Warning: Undefined array key "frettanr" in /web/akhandadmin/public_html/index.php on line 15
Bikardraumnum lokið, tap í Garðabænum - Akureyri Handboltafélag
  Fréttir  -  Leikir tímabilsins  -  Leikmenn  -  Stjórn  -  Saga og tölfræði  -  Höllin  -  Lagið  -  Myndir  -  Myndbönd  -  Tenglar
  - Úrvalsdeild karla - Senda skilaboð - Vefur KA - Vefur Þór - Fréttaleit
Fyrri leiktímabil

Tímabilið 2015-16

Leikmenn meistarafl. karla
Úrslit leikja
Deild karla




Myndband frá leiknum      Textalýsing frá leiknum     Tölfræði leiksins 
    Stjarnan - Akureyri  26-23 (16-11)
Coca Cola bikar karla
TM höllin
Mán. 30. nóv. 2015 klukkan: 18:00
Dómarar: Bjarki Bóasson og Gunnar Óli Gústafsson
Umfjöllun

Fínn leikur hjá Begga dugði ekki og Akureyri er dottið útúr bikarnum



30. nóvember 2015 - Akureyri handboltafélag skrifar

Bikardraumnum lokið, tap í Garðabænum

Akureyri sótti Stjörnuna heim í Garðabæinn í kvöld í 16-liða úrslitum Coca-Cola bikarsins. Stjarnan sem er á toppi 1. deildar og hefur verið að leika afar vel það sem af er tímabili. Fyrirfram var því búist við hörkuleik þrátt fyrir að liðin léku ekki í sömu deild.

Smelltu hér til að sjá stutt myndband frá leiknum.

Leikurinn var stál í stál á upphafsmínútunum og var strax ljóst að heimamenn voru með lið sem þurfti að taka alvarlega. Staðan var jöfn 7-7 þegar hálfleikurinn var hálfnaður en þá fór sóknarleikur okkar manna að hiksta all verulega á meðan Stjörnumenn héldu áfram að leika sinn bolta og refsa fyrir öll mistök Akureyrar í sókninni.

Magnaður lokakafli heimamanna í fyrri hálfleik sá til þess að staðan var hvorki meira né minna en 16-11 í hléinu og ljóst að okkar lið var í miklum vandræðum. Þetta kveikti svo sannarlega í áhorfendum og var fínasta stemning í Mýrinni.

Stjörnumenn skoruðu svo fyrsta mark síðari hálfleiks og munurinn orðinn 6 mörk, en þá kviknaði líf og skoraði Kristján Orri næstu fjögur mörk leiksins og munurinn orðinn tvö mörk að nýju. Á þessum stutta kafla var vörnin að halda betur og menn náðu að refsa með hraðaupphlaupum.

En aftur gáfu heimamenn í og náðu forskotinu aftur upp í fimm mörk, 20-15, og 20 mínútur eftir af leiknum. En það var klárt að menn höfðu farið ágætlega yfir hlutina í hálfleiknum því aftur gerðu okkar menn áhlaup og minnkuðu muninn niður í eitt mark og enn rúmar 10 mínútur til leiksloka.

Töluvert stress greip um sig í leik heimamanna og fékk Akureyri ótal tækifæri á að jafna metin en aldrei tókst það og þegar Stjarnan loksins skoraði var ljóst að tækifærið var farið. Lokatölur 26-23 og bikardraumurinn úti að sinni, slök frammistaða og mikil vonbrigði en Stjörnumenn áttu einfaldlega skilið að fara áfram hér í kvöld.

Akureyri hefur verið að leika betur og betur í undanförnum leikjum eftir erfiða byrjun á tímabilinu. Því miður var leikurinn í kvöld mikil afturför, ég ætla ekki að taka neitt frá Stjörnunni sem lék vel en að Akureyri hafi fengið öll þessi tækifæri á að jafna metin þrátt fyrir spilamennsku liðsins í leiknum segir að Akureyrarliðið sé einfaldlega betra lið.

Bergvin Þór Gíslason var flottur í dag og í fyrri hálfleik mátti halda að hann hafi verið eini leikmaðurinn í sókn liðsins. Beggi endaði á að skora 6 mörk og var að finna fínar opnanir fyrir liðsfélagana. Kristján Orri átti flottan kafla í upphafi síðari hálfleiks og nýtti vítin vel að þessu sinni, endaði með 9 mörk (4 úr vítum) á meðan Hörður Másson skoraði 5 mörk.

