Brotlending í seinni hálfleik á Hlíðarenda - Akureyri Handboltafélag

Warning: Undefined array key "frettanr" in /web/akhandadmin/public_html/index.php on line 15
Brotlending í seinni hálfleik á Hlíðarenda - Akureyri Handboltafélag


Fréttir - Leikir tímabilsins - Leikmenn - Stjórn - Saga og tölfræði - Höllin - Lagið - Myndir - Myndbönd - Tenglar
- Úrvalsdeild karla - Senda skilaboð - Vefur KA - Vefur Þór - Fréttaleit

Fyrri leiktímabil

Tímabilið 2015-16

Leikmenn meistarafl. karla

Ljósmyndir frá leiknum

Myndband frá leiknum

Textalýsing frá leiknum

Tölfræði leiksins

		Valur - Akureyri 22-15 (12-11)
		Olís deild karla
		Valshöllin
		Mið. 3. feb. 2016 klukkan: 19:00
		Dómarar: Arnar Sigurjónsson og Svavar Ólafur Pétursson

Umfjöllun


Bernharð var magnaður í sínum fyrsta leik		3. febrúar 2016 - Akureyri handboltafélag skrifar Brotlending í seinni hálfleik á Hlíðarenda Akureyri sótti Valsara heim í fyrsta leik eftir jóla og EM frí. Fyrir leik var vitað að við ramman reip var að draga enda Valur með ákaflega sterkt lið á sama tíma og það vantaði mikilvæga pósta í lið Akureyrar. Þrátt fyrir það þá var fyrri hálfleikurinn virkilega góður og var jafnt á nánast öllum tölum. Strákarnir héldu fínu tempói á leiknum og voru að mínu mati betri aðilinn í hálfleiknum. En Hlynur Morthens átti stórkostlegan leik í marki heimamanna og sá til þess að Valsmenn leiddu 12-11 í hléinu. Ekki byrjaði síðari hálfleikurinn nægilega vel og munurinn varð fljótlega 15-11 og margir sem reiknuðu með að okkar vængbrotna lið væri sprungið á limminu. En þá kom stórfurðulegur kafli, strákarnir minnkuðu muninn í 15-13 og fengu ótal tækifæri til að minnka muninn enn frekar. Það fór svo að Valsarar skoruðu ekki mark í rúmar 13 mínútur, en ekki nýttist það vel þar sem Akureyri skoraði ekki mark í rúmar 12 mínútur! Þeir rauðklæddu gerðu svo útum leikinn með góðum langskotum og munurinn þegar leiktíminn rann út orðinn 7 mörk, 22-15. Varnarleikur Akureyrar var til fyrirmyndar enda náðist að halda Valsliðinu í 22 mörkum en hann var einnig frábær hjá Völsurum. Akureyri skorar ekki nema 4 mörk í síðari hálfleiknum og í heildina 15 mörk sem er nýtt met í sögu félagsins yfir fæst mörk skoruð í einum leik. Stóri munurinn á liðunum í dag var í raun nýting færa. Hlynur Morthens varði 24 bolta í Valsmarkinu og var með 63% vörslu sem er ótrúleg tölfræði. Á sama tíma fann Tomas sig ekki en Bernharð Anton Jónsson sem kom í markið í sínum fyrsta leik var mjög góður. Bernharð varði 13 skot, þar af 1 vítakast og 3 dauðafæri úr hröðumupphlaupum. Vissulega vonbrigði að tapa leiknum og það þetta illa eftir mjög flottan fyrri hálfleik en það verður að líta til þess að það vantar mikilvæga pósta í liðið. Nú er bara að vona að menn nái sér enda heil vika í næsta leik sem er heimaleikur gegn ÍR og er sá leikur ansi mikilvægur upp á framhaldið, við sjáumst í KA-Heimilinu, áfram Akureyri!


