Warning: Undefined array key "frettanr" in /web/akhandadmin/public_html/index.php on line 15 Tap fyrir HK í kaflaskiptum leik - Akureyri Handboltafélag
Við fundum fáein viðtöl við leikmenn og þjálfara eftir lokaleik Akureyrar á þessu tímabili. Eftir að hafa verið með í úrslitakeppninni undandfarin þrjú ár þá fannst mönnum að vonum snubbótt að vera komnir í sumarfrí á þessum árstíma.
Tómas Þór Þórðarson blaðamaður Morgunblaðsins ræddi við Guðmund Hólmar Helgason:
Guðmundur Hólmar: Framtíðin björt
„Það er ömurlegt að vera kominn í frí,“ sagði Guðmundur Hólmar Helgason, stórskytta Akureyrar, eftir tap liðsins, 23:22, gegn HK í lokaumferð N1-deildar karla í handbolta í kvöld. Fyrir leikinn var það ljóst að þetta yrði síðasti leikur Akureyrar á tímabilinu.
„Þetta var fyrsti leikurinn í rosalega langan tíma þar sem ekki var neitt rosalega mikið undir. Við ætluðum bara að hafa gaman að þessu og gerðum það svo sem framan af. Svo misstum við aðeins dampinn og þeir skora átta mörk í röð. Þetta er langt frá því að vera það sem við lögðum upp með. Við ætluðum að ná í eins marga titla og við gátum á tímabilinu.“
Guðmundur Hólmar vill ekki nota meiðsli sem afsökun fyrir slöku gengi Akureyrar á tímabilinu heldur horfir hann frekar til leika sem liðið var að tapa illa.
„Það var sérstaklega leiðinlegt hvernig við vorum að tapa sumum leikjunum í vetur. Við vorum að tapa illa og tapa stundum fyrir liðum sem voru fyrir neðan okkur. Það stingur mikið. Það voru mikil meiðsli í liðinu en það þýðir ekkert að tala endalaust um það. Það eru líka frábærir leikir inn á milli eins og gegn FH. En það eru þessi vondu töp sem maður sér eftir og þegar við erum að missa hausinn,“ sagði Guðmundur Hólmar sem horfir björtum augum til framtíðar á Akureyri.
Guðmundur Hólmar og Bjarki Már Elísson kljást um boltann
„Það er hellingur af flottum leikmönnum í liðinu og enn fleiri í 2. flokki. Framtíðin er þokkalega björt hjá okkur ef þessir strákar halda rétt á spilunum og eru duglegir að æfa. Svo megum við ekki missa þá suður.“
En hvað á nú að fara gera í þessu snemmbúna sumarfríi? „Ég veit það ekki. Bara klára vinnuna og njóta tímans með fjölskyldunni. Og auðvitað fara á gott móralskt djamm með strákunum,“ sagði Guðmundur Hólmar Helgason.
Elvar Geir Magnússon blaðamaður Vísis ræddi við þjálfarana Heimi Örn Árnason og Kristinn Guðmundsson:
Heimir Örn: Býst við að verðum áfram
Eins og áður sagði var vitað fyrir leik að þetta væri síðasti leikur Akureyrar á tímabilinu. Vísir ræddi við Heimi Örn Árnason, annan af spilandi þjálfurum Akureyrar. Hann býst við því að hann og Bjarni Fritzson verði áfram með liðið.
„Þetta var ágætis leikur. Við vorum bara flottir og hefðum getað stolið þessu í lokin. Við ætluðum bara að hafa gaman að þessu. Snillingurinn Jón Heiðar Sigurðsson stóð sig frábærlega í seinni hálfleik, hann var sem töframaður á miðjunni. Toppmaður,“ sagði Heimir.
Heimir í fyrsta leik liðanna í haust
Hvaða lærdóm er hægt að draga af tímabilinu? „Meiðast ekki... nei við lærðum helling af þessu. Meðal annars að takast á við mótlæti. Það munaði ekki miklu að við yrðum í algjöru rugli en við náðum að stíga upp á réttum tíma. Því miður fyrir ungt lið Aftureldingar er það fallið, það er sorglegt. Ég er hrifinn af þessum ungu strákum, þeir eru líka svo stórir annað en ég,“ sagði Heimir hress.
„Ég býst við því að við verðum áfram með liðið. Það kemur bara í ljós. Við eigum eftir að setjast niður og kanna leikmannamál. Það á eftir að fara yfir málin.“
Hvaða lið verður Íslandsmeistari? „Ef Siggi Eggerts heldur svona áfram verður Fram Íslandsmeistari. Engin pressa á hann samt.“
Kristinn Guðmundsson: Mjög svekkjandi
„Við gerðum ekki nægilega vel. Það voru tímapunktar á tímabilinu sem við getum horft til baka á og svekkt okkur yfir. Það er mjög svekkjandi að hafa misst af úrslitakeppninni og við getum engum kennt um nema okkur sjálfum,“ segir Kristinn Guðmundsson, þjálfari HK.