Þessir þrír kappar skoruðu samtals 20 mörk af 23 mörkum liðsins og segir það mikið um hve slakan leik liðið átti. Halldór Logi og Friðrik áttu í miklum erfiðleikum með að nýta færin sín á línunni en Dóri sótti þó 3 vítaköst. Heiðar Þór var slakur í dag en hann nýtti færin illa og missti þar að auki nokkra bolta útaf, ekki vanalegt að sjá þetta hjá honum.

Varnarleikurinn var ekki boðlegur lengst af í leiknum, það komu fínir kaflar þar sem menn náðu að loka fínt á sem skilaði unnum boltum og hröðum upphlaupum en bit vantaði mestan hluta leiksins og fengu Stjörnumenn að skjóta á markið óáreittir alltof lengi og góðar skyttur liðsins nýttu sér það vel. Hreiðar Levý átti fína kafla í leiknum en eins og aðrir leikmenn liðsins datt hann niður á köflum.

Bikardraumurinn nær því ekki lengra að þessu sinni en vonandi læra menn af þessum leik, liðið er einfaldlega ekki það öflugt að það megi við því að menn mæti ekki klárir til leiks. Næsti leikur er gegn botnliði Víkings á fimmtudaginn, Víkingar hafa verið að koma sterkir til baka í deildinni og ef okkar lið mætir ekki klárt í slaginn getur farið illa.

Tengdar fréttir

Sverre var skiljanlega ekki sáttur með leikinn

1. desember 2015 - Akureyri handboltafélag skrifar

Viðtöl eftir bikarleikinn gegn Stjörnunni

Þeir voru nú ekki margir fjölmiðlamennirnir sem mættu á leik Stjörnunnar og Akureyrar í 16-liða úrslitum Coca-Cola bikarsins í gær. Vísir bauð upp á beina textalýsingu frá leiknum og tók svo þjálfarana tali að leik loknum. En við byrjum á stuttri umfjöllun RÚV um leikinn.



Ingvi Þór Sæmundsson var á leiknum fyrir Vísi og hér eru viðtöl hans við þjálfarana:

Sverre: Vorum ekki við í kvöld

Sverre Jakobsson, þjálfari Akureyrar, var ekki sáttur með frammistöðu sinna manna gegn Stjörnunni í kvöld. Norðanmenn töpuðu leiknum 26-23 og eru úr leik í Coca-Cola bikarnum.

"Þeir voru hungraðri og höfðu miklu meiri vilja til að gera eitthvað í þessum leik. Það sást strax í fyrri hálfleik og þess vegna voru þeir með fimm marka forskot í hálfleik," sagði Sverre.

"Við náðum okkur ekki almennilega á strik. Við fengum tækifæri í seinni hálfleik til að jafna en klúðruðum því. Möguleikarnir voru til staðar."

Einu marki munaði á liðunum undir lok fyrri hálfleik, 12-11, en þá komu fjögur Stjörnumörk í röð og Garðbæingar leiddu því að fimm mörkum í hálfleik, 16-11. Þessi kafli reyndist Akureyringum dýrkeyptur þegar uppi var staðið.

"Þeir voru flottir og spiluðu vel, nýttu sína möguleika og bjuggu til stemmningu.

"Við vorum ekki nógu tilbúnir í byrjun, eins og við höfum verið í flestum leikjum í vetur," sagði Sverre sem hefði viljað sjá fleiri leikmenn draga vagninn í sóknarleiknum í kvöld en Kristján Orri Jóhannsson, Bergvin Þór Gíslason og Hörður Másson skoruðu 20 af 23 mörkum Akureyrar í kvöld.

"Við náðum ekki að dreifa þessu nógu vel og náðum ekki að búa til "ryþma" í sóknarleiknum. Við vorum heldur ekki nógu ákveðnir í vörninni.

"Við vorum ekki við í kvöld," sagði Sverre að endingu.

Einar: Vörnin var frábær

Einar Jónsson, þjálfari Stjörnunnar, var eðlilega kátur eftir þriggja marka sigur Garðbæinga, 26-23, á Akureyri í 16-liða úrslitum Coca-Cola bikarins í kvöld.

