Sterkir Valsmenn fóru með sigur af hólmi - Akureyri Handboltafélag

Warning: Undefined array key "frettanr" in /web/akhandadmin/public_html/index.php on line 15
Sterkir Valsmenn fóru með sigur af hólmi - Akureyri Handboltafélag


Fréttir - Leikir tímabilsins - Leikmenn - Stjórn - Saga og tölfræði - Höllin - Lagið - Myndir - Myndbönd - Tenglar
- Úrvalsdeild karla - Senda skilaboð - Vefur KA - Vefur Þór - Fréttaleit

Fyrri leiktímabil

Tímabilið 2015-16

Leikmenn meistarafl. karla

Ljósmyndir frá leiknum

Myndband frá leiknum

Textalýsing frá leiknum

Tölfræði leiksins

		Akureyri - Valur 19-27 (10-13)
		Olís deild karla
		KA heimilið
		Sun. 13. sept. 2015 klukkan: 17:00
		Dómarar: Bjarki Bóasson og Gunnar Óli Gústafsson. Eftirlit Einar Sveinsson

Umfjöllun


Sverre á verk fyrir höndum		13. september 2015 - Akureyri handboltafélag skrifar Sterkir Valsmenn fóru með sigur af hólmi Það var öflugt Valslið sem mætti norður yfir heiðar í dag og sýndu að sigur þeirra á Eyjamönnum í fyrstu umferðinni var engin tilviljun. Valur byrjaði af miklum krafti og komust í 1-5 eftir tíu mínútna leik. Hlynur Morthens markvörður þeirra gaf tóninn strax í upphafi, lokaði markinu og varði m.a. vítakast. Hlynur gaf tóninn með því að verja vítkast Sverre tók leikhlé sem bar þann árangur að leikur liðsins breyttist heldur betur. Hreiðar Levý kom með látum í markið og Akureyri jafnaði leikinn í 6-6 og fín stemming komin í húsið. Valsmenn létu þó ekki slá sig út af laginu og náðu undirtökunum á nýjann leik og leiddu í hálfleik með þrem mörkum, 10-13. Kristján Orri Jóhannsson var atkvæðamikill í sóknarleiknum var með fimm mörk í fyrri hálfleiknum og Hreiðar með átta varða bolta. Hreiðar Levý átti magnaða innkomu í markið í fyrri hálfleiknum Áfram hélt fjörið í upphafi seinni hálfleiks og Ingimundur minkaði muninn í tvö mörk, 13-15 eftir rúmlega fimm mínútna leik. Þar með tóku Valsmenn heldur betur við sér og juku forskotið jafnt og þétt, mestur varð munurinn tíu mörk 16-26. Hlynur Morthens gjörsamlega lokaði markinu og dældi fram boltum sem skiluðu ófáum hraðaupphlaupum Valsmanna. Lokatölur urðu átta marka sigur Vals 19-27 og líkt og tölurnar bera með sér voru þeir einfaldlega mun öflugri í dag. Leikur Akureyrar var mjög kaflaskiptur, eftir erfiða byrjun sýndi liðið oft á tíðum prýðisleik í fyrri hálfleiknum en sérstaklega sóknarleikurinn gekk erfiðlega í seinni hálfleiknum. Raunar fengu menn fjölmörg opin færi en Hlynur markvörður Valsmanna reyndist erfiður og varði allt hvað af tók, þar á meðal fóru alls þrjú vítaköst forgörðum. Þetta gekk ekki í dag en sem betur fer eru margir leikir eftir þannig að liðið á klárlega eftir að smella betur saman. Kristján Orri var valinn maður Akureyrarliðsins og fékk kjötveislu frá Norðlenska að launum Mörk Akureyrar: Kristján Orri Jóhannsson 8 (3 úr vítum), Bergvin Þór Gíslason, Brynjar Hólm Grétarsson, Halldór Logi Árnason og Sigþór Árni Heimisson 2 mörk hver, Heiðar Þór Aðalsteinsson, Hörður Másson og Ingimundur Ingimundarson 1 mark hver. Í markinu vörðu Hreiðar Levý Guðmundsson 10 skot og Tomas Olason 5. Mörk Vals: Geir Guðmundsson 6, Alexander Örn Júlíusson og Orri Freyr Gíslason 5 mörk hvor, Ómar Ingi Magnússon og Sveinn Aron Sveinsson 4 mörk hvor, Guðmundur Hólmar Helgason 2 og Atli Már Báruson 1 mark. Í marki Vals varði Hlynur Morthens 20 skot (þar af 2 vítaköst) og Sigurður Ingiberg Ólafsson varði til viðbótar 1 vítakast. Áhorfendur létu sitt ekki eftir liggja í dag Næsti leikur Akureyrar er útileikur gegn Aftureldingu laugardaginn 19. september.