„Við vorum arfaslakir framan af þessu ári og vorum of lengi að ná inn þeim takti sem þarf að vera til staðar hjá okkur og þar af leiðandi þá gekk illa og við hrukkum ekki almennilega í gang fyrr en of seint. Það er vonlaus staða að þurfa að treysta á aðra. Það er ekkert við Framara að sakast, þeir skulda okkur ekki neitt. Það er engin skylda hjá þeim að gera eitthvað fyrir okkur.“
Hvað tekur núna við? „Það tekur frí og svo skoðum við málin.“
Kristinn yfirvegaður þegar liðin mættust í Höllinni í vetur
Að lokum fengum við Kristinn til að setja sig í spámannsstellingar og spá fyrir um næstu Íslandsmeistara: „Ég ætla að spá því að FH verði Íslandsmeistari.“
Vídeóviðtöl
Á Sport.is eru þrjú viðtöl eftir leikinn:
Bjarni Fritzson: "Þessi leikur skipti engu máli fyrir okkur Bjarni Fritzson, spilandi þjálfari Akureyrar, var sultuslakur eftir tap gegn HK, og var ánægður með spil sinna manna.
Arnór Freyr Stefánsson: Spurning hvoru megin þetta myndi detta Arnór Freyr, markmaður HK, var sáttur með sigur en svekktur með það að önnur úrslit féllu ekki með þeim.
Kristinn Guðmundsson: Það þýðir aldrei að treysta á önnur úrslit Kristinn Guðmundsson, þjálfari HK, var ánægður með úrslitin í dag, og benti á að ekkert þýddi að reyða sig á önnur úrslit en sín eigin.
Það var allt á suðupunkti þegar liðin mættust í Kópavoginum í haust
25. mars 2013 - Akureyri handboltafélag skrifar
Leikur dagsins: HK – Akureyri bein textalýsing
Í kvöld klukkan 19:30 lýkur deildarkeppni karla með fjórum leikjum. Akureyri sækir HK heim í Digranesið og þó að liðið hafi ekki að miklu að keppa þá viljum við að sjálfsögðu fá sigur og enda þannig tímabilið á tveimur sigurleikjum. HK liðið á hins vegar möguleika á sæti í úrslitakeppninni en til þess þurfa þeir að sjálfsögðu að sigra í leiknum og einnig að treysta á að ÍR tapi fyrir Fram.
Þetta kemur allt í ljós í kvöld og jafnframt hvort það verður Valur eða Afturelding sem fellur beint í 1. deildina eða fer í umspil um úrvalsdeildarsætið.
Það var sannkölluð dramatík á lokamínútunni þegar liðin mættust í Digranesinu í haust. HK tók leikhlé þegar 40 sekúndur voru til leiksloka og freistuðu þess að innbyrða sigurinn, Akureyrarvörnin vann boltann og Heimir sendi boltann fram. HK menn náðu að brjóta á Guðmundi Hólmari þegar 7 sekúndur voru til leiksloka og Akureyri tók leikhlé.
Það skilaði sér fullkomnlega því að vörn HK opnaðist og Oddur Gretarsson stakk sér í gegn og skoraði sigurmarkið á lokaandartaki leiksins. Spurning hvort sama spenna verði í kvöld?
Oddur finnur hér leið í gegnum HK vörnina á lokasekúndunum. Mynd: Eyjólfur Garðarsson
Okkar maður verður með beina textalýsingu frá Digranesinu og auðvelt að fylgjast með henni hér á síðunni. Við hvetjum stuðningsmenn á stórkópavogssvæðinu til að mæta á þennan síðasta leik tímabilsins og skemmta sér með strákunum.
N1-deildinni lýkur á mánudaginn þegar 21. umferðin verður leikin. Akureyri sækir HK liðið heim í Digranesið og með sigri í leiknum mun liðið tryggja sér 5. sæti deildarinnar. Að sjálfsögðu er mikilvægt að klára deildina með stæl og vinna síðasta leikinn.
Það er vissulega meira í húfi hjá HK liðinu sem á möguleika á að tryggja sér sæti í úrslitakeppninni með því að sigra en þarf þá í leiðinni að treysta á að ÍR tapi stigi á móti Fram í sínum leik. Kópavogsbúar munu því örugglega koma af fullum krafti í leikinn og Akureyrarliðið vill örugglega kveðja þetta erfiða tímabil á jákvæðum nótum með sigri.
Liðin hafa unnið sinn hvorn leikinn í vetur, báðir unnust þeir á útvelli.
Leikurinn hefst klukkan 19:30 eins og allir hinir leikirnir en þeir eru: Haukar – FH, Fram – ÍR, Valur - Afturelding og loks HK – Akureyri.
Leikur Hauka og FH hefur þannig séð enga þýðingu, Haukar eru deildarmeistarar og FH verður í 2. sæti. Leikir Fram og ÍR svo og leikur HK og Akureyrar skera úr um það hvort það verður ÍR eða HK sem fer í úrslitakeppnina. Mest dramatík er trúlega í kringum leik Vals og Aftureldingar en sá leikur er hreinn úrslitaleikur um það hvort liðið fellur beint um deild eða fer í umspil um sæti í úrvalsdeildinni.
Þú getur smellt á heiti liðs til að sjá úrslit í leikjum viðkomandi liðs.
Úrvalsdeild karla
Senda skilaboð
Vefur KA
Vefur Þór
Fréttaleit
Textalýsing frá leiknum
Tölfræði leiksins 
Senda á Facebook