Akureyri vann mikilvægan sigur á Fram - Akureyri Handboltafélag

Warning: Undefined array key "frettanr" in /web/akhandadmin/public_html/index.php on line 15
Akureyri vann mikilvægan sigur á Fram - Akureyri Handboltafélag


Fréttir - Leikir tímabilsins - Leikmenn - Stjórn - Saga og tölfræði - Höllin - Lagið - Myndir - Myndbönd - Tenglar
- Úrvalsdeild karla - Senda skilaboð - Vefur KA - Vefur Þór - Fréttaleit

Fyrri leiktímabil

Tímabilið 2014-15

Leikmenn meistarafl. karla

Ljósmyndir frá leiknum

Textalýsing frá leiknum

Tölfræði leiksins

		Fram - Akureyri 24-26 (12-13)
		Olís deild karla
		Framhús
		Sun 1. mars 2015 klukkan: 16:00
		Dómarar: Gísli Hlynur Jóhannsson og Hafsteinn Ingibergsson

Umfjöllun


Kristján Orri og Tomas léku frábærlega		1. mars 2015 - Akureyri handboltafélag skrifar Akureyri vann mikilvægan sigur á Fram Akureyri mætti suður í Safamýrina í dag og lék gegn Fram. Leikurinn var gríðarlega mikilvægur fyrir bæði lið enda eru Framarar í bullandi fallbaráttu og Akureyri að berjast við að sleppa við fallbaráttu og reyna að berjast um gott sæti í úrslitakeppninni. Heimamenn byrjuðu af miklum krafti og voru fljótir að refsa okkar mönnum fyrir slakan sóknarleik, eftir rúmlega sex mínútur var staðan orðin 5-1 og Atli Hilmarsson tók leikhlé. Leikhléið svínvirkaði og fjórum mínútum síðar var staðan orðin jöfn 5-5. Það sem eftir lifði fyrri hálfleiks voru liðin hnífjöfn og skiptust á að leiða leikinn. Uppstilltur sóknarleikur var brösugur hjá báðum liðum og Tomas í marki Akureyrar og Kristófer í marki Fram voru að verja vel. Mörkin voru því aðallega að koma úr hraðaupphlaupum og seinni bylgjum. Þegar flautað var til hálfleiks var staðan 12-13 fyrir Akureyri, Tomas varði 12 skot og Kristján Orri var með 6 mörk og það úr 6 skotum. Síðari hálfleikurinn spilaðist svo mjög svipað og sá fyrri, Akureyri reyndar byrjaði betur og komst í 12-15 en heimamenn gáfu þá í og stuttu síðar voru þeir komnir yfir í 17-16. Bæði lið voru að missa boltann klaufalega og varnirnar stóðu vel. Þegar kortér lifði leiks leiddu Framarar 20-18 en þá kom magnaður kafli hjá okkar mönnum og þeir breyttu stöðunni í 21-24 þegar lítið var eftir. Framarar gáfust þó ekki upp og náðu þeir tvisvar að minnka muninn niður í eitt mark á lokakaflanum en mörk frá Nicklas Selvig og Sigþóri Árna kláruðu dæmið og lokatölur voru því 24-26. Það munaði mikið um frammistöðu Tomasar í markinu og varnarleikinn sem liðið spilaði, það sem skóp þennan sigur í dag var hversu vel liðið varðist sem og karakterinn að koma alltaf til baka þegar Framarar náðu forystunni. Þetta var kannski ekki besti handboltaleikur sem liðið hefur spilað en það er ótrúlega mikilvægt og sýnir karakter að vinna svona leiki þegar það gengur ekki allt upp. Sverre hvetur sína menn til dáða í varnarleiknum Mörk Akureyrar: Kristján Orri Jóhannsson 9 (2 úr vítum), Nicklas Selvig 7, Heiðar Þór Aðalsteinsson 3, Ingimundur Ingimundarson og Sigþór Árni Heimisson 2 mörk hvor, Bergvin Þór Gíslason, Halldór Logi Árnason og Þrándur Gíslason allir með 1 mark. Tomas Olason með 21 varið skot, eitt vítakast eins og áður segir. Mörk Fram: Stefán Baldvin Stefánsson 9, Garðar B. Sigurjónsson 3 (2 úr vítum), Ólafur Jóhann Magnússon 3, Elías Bóasson 2, Ragnar Þór Kjartansson 2, Sigurður Örn Þorsteinsson 2, Kristinn Björgúlfsson Arnar Freyr Ársælsson og Arnar Freyr Arnarsson allir með 1 mark. Kristófer Fannar Guðmundsson átti góðan leik í Fram markinu og varði 14 skot, þar af 1 vítakast. Tvö gríðarlega mikilvæg stig í hús og nú getum við einbeitt okkur að því að reyna að ná sem bestu sæti fyrir komandi úrslitakeppni. Næsti leikur er heima gegn toppliði Vals og verður sá leikur á óvenjulegum leiktíma, sunnudaginn 8. mars í Íþróttahöllinni.