Tengdar fréttir
Andri Snær og Ingimundur í viðtölum		14. september 2015 - Akureyri handboltafélag skrifar Viðtöl eftir leikinn gegn Val Við tökum upp þráðinn frá því í fyrra að leita uppi viðtöl í fjölmiðlum við leikmenn og þjálfara eftir leiki Akureyrar. Mbl.is og visir.is ræddu við fulltrúa liðanna í gær og fara þau hér á eftir. Byrjum á viðtölum Einars Sigtryggssonar sem eru tekin af mbl.is en hann ræddi við Andra Snæ Stefánsson og Hlyn Morthens: Andri Snær: Þurfum að byggja upp vígi hérna Andri Snær Stefánsson, hinn síungi fyrirliði Akureyrar, var ekki nógu hress eftir slæmt tap Akureyringa gegn Val í Olísdeildinni í handbolta í dag. Eftir nokkuð jafnan leik stakk Valur af í síðari hálfleiknum og lokatölur urðu 19:27. „Þetta var ekki boðlegt hjá okkur í seinni hálfleiknum. Það var margt ágætt hjá liðinu í fyrri hálfleik og þetta leit ágætlega út. Svo bara fór Hlynur að verja og þeir juku muninn jafnt og þétt. Við vorum alveg að komast í færin en nýttum þau alveg svakalega illa.“ En hvernig líst Andra Snæ á nýjan heimavöll liðsins? „Mér líst mjög vel á þetta. KA-heimilið er einfaldlega besta handboltahúsið í bænum og hér er hægt að mynda mikla stemningu. Það er gaman, bæði fyrir okkur leikmennina og svo áhorfendur að þeir séu alveg ofan í vellinum. Upplifun áhorfenda er miklu meiri, þeir finna af okkur svita- og prumpufýluna. Það voru margir áhorfendur í dag og hávaði. Því miður stóðum við ekki undir væntingum en það er lykilatriði fyrir Akureyri að byggja upp vígi á heimavelli sem hin liðin munu hræðast" sagði fyrirliðinn að skilnaði. Andri Snær fer inn úr horninu Hlynur Morthens: Konan vill ekki hafa mig heima Í frægri bíómynd sem heitir Groundhog Day upplifir aðalsöguhetjan sama daginn aftur og aftur. Segja má að þegar Hlynur Morthens kemur til Akureyringar þá upplifi hann sama daginn í hvert skipti. Hann ver eins og berserkur í leiknum, er verðlaunaður með fullum poka af kjötvörum og segir sömu hlutina í viðtali við blaðamann mbl. Eftir öruggan sigur Vals á Akureyri í Olísdeild karla í dag var Hlynur gripinn í viðtal. Leiknum lauk 19:27 og varði Hlynur tuttugu skot í leiknum, þar af tvö vítaskot. „Það má segja að þetta sé alltaf sama sagan. Við vorum í nokkru basli í fyrri hálfleik og aðeins fram í þann seinni. Við héldum samt áfram með að framkvæma það sem þjálfarinn sagði okkur að gera og höfðum trú á að þetta hefðist allt. Það kom líka á daginn, bara eins og í Eyjum í síðasta leik. Við höfum góðan mannskap og trú á því sem við erum að gera,“ sagði Hlynur. En hvað með þá staðreynd að láta Hlyn standa svona lengi í markinu. Það sást þegar leið á leikinn að kallinn, sem brátt verður fertugur, átti í smá basli með að standa upp eftir að hafa kastað sér í gólfið. „Ég finn það alveg að skrokkurinn er ekki upp á sitt besta núna en ég klára alveg leikina. Svo þarf ég bara að takast á við morgundaginn.