Warning: Undefined array key "frettanr" in /web/akhandadmin/public_html/index.php on line 15
Góður sigur á HK og Akureyri upp í 6. sætið - Akureyri Handboltafélag
  Fréttir  -  Leikir tímabilsins  -  Leikmenn  -  Stjórn  -  Saga og tölfræði  -  Höllin  -  Lagið  -  Myndir  -  Myndbönd  -  Tenglar
  - Úrvalsdeild karla - Senda skilaboð - Vefur KA - Vefur Þór - Fréttaleit
Fyrri leiktímabil

Tímabilið 2013-14

Leikmenn meistarafl. karla
Úrslit leikja
Deild karla
Ljósmyndir frá leiknum     Myndband frá leiknum      Textalýsing frá leiknum     Tölfræði leiksins 
    Akureyri - HK  31-23 (16-11)
Olís deild karla
Íþróttahöllin
Mán 14. apríl 2014 klukkan: 19:30
Dómarar: Bjarki Bóasson og Magnús Kári Jónsson. Eftirlitsdómari Helga Magnúsdóttir
Umfjöllun

Sigþór og Bjarni fóru á kostum í sókninni



15. apríl 2014 - Akureyri handboltafélag skrifar

Góður sigur á HK og Akureyri upp í 6. sætið

Það var ýmislegt í húfi í lokaumferð Olís deildarinnar sem var leikin í gærkvöldi. Keppikefli Akureyrarliðsins var að vinna sig upp úr 7. sæti deildarinnar og sleppa þannig við umspilsleiki um veru liðsins í úrvalsdeildinni næsta tímabil. Til að það gengi eftir þurfti liðið að sigra HK og jafnframt að samtímis ynni FH sigur á ÍR.

Það var ljóst strax í upphafi að Akureyrarliðið ætlaði að gera sitt til að þetta gæti gengið eftir. Fljótlega var staðan orðin 6-2 og ljóst að HK liðið ætti ekki mikla möguleika í leiknum. Akureyri bætti í og eftir að hafa skorað fimm mörk í röð var staðan orðin 12-5 fyrir heimamenn sem gátu leyft sér að slaka á en samt með örugga forystu í hálfleik, 16-11.


Bjarni Fritzson skorar eitt af 11 mörkum sínum í leiknum

Það var ljóst að menn komu vel stemmdir í seinni hálfleikinn enda gerði Akureyri þá endanlega út um leikinn, skoruðu fimm fyrstu mörk hálfleiksins auk þess sem Jovan Kukobat fór á kostum í markinu, varði ótrúlegustu færi HK manna af línunni auk þess sem hann varði vítakast.

Munurinn varð tíu mörk, 21-11 áður en HK komst á blað í seinni hálfleik með mark úr hraðaupphlaupi. Eins og gefur að skilja var öll spenna löngu horfin úr leiknum sem endaði með átta marka sigri heimamanna 31-23.


Sigþór Árni lék HK vörnina grátt

Það var ekki þar með sagt að spennan væri ekki í loftinu því nú var beðið úrslita úr leik ÍR og FH sem var nokkrum mínútum á eftir. Það fór um menn þegar ÍR jafnaði og innan við mínúta eftir af þeim leik. Það var því fagnað gríðarlega þegar tilkynnt var að FH hefði skorað sigurmark nokkrum sekúndum fyrir leikslok og þá ljóst að Akureyri var sloppið við umspilið og hafnaði í 6. sæti deildarinnar.

En aftur að leiknum, Akureyrarliðið hélt uppteknum hætti frá síðustu leikjum og lék prýðilega jafnt í vörn og sókn. Bjarni Fritzson og Sigþór Árni Heimisson voru frábærir í sókninni og Kristján Orri Jóhannsson öruggur í hægra horninu. Jovan stóð lengst af í markinu og eins og áður sagði átti hann nokkrar ævintýralegar vörslur.


Jovan Kukobat skellti í lás á löngum köflum

Mörk Akureyrar: Bjarni Fritzson 11 (3 úr vítum), Sigþór Árni Heimisson 7, Kristján Orri Jóhannsson 5, Jón Heiðar Sigurðsson 3, Þrándur Gíslason 2, Andri Snær Stefánsson, Friðrik Svavarsson og Hreinn Þór Hauksson 1 mark hver.
Jovan varði 14 skot þar af 1 vítakast. Tomas Olason stóð í markinu á lokakaflanum og varði 2 skot.

