Warning: Undefined array key "frettanr" in /web/akhandadmin/public_html/index.php on line 15 Afar mikilvægur sigur á Stjörnunni - Akureyri Handboltafélag
20. febrúar 2015 - Akureyri handboltafélag skrifar
Viðtöl eftir leikinn gegn Stjörnunni
Að venju hlerum við hvað blaðamenn fengu upp úr leikmönnum og þjálfurum eftir leik gærdagsins þar sem Akureyri fór með sigur á Stjörnumönnum. Byrjum á viðtölum Einars Sigtryggssonar tíðindamanns mbl.is en hann ræddi við markvörð heimamanna, Hreiðar Levy Guðmundsson og Skúla Gunnsteinsson, þjálfara Stjörnunnar:
Hreiðar Levy: Þetta gekk vonum framar
Hreiðar Levý Guðmundsson var aðalmaðurinn í Höllinni á Akureyri í kvöld þegar Akureyringar unnu mikilvægan sigur á Stjörnunni í Olís-deild karla í handknattleik, 24:21. Hann kom í markið í fjarveru Tomasar Olason og varði 23 skot. Reiknast það sem 52% markvarsla þar sem Stjarnan skoraði aðeins 21 mark í leiknum. Að auki var vörn heimamanna að taka nokkur skot svo segja má að Stjarnan hafi haft múr fyrir framan mark Hreiðars. Kappinn var sérlega kátur inni í klefa eftir leik.
„Þetta var óvænt og gekk vonum framar. Mér leið mjög vel og hafði rosalega gaman af. Þetta var virkilega mikilvægur sigur því við náum að slíta okkur frá Stjörnunni og liðunum fyrir neðan okkur,“ sagði Hreiðar sem er að ná sínum fyrri styrk eftir meiðsli. „Ég er allur að braggast eftir allt þetta vesen í fætinum á mér, meiðslin og sýkingu í kjölfarið. Það er þó enn nokkuð í að ég verði fullfrískur en þetta lyftir mér andlega og liðinu líka,“ sagði Hreiðar.
„Ég er sérlega ánægður með hvað strákarnir lögðu sig mikið fram. Þeir voru ótrúlega duglegir að hlaupa til baka og stoppa hröðu sóknirnar þeirra trekk í trekk. Það skipti gríðarlegu máli. Eigum við ekki að segja að þetta hafi verið fallegur sigur,“ sagði Hreiðar sem segir sóknarleik Akureyringa hafa verið þeim höfuðverkur undanfarna daga. „Sóknarleikurinn hjá okkur er ákveðinn höfuðverkur en við leystum hann ágætlega í kvöld. Menn eru margir laskaðir og meiddir og ég held að ég hafi aldrei kynnst öðru eins hjá nokkru liði. Við erum að tína inn í hópinn yngri og óreyndari menn og það er stórt skref fyrir þessa stráka“ sagði Hreiðar að lokum og dembdi sér svo í hóp félaga sinna.
Hreiðar var maður leiksins
Skúli: Týndum öllu á heiðinni
Skúli Gunnsteinsson, þjálfari Stjörnunnar, var með húmorinn í lagi þrátt fyrir slæmt tap Stjörnunnar gegn Akureyri fyrir norðan í kvöld í Olís-deild karla í handknattleik, 24:21. Stjörnumenn voru tæpa níu tíma á leiðinni norður í hrikalegri hálku og hvassviðri. Hugsanlega hefur sú ævintýraferð haft einhver áhrif því Stjörnumenn voru ólíkir sjálfum sér í leiknum.
„Við erum ósáttir með þetta. Vörnin var svo sem í lagi og markvarslan einnig en það var sóknin sem brást. Við skorum bara 21 mark, brennum af nokkrum dauðafærum og svo komu ansi margar vondar sendingar. Það má segja að ákvarðanatakan og yfirsýnin hafi týnst á heiðinni,“ sagði Skúli sem segir Garðbæinga hafa verið ólíka sjálfum sér í leiknum.
„Við vorum ólíkir sjálfum okkur, fengum engin mörk úr hröðum sóknum og því var þetta full erfitt gegn sterkri vörn þeirra. Þetta var einfaldlega ekki góður dagur. Rútuferðin var sér kapítuli og það eru ekki draumaaðstæður að fara í leik eftir svona langa setu. Það er þó alls engin afsökun. Við vorum bara ekki nógu góðir. Hins vegar er þetta bara einn leikur og við erum með hörkulið og höfum sýnt það í síðustu leikjum þar sem við vorum að spila vel,“ sagði Skúli.
