Alfreð sigrar Magdeburg, Gummersbach með fullt hús

Í dag mættust Gummersbach og Magdeburg í þriðju umferð þýsku deildarinnar. Leikið var í Köln Arena fyrir framan 15.500 áhorfendur. Alfreð Gíslason mætti galvaskur með lið sitt gegn sínu fyrrverandi liði Magdeburg sem hann gerði að Þýskalandsmeisturum árið 2001 og vann Meistaradeild Evrópu árið 2002. Fyrir leikinn voru liðin með fullt hús stiga og mikið í húfi til að missa ekki Lemgo, Flensburg og fleiri fram úr sér.

Magdeburg byrjaði leikinn mikið mun betur og komst í 0-3 með mörkum frá van Olphen, Tkaczyk og Joël Abati. Gummersbach vaknaði þó fljótt eftir þessa slæmu byrjun og komst yfir í 5-4 þar sem Guðjón Valur og Róbert Gunnarsson skoruðu tvö mörk hvor. Eftir þetta hélt Gummersbach forystunni en Magdeburg var aldrei langt undan og í hálfleik var staðan 15-13 fyrir Gummersbach.

Stefan Kretzschmar fór fyrir Magdeburg í byrjun seinni hálfleiks og dreif liðið áfram. Eftir níu mínútna leik í seinni hálfleik voru staðan orðin 18-19 Magdeburg í vil, næstu mínútur voru æsispennandi þar sem liðin skiptust á að hafa eins marks forystu. Er sjö mínútur voru eftir hafði Gummersbach eins marks forystu, 25-24, en með frábærum kafla þar sem liðið skoraði fjögur mörk á móti einu marki Magdeburgar lögðu þeir grunninn að gríðarlega mikilvægum sigri, lokatölur voru Gummersbach 31 Magdeburg 26.

Guðjón Valur Sigurðsson var markahæstur í liði Gummersbach ásamt Daniel Narcisse með 7 mörk og þá skoraði Róbert Gunnarsson 2 mörk. Sverre Andreas Jakobsson stóð vaktina í vörninni og stóð sig með mikilli prýði.

Alfreð Gíslason var virkilega stoltur af sínu liði eftir leikinn og sagði að liðið hefði gefið allt í þessar 60 mínútur, þá var hann virkilega sáttur með að liðið hélt uppi hraðanum síðasta kortérið.

Næsti leikur Gummersbach er gegn meisturum Kiel í Ostseehalle sem er heimavöllur Kiel. Leikurinn fer fram 6. september og má búast við hörkuleik en Kiel eru með frábært lið. Eftir þrjár umferðir í deildinni eru Göppingen, Lemgo, Flensburg og Gummersbach með fullt hús stiga. Meistarar Kiel gerðu jafntefli í fyrstu umferð og hafa því misst af einu stigi.

Myndir úr leiknum:

Sverre að standa fyrir sínu í vörninni


Guðjón Valur að skora eitt af 7 mörkum sínum


Stefan Kretzschmar að fá tvær mínútur