Mörk HK: Garðar Svansson 6, Óðinn Þór Ríkharðsson 6, Atli Karl Bachmann 5, Jóhann Reynir Gunnlaugsson 2, Andri Þór Helgason, Aron Gauti Óskarsson, Leó Snær Pétursson og Vilhelm Gauti Bergsveinsson 1 mark hver.
Markverðir HK vörðu samtals 5 skot, Baldur Ingi Agnarsson 3 og Valgeir Tómasson 2.

Í leikslok var Óðinn Þór Ríkharðsson útnefndur maður HK liðsins og Sigþór Árni Heimisson besti maður Akureyrarliðsins og fengu báðir veglega matarkörfu frá Norðlenska í viðurkenningarskyni.

Tengdar fréttir

Heimir sáttur með síðasta þriðjung mótsins

15. apríl 2014 - Akureyri handboltafélag skrifar

Viðtöl eftir leik Akureyrar og HK

Blaðamenn mbl.is, visir.is og sport.is tóku þjálfara og leikmenn tali í Höllinni eftir að leikjum kvöldsins var lokið og endanleg röð liðanna í deildinni lá fyrir.
Byrjum á viðtölum Einars Sigtryggssonar, blaðamanns Morgunblaðsins sem ræddi við Heimi Örn Árnason og Óðinn Þór Ríkharðsson:

Heimir Örn: Gott að þetta er búið

Heimir Örn Árnason var ansi léttur eftir að lærisveinar hans í liði Akureyrar voru endanlega sloppnir frá umspilsleikjum um laust sæti í efstu deild. Sigur Akureyrar á HK og mjög tæpur sigur FH á ÍR skutu Akureyringum upp fyrir ÍR í 6. Sæti deildarinnar en umspil hefur vofað yfir Akureyringum fá áramótum.

„Það er gott að þetta er búið. Við vildum ekkert vera að spila meira og eyða einhverjum hundraðþúsundköllum í umspilið. Ég er ánægður með strákana en þeir sýndu flottan leik í kvöld. Við vorum bara klárir frá byrjun og fyrir utan smá kafla hér og þar þá var þetta góður leikur. Það er frábært að hafa náð þessu svona á endasprettinum. Ég er mjög sáttur með lokaumferðina hjá okkur fyrir utan hálfleik gegn Fram og annan gegn Val. Það var fullt af flottum leikjum hjá okkur og í heildina er ég ánægður.


Heimir Örn á hliðarlínunni

Við erum fullir af sjálfstrausti eftir síðustu leiki og helst hefði ég viljað hafa leikina fleiri í deildinni. Veturinn fór dálítið í það að laga liðið eftir að við losuðum okkur við Serbann góða og svo voru menn í meiðslum þannig að þetta verður bara að teljast viðunandi eftir allt saman,“ sagði Heimir Örn að lokum.

Óðinn Þór: Kunnum að tapa eftir veturinn

Besti maður HK í tapleik þeirra gegn Akureyri í Olísdeildinni í kvöld var hinn 16 ára gamli Óðinn Þór Ríkarðsson. Kom hann inn á um miðjan fyrri hálfleik og byrjaði strax að raða inn mörkum. Þau urðu alls sex og var Óðinn Þór sáttur með sitt framlag.

„Þetta er búið að vera erfitt í vetur. Síðasti sigur var í nóvember og svo hefur ekki gengið nógu vel í 2. og 3. flokki (Óðinn Þór er á yngra ári í 3. flokki HK). Við kunnum a.m.k. að tapa eftir veturinn. Þetta er samt búin að vera góð reynsla fyrir mig en ég stefni í atvinnumennsku og þetta hjálpar örugglega upp á það. Það var kannski smá fúlt að sýna sig svona í síðasta leiknum en það verða fleiri leikir,“ sagði Óðinn Þór að lokum og verða það vonandi orð að sönnu enda mikið efni þarna á ferð.


Óðinn Þór Ríkharðsson valinn leikmaður HK liðsins

Birgir H. Stefánsson, blaðamaður visir.is ræddi við Sigþór Árna Heimisson, Heimi Örn Árnason og Óðinn þór:

Sigþór Árni: Þetta er alveg æðislegt

„Þetta er geðveikur léttir og bara ógeðslega gott,“ sagði Sigþór Árni mjög kátur eftir leik þegar ljóst var að Akureyri var ekki á leið í umspil. „Það sem við vorum búnir að vera að leggja upp með í síðustu leikjum er að hafa gaman að þessu og gera þetta sem lið. Það er það sem við erum búnir að vera að gera og erum þá bara ofboðslega góðir.“