Skúli Gunnarsson þjálfari Stjörnunnar vill að sínir menn séu tilbúnir
Næst kíkjum við á viðtöl Birgis H. Stefánssonar, blaðamanns visir.is en hann ræddi við Sverre Andreas Björnsson og Skúla Gunnsteinsson:
Sverre: Eitt af því sem mér finnst skemmtilegast að gera
„Já, það að spila svona varnarleik er eitt af því sem mér finnst skemmtilegast að gera,“ sagði Sverre Andreas Jakobsson, aðstoðarþjálfari og leikmaður Akureyrar, eftir leik þegar hann var spurður af því hvort að svona varnarleiks leikur væri ekki eitt af því skemmtilegasta sem hann kæmist í.
„Við náðum góðum varnarleik í dag og svo kom Hreiðar heldur betur sterkur inn og hjálpaði okkur mikið. Það sem við lögðum upp með tókst rosalega vel og við náðum að halda út. Þetta er búið að vera alveg svakalega erfitt undanfarið og þess vegna er þessi sigur líka svona sætur fyrir okkur.“
„Vörnin hjá báðum liðum var að halda, markmenn voru nokkuð góðir en bæði lið voru að gera mistök sóknarlega. Við náum mjög góðum kafla í seinni hálfleiknum sem við náum að lifa á og klára þetta svo hérna í restina, þetta eru mjög mikilvægir punktar.“
Sverre sáttur með gang mála
Skúli: Nánast svaðilför
„Varnarleikurinn var nokkuð góður,“ sagði Skúli Þór Gunnsteinsson þjálfari Stjörnunnar eftir leik.
„Við erum með markvörslu sem er svona að meðaltali alveg í lagi og svo frábæra markvörslu undir lokin. En við erum líka að klikka á tíu dauðafærum í svona leik og það hefur bara engin efni á því. Við erum ekki bara með slæma tæknifeila heldur eru þeir einnig að koma á mjög slæmum tímum. Það er ekki neinn skandall að fá á sig 24 mörk, við stóðum vörnina ágætlega í töluverðan tíma en því miður þá náðum við ekki að notfæra okkur það.“
Það getur varla verið annað en að tæplega níu tíma rútuferð hafi einhver áhrif á liðið? „Já, klárlega er það eitt atriði. Þó að menn voru búnir að búa sig undir ferð þá var þetta nánast svaðilför en við erum með verkefni sem við verðum að laga. Við verðum að laga hröðu sóknirnar og nýta færin t.d. en það er þá bara verkefni fyrir næsta leik. Það er ekkert auðvelt að koma hingað, frábær heimavöllur og góður stuðningur.“
Á sport.is eru komin viðtöl Siguróla Magna Sigurðssonar við þjálfarana Atla Hilmarsson og Skúla Gunnsteinsson:
Atli Hilmarsson: Hreiðar var ótrúlegur
Atli Hilmarsson, þjálfari Akureyrar, var ánægður með sigurinn þrátt fyrir erfiða fæðingu. „Kannski ekki fallegasti leikurinn sem liðið hefur spilað en mjög mikilvæg stig kominn í hús.“
Hann segir létti að hafa unnið leik en Akureyri hefur átt erfitt eftir áramót. Hann bendir þó á góðan heimavallarárangur. „Mjög mikill léttir að vinna en að vísu höfum við ekki verið að tapa hérna heima. Við viljum halda heimavellinum sem gryfju.“
Tomas Olason, markvörður Akureyrar, var ekki með í dag vegna veikinda en það kom ekki að sök en Hreiðar Levý var hreint út sagt ótrúlegur í dag. „Tomas var veikur og Hreiðar svaraði kallinu frábærlega. Hann hefur varla spilað síðan í apríl en sá var góður í dag. Hann var ótrúlegur.“
En hvaða markmaður byrjar næsta leik þegar Tomas Ola er búinn að verja 20 bolta tvo leiki í röð og Hreiðar Levy með 25 varða bolta í dag. Sannkallað lúxus vandamál sem blasir við Atla. „Ég þarf bara að sjá hvernig staðan verður þá. Rosa ánægður að vera ekki bara með tvo góða markmenn heldur þrjá góða markmenn. Bjarki Símonarson hefur staðið sig mjög vel í æfingaleikjum og ég hefði verið óhræddur með að setja hann inn í dag.“
Viðtalið við Atla Hilmars má sjá hér fyrir neðan.