“ Eins og vanalega var Hlynur Morthens besti maður Vals og fór heim með kjötveisluna En framhaldið? Er Hlynur farinn að sjá langþráð frí í hyllingum? „Nei, í raun ekki. Ég er samningsbundinn Val út þetta tímabil og er ekkert farinn að plana hvað gerist eftir það. Konan er voða fegin. Hún vill ekkert hafa mig heima og svo kem ég alltaf heim með fullt af kjöti handa henni,“ sagði Hlynur glettinn á svip Ólafur Haukur Tómason, blaðamaður visir.is ræddi í leikslok við Ingimund Ingimundarson og Guðmund Hólmar Helgason leikmann Vals: Ingimundur: Vorum ekki nægilega áræðnir „Það var fyrst og fremst sóknarleikurinn sem klikkaði. Líkt og gerðist í Austurberginu í síðustu umferð. Við vorum sjálfum okkur verstir og tókum rangar ákvarðanir, þá sérstaklega sóknarlega,” sagði Ingimundur Ingimundarson, aðstoðarþjálfari og leikmaður Akureyrar eftir leikinn. Sóknarleikur heimamanna var ekki góður og voru þeir til að mynda að klúðra mikið af skotum í leiknum. Ingimundur var ekki ánægður með leik sinna manna og þótti liðið of kraftlaust mest allan leikinn. „Við vorum ekki nógu áræðnir, við erum ekki að fara af nægilegum krafti í ákveðnar ógnanir. Við lögðum upp með að fara í árásir og það tókst ágætlega á vissum köflum en það tókst ekki nógu vel í of langan tíma,” bætti hann við. Þetta var fyrsti heimaleikur Akureyrar eftir að stjórn félagsins ákvað að færa sig úr Íþróttahöllinni og aftur í KA-heimilið. Ingimundur segist ekki hafa verið lengi að sannfærast um að sú ákvörðun hafi verið rétt. „Það er frábært að spila hérna og ég skil hvað þeir eru að fara með því að koma hérna upp eftir hvað stemmingu og svona varðar en því miður gátum við ekki boðið upp á betri leik í dag fyrir allt fólkið sem mætti. Stemmingin var flott og vonandi koma úrslitin í næsta leik,” sagði Ingimundur. Ingimundur sleppir Geir sem er kominn í dauðafæri Guðmundur: Þolinmæðin skilaði þessu „Við erum með fína breidd og sýndum mikla þolinmæði. Þeir eru að spila á svolítið fáum mönnum. Þeir héldu vel í okkur fyrstu 35-40 mínúturnar en við vorum þolinmóðir og það skilaði okkur þessu góða forskoti seint í leiknum. Við fórum að skjóta betur á markverðina þeirra sem eru stórir og góðir og vörnin þéttist,” sagði Guðmundur Hólmar, leikmaður Vals eftir sigurinn á Akureyri. Valur hefur byrjað leiktíðina af miklum krafti og unnið fyrstu tvo leiki sína í vetur á erfiðum útivöllum. Guðmundur telur að stemmingin í hópnum sé góð og stefna liðsins er að sjálfsögðu sett á titla. Guðmundur mætti á sinn gamla heimavöll en hann spilaði með KA í yngri flokkum og sagði að tilfinninguna á að koma aftur sem leikmaður gesta liðs þar sé skrítin en góð tilfinning. „Við stefnum alltaf á titla og vinnum tvo leiki á erfiðum útivöllum. Það er alltaf erfitt að fara til Eyja og það er frábært að koma hingað í KA-heimilið, það er mikil stemming.” „Við komum hérna í hitteðfyrra svo ég hafði smá tilfinningu fyrir því að spila hérna en það er öðruvísi. Það er gaman og nokkuð skrítið, sérstaklega þegar maður kemur hingað í rauðu og hvítu en það er alltaf gaman að koma að spila í KA-heimilinu,” sagði Guðmundur léttur í bragði. „Við vorum gagnrýndir fyrir að missa þrjá sterka leikmenn en fáum inn Sigurð Ingiberg og Gunna Harðar og vorum gagnrýndir fyrir að taka ekki fleiri leikmenn inn. Það er mikil uppbygging í Val og fullt af ungum strákum í hópnum,” bætti Guðmundur við. Guðmundur Hólmar sækir að Halldóri Loga og Herði Mássyni í vörn Akureyrar


