Warning: Undefined array key "frettanr" in /web/akhandadmin/public_html/index.php on line 15
Klaufaskapur í Austurbergi kostaði stigin - Akureyri Handboltafélag
  Fréttir  -  Leikir tímabilsins  -  Leikmenn  -  Stjórn  -  Saga og tölfræði  -  Höllin  -  Lagið  -  Myndir  -  Myndbönd  -  Tenglar
  - Úrvalsdeild karla - Senda skilaboð - Vefur KA - Vefur Þór - Fréttaleit
Fyrri leiktímabil

Tímabilið 2015-16

Leikmenn meistarafl. karla
Úrslit leikja
Deild karla
Ljósmyndir frá leiknum     Myndband frá leiknum      Textalýsing frá leiknum     Tölfræði leiksins 
    ÍR - Akureyri  25-23 (12-11)
Olís deild karla
Austurberg
Fim. 10. sept. 2015 klukkan: 19:00
Dómarar: Magnús Kári Jónsson og Ómar Ingi Sverrisson
Umfjöllun

Hörður var flottur í dag í sínum fyrsta leik með Akureyri

10. september 2015 - Akureyri handboltafélag skrifar

Klaufaskapur í Austurbergi kostaði stigin

Akureyri mætti í Austurbergið í fyrsta leik Olís deildarinnar þetta tímabilið og mátti búast við hörkuleik enda leikir liðanna iðulega jafnir og spennandi leikir. Eftir flotta byrjun Akureyrar náðu heimamenn að jafna og komast yfir, þeirri forystu héldu þeir og unnu að lokum 25-23 sigur.


Hér má sjá svipmyndir úr leiknum úr fréttatíma RÚV

Það var æðislegt að sjá Akureyrarliðið á upphafsmínútunum, mikil barátta og sóknarleikurinn gekk afar vel. Eftir rúmar 5 mínútur var staðan 1-3 og ekki leið á löngu uns forskotið var orðið þrjú mörk en sá munur hélst uns staðan var orðin 5-8.

Heimamenn í ÍR náðu að jafna í 9-9, en okkar menn svöruðu með tveimur góðum mörkum. Eftir það gáfu menn aðeins eftir og ÍR-ingarnir gengu á lagið, sóknarleikur Akureyrar missti marks og vörnin opnaðist ásamt því að Tomas hætti að verja. Hálfleikstölur því 12-11 fyrir ÍR í sveiflukenndum leik.

Jafnt var á nánast öllum tölum fyrstu 10 mínútur síðari hálfleiks en þá tók við hrikalegur kafli þar sem ÍR skoraði 7 mörk gegn 1 og rétt rúmlega 8 mínútur lifðu leiks. Þessi kafli fór á endanum með leikinn en þarna voru okkar menn að missa boltann á klaufalegan hátt sem og að ÍR skoraði sitt annað mark í leiknum yfir endilangan völlinn á meðan enginn var í Akureyrarmarkinu.

Akureyrarliðið má þó eiga það að í því býr mikill karakter og menn gáfust ekkert upp heldur reyndu allt hvað þeir gátu til að fá eitthvað útúr leiknum. Hreiðar Levý tók nokkra mikilvæga bolta og það úr góðum færum og Heiðar Þór fór að nýta sín færi vel en fram að því hafði nýting hornafæra verið afar slök hjá Akureyri. En þessi kafli kom því miður aðeins of seint og ÍR fór með 25-23 sigur af hólmi.

Liðin eru virkilega áþekk að getu en þegar litið er yfir leikinn þá unnu ÍR-ingar þennan leik einfaldlega á því að nýta færin sín betur og gera færri mistök. Bæði lið eiga eftir að bæta sína spilamennsku þegar líður á tímabilið en þá sérstaklega okkar lið, allavega skal ég hundur heita ef Akureyri gerir svona mörg mistök að meðaltali í leik í vetur.

Hörður Másson kom sterkur inn í lið Akureyrar í dag og átti glimrandi leik, flott barátta og óhræddur við að henda sér á glufur í vörn ÍR til að koma sér í færi. Hörður er maður leiksins að þessu sinni en ég trúi því að hann eigi bara eftir að verða betri eftir því sem hann kemst í betra leikform og aðlagast Akureyrarliðinu betur.

Tomas Olason byrjaði vel í marki Akureyrar en svo slökknaði á honum, vissulega voru mörg færanna erfið viðureignar en hann átti klárlega að taka fleiri bolta. Hreiðar Levý Guðmundsson kom svo í markið þegar um 20 mínútur lifðu leiks og kom hann sterkur inn, varði 7 skot og var með 50% vörslu.

Vissulega svekkjandi að fá ekkert útúr leiknum í dag en þetta var bara fyrsti leikur tímabilsins, það eru ennþá 26 leikir eftir og liðið mun bara vaxa eftir þennan leik. Nú þarf bara að slípa liðið aðeins betur saman og þá verður þetta flott hjá Akureyri í vetur.

Tengdar fréttir

Sissi er í góðum hóp í úrvalsliðinu

12. september 2015 - Akureyri handboltafélag skrifar

Sigþór Árni í úrvalsliði 1. umferðar á fimmeinn.is

Fyrstu umferð Olís deildar karla lauk í gær þegar frestuðum leik ÍBV og Vals lauk. Handboltasíðan fimmeinn.is setur iðulega saman úrvalslið leikmanna í hverri umferð og fyrsta úrvalslið tímabilsins er komið inn.

Sigþór Árni Heimisson leikstjórnandi Akureyrar er á miðjunni í liðinu en Sigþór átti fínan leik þegar Akureyri tapaði fyrir ÍR í Breiðholtinu.

Markmaður: Kristófer Fannar Guðmundsson, Fram.
Vinstra horn: Einar Pétur, Haukum.
Vinstri skytta: Ingi Rafn Róbertsson, ÍR.
Miðja: Sigþór Árni Heimisson, Akureyri.

Línumaður: Pétur Júníusson, Aftureldingu.
Hægra horn: Theodór Sigurbjörnsson, ÍBV.
Hægri skytta: Ólafur Ægir Ólafsson. Fram.


Við hefjum deildina með útileik gegn ÍR

9. september 2015 - Akureyri handboltafélag skrifar

Útileikur gegn ÍR á fimmtudaginn

Þá er komið að fyrsta deildarleik Akureyrar á tímabilinu en á fimmtudaginn mætir Akureyri í Breiðholtið á heimavöll ÍR. Þessi lið mættust einmitt í hörkuslag í 8-liða úrslitum síðasta tímabils og þar að auki í síðasta deildarleiknum þannig að þetta verður fimmta viðureign liðanna í röð á Íslandsmóti.

Líkt og síðasta ár þjálfar góðkunningi okkar, Bjarni Fritzson ÍR liðið og væntanlega verður þetta hörkuviðureign.

Við hvetjum alla sem geta til að mæta í Austurbergið og hvetja Akureyri til sigurs leikurinn hefst klukkan 19:00 á fimmtudaginn.

Við gerum ráð fyrir að vera með beina textalýsingu frá leiknum hér á heimasíðunni fyrir þá fjölmörgu sem ekki komast á leikinn.

Heimaleikur á sunnudaginn - frítt fyrir alla í boði Íslandsbanka
Þess má geta að Akureyri á heimaleik gegn Val á sunnudaginn klukkan 17:00 í KA heimilinu. Íslandsbanki býður öllum áhugamönnum á leikinn, nánar um þann leik síðar.

Til baka    Senda á Facebook

Umsjón og hönnun: Stefán Jóhannsson og Ágúst Stefánsson