að skoða allar myndirnar.

Atli Hilmarsson fær stórt verkefni í dag

2. febrúar 2012 - Akureyri handboltafélag skrifar

Leikur dagsins, Akureyri – HK

Handboltaárið 2012 hefst með stórleik í Íþróttahöllinni þar sem Akureyri tekur á móti HK en leikurinn hefur mikla þýðingu fyrir bæði liðin. Liðin eru í toppbaráttu N1 deildarinnar þar sem HK hefur stigi meira en Akureyri.

En það eru ekki bara leikmenn heldur ekki síður áhorfendur sem bíða spenntir eftir leiknum enda var Akureyrarliðið á góðu róli fyrir leikjahléð. Sigrar á Val, Haukum og Fram í síðustu leikjum hleyptu svo sannarlega miklum krafti í áhorfendur sem að vanda voru frábærir og tóku virkan þátt í leikjunum.

Áhorfendur taka virkan þátt í leikjum liðsins enda stemmingin frábær í stúkunni

Ýmsir fjölmiðlar hafa fjallað mikið um meiðsli og vandræðagang hjá Akureyrarliðinu síðustu daga. Óhætt er að segja að þær sögur séu flestar stórlega ýktar. Það verður fróðlegt að sjá leikmannahóp Akureyrar í dag en leikmönnum á sjúkralista liðsins hefur sem betur fer fækkað verulega upp á síðkastið.

Beinar útsendingar
Að vanda verður heimasíðan með beina textalýsingu frá leiknum. Lýsingin opnast í nýjum glugga og endunýjast sjálfkrafa á 15 sekúndna fresti.

Smelltu hér til að fylgjast með textalýsingunni.

Auk þess hyggst SportTV.is sýna leikinn beint á netinu, útsending þeirra hefst væntanlega rétt fyrir klukkan 19:00.
Smelltu hér til að fylgjast með útsendingu SportTV.is.

Við bjóðum HK liðið velkomið í Höllina

31. janúar 2012 - Akureyri handboltafélag skrifar

Heimaleikur gegn HK á fimmtudaginn

Þá er Evrópumeistaramótinu lokið og þar með fer N1 deildin á fulla ferð að nýju hér heima. Á fimmtudaginn fer fram heil umferð í deildinni og fyrsti leikurinn er einmitt hér í Íþróttahöllinni þar sem við fáum firnasterkt lið HK í heimsókn.
Leikurinn er ákaflega þýðingarmikill fyrir bæði liðin sem eru í baráttunni um sæti í úrslitakeppninni í vor. Baráttan er jöfn þar sem HK og FH eru í 2. – 3. sæti, einu stigi á undan Akureyri og Fram og því augljóst að það verður ekkert gefið eftir í þessum leik.

Lið HK er lítið breytt frá síðustu leiktíð og er gríðarlega vel mannað. Landsliðsmaðurinn Ólafur Bjarki Ragnarsson hefur farið fyrir liðinu og hann þarf varla að kynna fyrir íslenskum handboltaáhugamönnum. Ólafur var í valinn handknattleiksmaður ársins á lokahófi HSÍ síðastliðið vor, valinn í úrvalslið ársins auk þess að vera valinn besti sóknarmaður ársins.

Hornamaðurinn, Bjarki Már Elísson hefur farið á kostum í vetur og er markahæstur þeirra HK manna það sem af er og var valinn til landsliðsæfinga í vetur. Þá er línumaðurinn Atli Ævar Ingólfsson einn mikilvægasti leikmaður liðsins, skorar ávalt mikið og hefur oftar en ekki reynst Akureyrarliðinu erfiður hér í Höllinni. Skyttan Tandri Már Konráðsson hefur leikið frábærlega í vetur og ljóst að þar fer leikmaður sem þarf að hafa góðar gætur á.

Ólafur Bjarki, Bjarki Már, Atli Ævar og Tandri Már

Það verður forvitnilegt að sjá hvernig liðin koma til leiks eftir þetta langa hlé á deildarkeppninni. Einhverjir leikmenn fóru í smávægilegar læknisaðgerðir og aðrir fengu langþráða hvíld fyrir lúin bein. En nú er biðin á enda fyrir leikmenn og áhorfendur og alveg örugglega hægt að lofa rafmögnuðum leik enda hvert stig dýrmætt í baráttunni sem framundan er.

Til baka Senda á Facebook

Umsjón og hönnun: Stefán Jóhannsson og Ágúst Stefánsson

Svekkjandi tap fyrir HK í kvöld

Myndir frá leik Akureyrar og HK

Leikur dagsins, Akureyri – HK

Heimaleikur gegn HK á fimmtudaginn