Skúli Gunnsteins: Þetta hefur verið erfiður dagur
Skúli Gunnsteinsson, þjálfari Stjörnunnar, var svekktur með tap eftir langt og strangt ferðalag til Akureyrar í dag. „Ég er bara svekktur. Við spiluðum fína vörn og markvarslan var fín en við vorum ekki nógu góðir í sókn. Við klúðruðum tíu dauðafærum.“
Eins og áður kom fram var ferðalagið erfitt en færðin var léleg alla leið norður og það tók langan tíma að koma liðinu á áfangastað en seinka þurfti leiknum um einn og hálfan klukkutíma. „Þetta var erfiður dagur og við vorum í 9-10 tíma að ferðast. Allir orðnir pirraðir og við þurfum að drífa okkur í leik. Auðvitað er erfitt að koma hingað eftir svona ferðalag en ég er svekktur.“
Ferðalagið var greinilega strangt og þurftu leikmenn að leggja ýmislegt á sig til að koma rútunni alla leið. „Jú það voru leikmenn að liggja undir rútu að skipta um felgu og svona en ég hefði viljað samt fá betri frammistöðu.“
Viðtalið við Skúla má sjá hér fyrir neðan.
Stjörnumenn eru á leiðinni þó það gangi hægt
19. febrúar 2015 - Akureyri handboltafélag skrifar
Leik kvöldsins seinkað, stefnt á að leika 20:30
Vegna slæms veðurs og erfiðra aðstæðna hefur för Stjörnumanna hingað norður tekið töluvert meiri tíma en áætlað var. Leik kvöldsins sem átti að hefjast klukkan 19:00 hefur því verið seinkað en ekki liggur ljóst fyrir hvenær flautað verður til leiks.
Enn er þó stefnt á að leika leikinn í kvöld, fylgist spennt með nánari upplýsingum.
Uppfært! Stefnt er á að leikurinn hefjist klukkan 20:30
Það er mikið undir í þessum leik
19. febrúar 2015 - Akureyri handboltafélag skrifar
Leikur dagsins: Akureyri - Stjarnan í Íþróttahöllinni
Það er komið að leikdegi hjá Akureyri Handboltafélagi, meira að segja heimaleik. Það er Stjarnan úr Garðabæ sem mætir í Höllina í kvöld en leikurinn hefst að venju klukkan 19:00. Bæði lið þurfa nauðsynlega á stigunum að halda og því fyrirsjáanlegt að það verður mikil barátta innan sem utan vallar.
Síðasti þriðjungur Olís-deildarinnar hófst síðasta sunnudag þar sem Akureyri átti hörkuleik gegn Aftureldingu og mátti þola grátlegt eins marks tap. Leik Stjörnunnar og ÍBV sem átti að fara fram sama dag var frestað vegna veðurs og hefur ekki enn farið fram.
Þar á undan sigraði Stjarnan ÍR í miklum baráttuleik og ljóst að Stjarnan er til alls líkleg. Liðin hafa mæst tvisvar í deildinni í vetur, Akureyri vann fyrri leikinn hér í Höllinni eftir mikla baráttu en leik liðanna í Garðabænum lauk með jafntefli.
Sverre skorar sitt fyrsta mark fyrir Akureyri, einmitt í leik gegn Stjörnunni í haust, hvað gerist í kvöld?
Við verðum með textalýsingu frá leiknum hér á síðunni en leikurinn hefst eins og áður segir klukkan 19:00 en Höllin verður opnuð klukkan 18:15.
Úrvalsdeild karla
Senda skilaboð
Vefur KA
Vefur Þór
Fréttaleit
Ljósmyndir frá leiknum
Textalýsing frá leiknum
Tölfræði leiksins 
Næst kíkjum við á viðtöl Birgis H. Stefánssonar, blaðamanns visir.is en hann ræddi við Sverre Andreas Björnsson og Skúla Gunnsteinsson:
Á sport.is eru komin viðtöl Siguróla Magna Sigurðssonar við þjálfarana Atla Hilmarsson og Skúla Gunnsteinsson:
Senda á Facebook