Tengdar fréttir
Sverre og Andri voru í viðtölum eftir leikinn		4. febrúar 2016 - Akureyri handboltafélag skrifar Viðtöl eftir leikinn gegn Val Það var eftirvænting ríkjandi hjá öllum og þar á meðal blaðamönnum þegar Olís deildin fór af stað á ný eftir EM-pásuna. Byrjum á viðtölum Ívars Benediktssonar við Sverre og Hlyn Morthens markvörð Valsmanna. Sverre: Verðum að skora fleiri mörk „Úr því að við skoruðum ekki nema 15 mörk þá er vart hægt að reikna með sigri,“ sagði Sverre Andreas Jakobsson, þjálfari Akureyrar, eftir tap liðsins, 22:15, fyrir Val í Valshöllinni í Olís-deild karla í handknattleik í kvöld. Akureyrarliðið skoraði aðeins fjögur mörk í síðari hálfleik og þá kom um tíu mínútna kafli þar sem liðið skoraði ekki mark. „Mér fannst fyrri hálfleikur vera að mörgu leyti góður. Þá náðum við að stjórna betur hraða leiksins. Í síðari hálfleik misstum við Valsmenn aðeins fram úr okkar. Eftir það kom langur markalaus kafli hjá báðum liðum. Eftir að okkur tókst ekki að nýta þann kafla betur þá reyndist leikurinn okkur erfiður og Valsmenn tóku af skarið í lokin,“ sagði Sverre sem var án fjögurra sterkra leikmanna, Heiðars Þór Aðalsteinssonar, Hreiðars Levý Guðmundsson, Brynjars Hólm Grétarssonar og Sigþór Árna Heimissonar. Sjá lengri útgáfu í spilaranum hér að neðan: Hlynur: Notum bara þá afsökun „Sennilega var munurinn á liðunum sá á liðunum, ekki var sóknarleikurinn góður,“ svaraði Hlynur Morthens markvörður Vals, spurningunni um hvort hann hefði riðið baggamuninn fyrir Valsliðið þegar það vann Akureyri, 22:15, í Olís-deild karla í handknattleik í Valshöllinni í kvöld. Hlynur átti stórleik og varði 24 skot. „Vörn og markvarsla var í lagi hjá okkur, sérstaklega í síðari hálfleik. „Við vorum bjartsýnir fyrir leikinn þar sem okkur hafði gengið vel í æfingaleikjum upp á síðkastið. En ég hef engar áhyggjur. Við erum almennilegt lið og rífum okkur upp fyrir næsta leik. Þetta var fyrsti alvöruleikurinn í langan tíma. Eigum við ekki að nota þá afsökun,“ sagði Hlynur léttur í bragði að vanda. Á visir.is er að finna viðtöl Guðmundar Marinós Ingvarssonar við Sverre og landsliðsmanninn Guðmund Hólmar Helgason. Sverre: Tækifærið var þarna „Ég var mjög ánægður með fyrri hálfleikinn og við vorum með annað í huga fyrir seinni hálfleikinn,“ sagði Sverre Andreas Jakobsson þjálfari Akureyrar. „Við missum þá aðeins fram úr okkur í byrjun seinni hálfleiks en náum að minnka muninn og fáum svo fjölmarga sénsa til að gera betur úr þeirri stöðu. Við náum aldrei að minnka þetta í eitt mark eða gera betur og svo ná þeir öðrum sprett og þá var þetta erfitt.“ Það munaði mikið um að lykilmenn á borð við Brynjar Hólm Grétarsson og Sigþór Heimisson vantar í lið Akureyrar auk þess sem Bergvin Þór Gíslason lék meiddur. Sverre vill samt ekki nota það sem afsökun. „Tækifærið var þarna en við vorum orðnir hálf lúnir með þunnskipaðan hóp. Það er engin afsökun. Við ætluðum að gera mikið betur. Við tökum á hverri prófraun fyrir sig án þess að horfa á einhverjar afsakanir. Það er auðvelt að benda á eitt og annað eftir leik en við vorum ekki með alla okkar leikmenn og það voru menn hér að fá að reyna sig í fyrsta skipti sem er frábært og gefur þeim mikilvæga reynslu,“ sagði Sverre en það var í raun breiddin sem skildi á milli liðanna. „Valsmenn eru með þéttan bekk og alla heila en við ekki. Þá er þetta erfitt. Þeir rúlla vel á hópnum á meðan mínir menn þreytast sem sást vel á þeim kafla þegar Valur gerir út um leikinn.“ Guðmundur Hólmar: Verðskuldaður sigur „Vörnin þéttist og Bubbi (Hlynur Morthens) fann sig vel. Svo fundum við leiðina framhjá markverðinum þeirra þá breikkaði bilið mjög fljótt. Þetta var verðskuldaður sigur,“ sagði Akureyringurinn Guðmundur Hólmar Helgason leikmaður Vals. „Þeir eiga við meiðsli að stríða og eru ekki með breiðasta hópinn en þeir sem komu inn lögðu sig alla í þetta en það dró af þeim í seinni hálfleik,“ sagði Guðmundur Hólmar um sína gömlu félaga. „Öll stig eru ótrúlega mikilvægt. Það er gott að byrja árið svona. Það er mjög jákvætt.“ Að lokum eru hér fjögur viðtöl sem Lúther Gestsson tók og birtust á vefnum fimmeinn.is. Andri Snær: Það er ekki hægt að gera bara 4 mörk í seinni háfleik Andri Snær Stefánsson leikmaður Akureyrar var ánægður með margt í leik síns liðs og þá sérstaklega fyrri hálfeikinn. „Við stjórnuðum tempóinu algerlega í fyrri háfleik og vorum eiginlega óheppnir að vera undir einu marki í háfleik einkum vegna þess að við vorum að spila góða vörn.“ Andra fannst seinni hálfleikurinn vera mun lakari enda gerði liðið aðeins 4 mörk í þeim hálfeik og sagði Andri Snær að þeir hefðu verið í miklu ströggli og þá sérstaklega með Bubba markmann Vals. Sverre: Hefðum mátt nýta færin mun betur í seinni hálfleik Sverre Jakobsson þjálfari Akureyrar var nokkuð sáttur með leik sinna manna í kvöld og sagði að það sem hefði verið lagt upp með hefði gengið upp í fyrri hálfeik og það gæti hann verið ánægður með. Það hefði einfaldlega reynt á í seinni háfleik og lið sitt hefði ekki náð að sýna sömu gæði og mörg skot ekki verið góð. Einnig hefði liðið fengið slæman kafla í seinni hálfleik og það mætti kannski kenna smá orkuleysi um, en aðalega hefði verið hægt að nýta færin mun betur. Geir Guðmunds: Fríið búið að vera eins og annað undirbúningstímabil Geir Guðmundsson leikmaður Vals sagði að þrátt fyrir að liðið hefði ekki verið að sýna sinn besta leik hefði sigur í fyrsta leik eftir frí verið afskaplega mikilvægur. Sóknarleikurinn hefði verið hægur lengst af en vörnin hefði verið ágæt. Það hefði verið smá hökt í þessu enda fyrsti leikur og hann sagði að fríið hefði farið í talsvert þungar æfingar eins og lyftingar og fleira, þetta væri því eins og einskonar annað undirbúningstímabil. Óskar Bjarni: Mætingin hérna til háborinnar skammar Óskar Bjarni þjálfari Vals var nokkuð brattur eftir sigur gegn Akureyri í kvöld. Hann sagði Akureyringana hafa verið spræka og þeir hefðu stjórnað leiknum í fyrri háfleik og hrósaði Bernharð Antoni Jónssyni markverði Akureyringa mikið. Óskari fannst breiddin og varnarleikurinn hafa sigrað þetta fyrir Valsliðið í seinni hálfleik ásamt Bubba markverði. Óskar var þó mest óánægður með mætinguna í Valsheimilið og sagði að það þyrfti að fara í átak með hana.


