Bubbi var með um 80% markvörslu og Andri gerði 9 mörk
| | 3. desember 2007 - Akureyri handboltafélag skrifarAkureyri rótburstaði Aftureldingu (umfjöllun)Í gær léku Akureyri Handboltafélag og Afturelding 2 (Júmboys) að Varmá í 8-liða úrslitum Eimskips Bikarsins. Fyrir leikinn hafði lið Aftureldingar slegið út úrvalsdeildarlið ÍBV og Fram 2. Lið Aftureldingar var mannað gömlum kempum sem gerðu Aftureldingu að Íslandsmeisturum. Það mátti því búast við hörkubaráttu.
Leikmenn Akureyrar mættu afar vel stemmdir til leiks og komust strax í 0-5. Afturelding náði að svara en Akureyri stöðvaði leikmenn Aftureldingar strax og bættu vel við forystu sína. Akureyri skoraði mikið af mörkum úr hraðaupphlaupum og Sveinbjörn Pétursson varði afar vel í markinu. Hálfleikstölur voru 4-20 fyrir Akureyri.
Í síðari hálfleik slakaði Akureyri aðeins á klónni og hleypti gömlu kempunum inn í leikinn. Er um það bil kortér var eftir af leiknum var staðan 11-30. Sá munur hélst til loka og lokatölur voru 20-39.
Andri Snær Stefánsson og Sveinbjörn Pétursson voru bestu menn Akureyrar í leiknum. Sveinbjörn var með rétt tæplega 80% markvörslu og greip meðal annars boltann frá Bjarka Sigurðssyni. Andri Snær var markahæstur með 9 mörk, Nikolaj Jankovic 8, Einar Logi Friðjónsson 7, Goran Gusic 5, Eiríkur Jónasson 3, Hörður Fannar Sigþórsson 3, Jónatan Magnússon 2, Ásbjörn Friðriksson 1 og Rúnar Sigtryggsson 1.
Hjá Aftureldingu 2 var Páll Þórólfsson bestur en hann sýndi ótrúlega takta á köflum og gerði heil 8 mörk, annars var markaskorun Aftureldingar þessi, Jón Andri Finnsson 6, Bjarki Sigurðsson 4, Þorkell Guðbrandsson 1 og Lárus Sigvaldason 1.
Frábær árangur hjá okkar mönnum að vera komnir áfram í Eimskips Bikarnum og allt getur gerst þegar í undanúrslitin er komið. Í kvöld kemur í ljós hvaða tvö lið fylgja Akureyri og Val í undanúrslitin og er öruggt að lið sem ekki leikur í úrvalsdeild mun komast í undanúrslit. |
Fréttir 
Þú flettir milli frétta með örvalyklunum eða smellir á bláu örvarnar!
Efst á síðu