Tengdar fréttir
Erfiður leikur en mikilvæg stig		2. mars 2015 - Akureyri handboltafélag skrifar Ummæli eftir leikinn gegn Fram Það var heldur fámennt í stúkunni í Framhúsinu þegar Akureyri kom í heimsókn. Bikarmeistarar KA/Þór í 4. flokki kvenna áttu stúkuna og stóðu sig frábærlega. Það virðist líka hafa verið fámennt í blaðamannastúkunni því einungis tíðindamenn mbl.is og visir.is virðast hafa verið á staðnum og tekið viðtöl. Byrjum á viðtölum Skúla Unnars Sveinssonar á mbl.is en hann ræddi við Atla Hilmarsson, þjálfara Akureyrar og Stefán Baldvin Stefánsson markahæsta mann Fram liðsins: Atli: Gríðarlega mikilvæg stig „Þetta voru gríðarlega mikilvæg stig fyrir okkur, enda ætlum við okkur í úrslitakeppnina,“ sagði Atli Hilmarsson, þjálfari Akureyrar eftir 26:24 sigur liðsins á Fram í Olísdeild karla í handknattleik í Safamýrinni í dag. Atli sagði leikinn hafa veri köflóttan en sem betur fer hafi Akureyri náð að vera yfir þegar flautað var til leiksloka. „Byrjunin var ekki góð hjá okkur, lentum 5:1 undir, en tókum leikhlé og náðum að jafna. Síðan komumst við þremur mörkum yfir en það forskot fór á hálfri mínútu eða svo,“ sagði Atli Hann var ánægður með stuðninginn sem liðið fékk frá stúlknaflokki KA/Þór sem varð bikarmeistari fyrr í dag þar sem meistaraflokkur karla fylgdist með og stelpurnar launuðu þeim það með því að mæta í Safamýrina og styðja við bakið á þeim. Sjá nánar viðtalið við Atla hér að neðan: Stefán Baldvin: Þurfum að fara að safna stigum „Þetta féll ekki með okkur í dag, en mér fannst þetta betra hjá okkur en verið hefur að undanförnu, betri andi og meiri gleði,“ sagði Stefán Baldvin Stefánsson hornamaður Fram eftir tapið fyrir Akureyri í dag. „Við þurfum að fá fleiri mörk. Við höfum bara fengið eitt stig eftir áramótin og þetta fer að verða erfitt ef við förum ekki að fá einhver stig. Við þurfum að fara að safna stigum,“ sagði Stefán sem var markahæstur Framara með 9 mörk, flest úr hraðaupphlaupum, enda eldfljótur að skjóta sér upp kantinn. Blaðamaður visir.is, Ingvi Þór Sæmundsson ræddi við Ingimund Ingimundarson og Guðlaug Arnarsson þjálfara Fram: Ingimundur: Allt á mjög lágu plani Ingimundur Ingimundarson, leikmaður Akureyrar, var sáttur með stigin tvö sem Norðanmenn fengu fyrir sigurinn á Fram í dag. Og þar með var það upptalið. „Það er erfitt að segja hvað skildi á milli. Það var allt á mjög lágu plani hér í dag, verð ég að segja; handboltinn, allt sem fór fram á vellinum, Framarar hefðu örugglega viljað hafa fleiri í stúkunni og svo framvegis. Það var allt lélegt,“ sagði Ingimundur, en var ekki þeim mun mikilvægara að vinna leikinn í dag? „Jújú, við tókum þá aðeins á reynslunni. Og svo vorum við líka heppnir. Þetta var skref aftur á bak hjá okkur, frá síðustu tveimur leikjum (gegn Aftureldingu og Stjörnunni). En það jákvæða við þetta er að við bjuggum til smá svigrúm milli okkar og 9. sætisins. Það má samt ekkert gefa eftir, það er stutt niður á botninn,“ sagði Ingimundur að lokum. Ingimundur stóð fyrir sínu í vörninni í dag. Mynd: Andri Marinó/Vísir Guðlaugur: Þessi barátta mun skila okkur stigum á næstunni Guðlaugur Arnarsson, þjálfari Fram, var ánægður með margt í leik sinna manna í tapinu gegn Akureyri í dag. „Ég er fyrst og fremst hundsvekktur að tapa leiknum en ég er ofboðslega ánægður með baráttuna í mínum mönnum og varnarleikurinn var flottur í dag. Við töpuðum þessu á kaflanum í seinni hálfleik þar sem við vorum tveimur fleiri. Svo misstum við aðeins dampinn í sókninni síðustu tíu mínúturnar. En ég er stoltur af baráttunni og þessi barátta og þessi frammistaða mun skila okkur stigum á næstunni,“ sagði Guðlaugur sem var vitaskuld ánægður með hvernig hans lið kom inn í leikinn en eftir sjö mínútna leik var staðan 5-1, Fram í vil. „Það var góð vinnsla í vörninni. Við komumst í 5-1 en svo unnu þeir sig inn í leikinn með því að spila sína vörn og fá hraðaupphlaup. Þetta var svolítill varnarleikur í dag, en þeir fengu aðeins fleiri hraðaupphlaup sem skiptu miklu máli,“ sagði Guðlaugur. En hvernig fannst honum uppstilltur sóknarleikur Framara ganga í dag? „Hann var vandræðalegur á köflunum en inn á milli fengum við fín færi og tókum góðar ákvarðanir á móti sterkri vörn. Við þurfum aðeins að slípa sóknarleikinn,“ sagði Guðlaugur og bætti við: „Við erum að fá menn úr meiðslum. Elías (Bóasson) spilaði heilt yfir vel og meiddist ekki aftur sem er jákvætt,“ sagði Guðlaugur að lokum. Guðlaugur frekar alvörugefinn á hliðarlínunni í leik liðanna í Íþróttahöllinni fyrr í vetur