Nú er kominn tími á að leggja Valsara að velli		2. febrúar 2016 - Akureyri handboltafélag skrifar Hasarinn hefst aftur á Hlíðarenda Handboltinn fer aftur af stað eftir jóla og EM frí með leik Vals og Akureyrar að Hlíðarenda þann 3. febrúar klukkan 19:00. Níu umferðir eru eftir af deildarkeppninni og því ljóst að mikilvæg stig eru í boði upp á röðunina fyrir úrslitakeppnina sem öllu skiptir. Lið Akureyrar byrjaði deildina ákaflega illa og tapaði fyrstu 5 leikjum sínum eins og frægt er orðið en liðið hefur heldur betur snúið genginu við og er nú ósigrað í síðustu 6 deildarleikjum. Akureyri er því í 6. sætinu og aðeins tveimur stigum frá 4. sætinu sem er síðasta sætið sem gefur heimaleikjarétt í úrslitakeppninni. Valsarar hafa leikið vel í vetur og sitja í 2. sætinu aðeins tveimur stigum frá toppsætinu. Liðið fór illa með okkar menn í 2. umferðinni þegar liðin mættust í KA-Heimilinu en þurftu að hafa mun meira fyrir því að leggja Akureyri að velli á Hlíðarenda. Nú er bara að vona að okkar menn komi vel undan pásunni og viðhaldi þeim krafti sem hefur verið í síðustu leikjunum fyrir hléið. Við hvetjum að sjálfsögðu alla til að mæta á leikinn og styðja okkar lið til sigurs, áfram Akureyri! Til að koma sér aftur í gírinn mælum við með að kíkja á nokkra takta Akureyrarliðsins það sem af er tímabili!

Til baka Senda á Facebook

Umsjón og hönnun: Stefán Jóhannsson og Ágúst Stefánsson

web statistics