Já þér er boðið á leikinn gegn Val		11. september 2015 - Akureyri handboltafélag skrifar Handboltaveisla á sunnudaginn - frítt á leikinn Það má svo sannarlega segja að það sé handboltaveisla á Akureyri á sunnudaginn þegar fyrsti heimaleikur Akureyrar í Olísdeildinni fer fram. Íslandsbanki býður öllum frítt á leikinn þannig að það er um að gera að nýta sér þetta kostaboð. Mótherjinn er heldur ekki af lakara taginu, Valur sem er spáð góðu gengi í vetur, öðru sæti deildarinnar ef spár ganga eftir. Viðureignir Akureyrar og Vals hafa í gegnum tíðina verið hin besta skemmtun og ekki spillir fyrir að helstu hetjur Valsliðsins eru einmitt Akureyringarnir Guðmundur Hólmar Helgason og Geir Guðmundsson. Leikurinn hefst klukkan 17:00 í KA heimilinu en það er upplagt að mæta tímanlega á staðinn því fyrir leikinn verður hægt að ganga frá kaupum á ársmiðum (silfurkortum) og gullkortum fyrir tímabilið. Gullkortið innifelur aðgang að öllum heimaleikjum Akureyrar, hvort sem er í deildarkeppninni, úrslitakeppnum eða bikarkeppninni. Auk þess er gullkortahöfum boðið upp á aðgang að stuðningsmannaherberginu en þar er í boði heitur matur fyrir leiki og kaffi í hálfleik. Auk ýmissa fríðinda sem tilkynntir verða síðar. Það er nýlunda í vetur að Gullkortið veiti jafnframt aðgang að heimaleikjum í bikar- og úrslitakeppninni. Verð á Gullkortinu 2015-2016 er 30.000 krónur. Silfurkortið eða ársmiðinn er fyrst og fremst aðgöngumiði að öllum heimaleikjum liðsins í Olís deildinni (ekki bikar og úrslitakeppni). Silfurkorthafar þurfa því ekki að standa í röð í miðasölunni heldur ganga beint inn. Silfurkortið 2015-2016 kostar 20.000 krónur. Þeir sem ganga frá kaupum á kortum (Gull- eða Silfur) fyrir sunnudagsleikinn fá jafnframt glæsilegt barmmerki með nýja merki Akureyrar Handboltafélags. Boðið er upp á nokkrar greiðsluleiðir auk þess sem hægt er að semja um raðgreiðslur ef það hentar. Hægt er að panta kort með því að smella á myndirnar af kortunum hér að ofan! Þeir sem panta með þeim hætti geta nálgast kortin í KA heimilinu fyrir leikinn að öðrum kosti verður þeim komið til viðkomandi fyrir næsta heimaleik! Sjáumst í KA heimilinu á sunnudaginn!

Til baka Senda á Facebook

Umsjón og hönnun: Stefán Jóhannsson og Ágúst Stefánsson

web statistics