Guðlaugur Arnarsson, þjálfari Fram lék með Akureyri fyrir örfáum árum		27. febrúar 2015 - Akureyri handboltafélag skrifar Útileikur gegn Fram á sunnudaginn Um helgina er stóra bikarhelgin í gangi en þó að Akureyri hafi ekki náð í fjögurra liða úrslitin að þessu sinni þá á liðið engu að síður útileik á sunnudaginn. Leikur Fram og Akureyrar var sem sé færður til og er á dagskrá klukkan 16:00 á sunnudaginn í Framhúsinu í Safamýrinni. Liðin hafa mæst tvisvar í deildinni í vetur, fyrra skiptið var á heimavelli Fram þann 11. október og þar vann Akureyri góðan sex marka sigur, 17-23. Liði mættust svo aftur í Íþróttahöllinni 13. desember og þar vann Akureyri aftur, að þessu sinni með sjö mörkum 31-24. Framarinn Stefán Baldvin fer ekki svo létt í gegnum Ingimund og Þránd Bæði liðin hafa verið í miklu meiðslabasli í vetur og sér ekki fyrir endann á þeim málum. Nú er endanlega orðið ljóst að tímabilið er búið hjá Andra Snæ, fyrirliða Akureyrar vegna meiðsla sem hann hlaut í sigurleiknum gegn Aftureldingu þann 6. nóvember. Sama má trúlega segja um Stefán Darra Þórsson hjá Fram en hann ristarbrotnaði nýverið öðru sinni á tímabilinu. Í síðasta leik tapaði Fram illa fyrir ÍBV í Eyjum 30-18 þar sem Garðar Benedikt Sigurjónsson og Sigurður Örn Þorsteinsson voru markahæstir með 4 mörk hvor en Arnar Freyr Ársælsson og Ólafur Jóhann Magnússon með 3 mörk hvor. Þar á undan tapaði Fram á heimavelli fyrir HK 25-32 en í þeim leik skoraði Garðar 8 mörk og Ólafur Jóhann 4. Ef við förum örlítið aftar í tíma þá gerðu Fram og ÍBV hins vegar jafntefli í Framhúsinu 24-24 þann 12. febrúar þannig að það sýnir að Fram liðið er til alls líklegt. Í þeim leik var Stefán Baldvin Stefánsson markahæstur með 7 mörk og Garðar með 5 mörk. Þegar teknir eru saman allir leikir í deildinni þá er Benedikt markahæstur Framara með 80 mörk í 20 leikjum, Stefán Baldvin Stefánsson 67 og Sigurður Örn Þorsteinsson 66 mörk. Hjá Akureyri er Kristján Orri Jóhannsson markahæstur í deildarleikjum með 113 mörk úr 20 leikjum. Sigþór Árni Heimisson kemur næstur með 77 mörk úr 20 leikjum. Fyrir leikinn munar fimm stigum á liðunum, Akureyri með 18 stig en Fram með 13 og ljóst að bæði lið leggja allt í sölurnar til að ná stigunum sem eru í boði. Dyggum stuðningsmönnum þakkað þegar liði mættust í Safamýrinni Við hvetjum alla stuðningsmenn til að mæta í Safamýrina á sunnudaginn og styðja Akureyrarliðið til sigurs, leikurinn hefst eins og áður segir klukkan 16:00 og við reiknum með því að verða með beina textalýsingu hér á síðunni.

Til baka Senda á Facebook

Umsjón og hönnun: Stefán Jóhannsson og Ágúst Stefánsson

web statistics