Það virtist vera að fólk í kringum liðið væri búið að gefast upp en það verður ekki það sama sagt um liðið.
„Við erum búnir að vera að berjast við að koma stúkunni í gang og það gengur upp á köflum en svo dettur þetta niður inn á milli, þá rífum við þetta bara í gang af bekknum. Það eru alltaf klárir menn á bekknum til að koma inn eins og sást í dag.“

Sjö mörk hér í dag og mikill stígandi í þínum leik, þú ert væntanlega nokkuð sáttur?
„Heldur betur. Í byrjun vetrar setur maður sér markmið og markmið fyrir liðið, liðsmarkmiðin eru alltaf hærri sett en ég er búinn að ná einhverjum af mínum markmiðum þótt að þau séu ekki öll klár. En það er margt sem maður náði sem er mjög gott.“

Nú er það ljóst að tímabilið er búið, því fylgir væntanlega góð tilfinning?
„Þetta er alveg æðislegt, maður getur núna aðeins slappað af. Það er líka margt sem spilar inn í, meiðsli hjá mönnum og hópurinn er alltaf að þynnast. Maður er sjálfur ekkert alveg í topp standi eins og er þótt að maður gæti skilað þessu vel af sér í dag. Það er gott að fá að hvíla sig aðeins þar sem maður fer nú beint inn í úrslitakeppni með 2. flokki og gefur algjörlega 100% í það.


Sigþór með körfuna sem leikmaður Akureyrarliðsins

Heimir Örn: Stoltir af okkar liði

„Þrátt fyrir að þetta umspil verði kannski ekki neitt þá er bara heiðurinn að komast upp í 6. Sæti,“ sagði Heimir eftir leik þegar ljóst var að Akureyri var ekki að fara að enda í næst síðasta sætinu.

„Þótt að það hafi ekki verið þú þá voru nokkrir sem voru að halda því fram að við værum að fara að enda í sjöunda sæti og þess vegna er maður alveg hrikalega stoltur af þessum lokaspretti, við tókum einhverja átta af tíu held ég. Við fórum í Fjörðinn og tókum þrjú stig og erum bara mjög stoltir með liðið og endirinn. Það kom bara í ljós að við erum ekkert með verri lið en hinir.

Við ætluðum náttúrulega að byggja liðið í kringum þennan útlending sem kom. Hann var að vísu alveg hræðileg sending, ætla að vona að hann skilji ekki íslensku. Eftir að hann fór þá var bara allt upp á við og við erum bara hrikalega ánægðir með þetta, ótrúlega stoltir af okkar liði.“

Óðinn Þór: Mjög ánægður með mína frammistöðu

„Ég er mjög ánægður með mína frammistöðu,“ sagði Óðinn strax eftir leik en hann var besti maður HK í leiknum og átti í heild alveg frábæran leik. „Það er bara svekkjandi að tapa svona stórt. Þetta var mjög erfitt eins og allt tímabilið, við erum með þunnan hóp. Það er mjög mikið af liðinu að koma upp úr yngri flokkum eins og ég.“

Er það ekki rétt giskað út frá fæðingarári að þú sért leikmaður þriðja flokks?
„Jú, ég er á yngra ári í þriðja flokki. Maður er búinn að vera á bekknum allt tímabilið að fylgjast með þannig að stressið er svona að mestu farið.“

Að lokum eru hér tvö videóviðtöl Siguróla Sigurðssonar við þjálfara liðanna, Heimi Örn Árnason og Ágúst Jóhannsson sem birtust á sport.is:

Heimir Örn Árnason: Það verður mikill söknuður af Bjarna

Heimir Árnason, þjálfari Akureyrar, var að vonum sáttur með að sleppa við umspilið sem blasti við Akureyringum lengi vel í vetur. Í viðtali eftir sigurleik gegn HK í kvöld ræddi hann við Sportvarpið um framhaldið þar sem hann tjáði blaðamanni að Bjarni Fritzson væri á leiðinni suður og að hann sjálfur myndi spila með Hömrunum næsta vetur.

Ágúst: Verður spennandi fyrir nýjan þjálfara að taka við


Ágúst Jóhannsson stýrði HK í sínum síðasta leik í kvöld og jafnframt að öllum líkindum síðasta leik HK í úrvalsdeild. Hann ræddi við sportvarpið eftir leik um leikinn sem var að baki og bæði framhaldið hjá sér og HK.


Til baka    Senda á Facebook

Umsjón og hönnun: Stefán Jóhannsson og Ágúst Stefánsson