"Svona er þetta stundum, þetta datt með okkur í dag," sagði Einar eftir leik.

"Þetta var jafnt en við leiddum meirihlutann af leiknum og héldum út. Við rúlluðum vel á liðinu og það voru allir sem skiluðu einhverju. Ég er ánægður og stoltur að hafa náð að klára þetta."

Stjörnumenn, sem sitja á toppnum í 1. deildinni, leiddu með fimm mörkum í hálfleik, 16-11, og voru í góðri stöðu lengi framan af seinni hálfleiknum.

Um miðbik hans kom slæmur kafli hjá Garðbæingum og Akureyringar náðu tvívegis að minnka muninn í eitt mark. Þeim tókst þó ekki að jafna þrátt fyrir mörg tækifæri. En skipti það máli að mati Einars?

"Jú, kannski. Við hikstuðum smá á þessum kafla en héldum haus og sigldum þessu heim.

"Sjálfsagt skipti það máli að þeir náðu ekki að jafna," sagði Einar sem var ánægður með hversu vel markaskorið dreifðist hjá Stjörnunni en níu leikmenn liðsins skoruðu í leiknum en aðeins fimm hjá Akureyri.

"Við höfum notað marga leikmenn í vetur og flestir eru með stórt hlutverk í liðinu. Vörnin hjá okkur var frábær í fyrri hálfleik, og eiginlega allan leikinn, og Einar (Ólafur Vilmundarson) var góður fyrir aftan.

"Við erum bara þannig lið að við erum ekki með neinar stórstjörnur en við erum með flotta liðsheild," sagði Einar að lokum.


Stjörnumenn eru á toppnum í 1. deildinni



29. nóvember 2015 - Akureyri handboltafélag skrifar

Bikarleikur gegn Stjörnunni á mánudagskvöldið

Akureyri mætir í Garðabæinn á mánudaginn og mætir þar liði Stjörnunnar í 16-liða úrslitum Coca-Cola bikarsins. Stjarnan er í fyrsta sæti 1. deildar og má reikna með hörkuleik enda sæti í 8-liða úrslitunum í húfi.

Síðast þegar liðin mættust í bikarnum unnu Stjörnumenn óvæntan sigur en það var í undanúrslitum keppninnar árið 2013. Stjarnan lék eins og núna í 1. deildinni og með öguðum leik tókst þeim að landa 24-26 sigri og tryggja sér sæti í úrslitaleiknum. Nú er bara að vona að þetta endurtaki sig ekki á mánudaginn.

Stjarnan féll úr efstu deild síðasta vor en er sem stendur í efsta sæti 1. deildar eftir tíu umferðir, töpuðu raunar fyrir Selfyssingum 32 - 24 en hafa unnið hina níu leikina býsna örugglega.

Atkvæðamestu menn Stjörnunnar eru Starri Friðriksson og Andri Hjartar Grétarsson með 50 skoruð mörk hvor. En þjálfari liðsins er Einar Jónsson, fyrrum þjálfari Fram en er í dag aðstoðarþjálfari íslenska kvennalandsliðsins.
Akureyri og Stjarnan mættust þrisvar á síðasta tímabili, Akureyri vann tvisvar á heimavelli en leiknum í Garðabæ lauk með jafntefli.


Heiðar Þór og Andri Hjartar Grétarsson eigast hér við í fyrri heimaleiknum í fyrra

Það leit raunar ekki vel út á tímabili í fyrri heimaleiknum, Stjarnan hafði leitt allan leikinn og meðal annars verið 6 mörkum yfir í síðari hálfleik. Frábær endurkoma Akureyrar hinsvegar í lokin sneri leiknum við og á endanum vannst 31-27 sigur. Hér má sjá síðustu einu og hálfu mínútuna í leik Akureyrar og Stjörnunnar þann 25. september 2014.

Stjarnan hefur sem sé gert Akureyri lífið leitt og verða þeir leikir Akureyrarliðinu vonandi víti til varnaðar, það má búast við alvöru leik á mánudagskvöldið þar sem verður hart barist enda sæti í 8-liða úrslitunum í boði, áfram Akureyri!


Til baka    Senda á Facebook

Umsjón og hönnun: Stefán Jóhannsson og Ágúst Stefánsson