2. flokkur: Enn frestun á heimaleik - Staðan í deildinni

Í dag, sunnudag áttu strákarnir í 2. flokki að spila sinn fyrsta bikarleik á tímabilinu. Stjarnan átti að koma hingað norður en ekkert varð af leiknum því á síðustu stundu óskuðu Garðbæingar eftir frestun á leiknum á þeim forsendum að nokkrir leikmanna þeirra ættu að fara í próf á morgun. Það er ekki laust við að Geir þjálfari liðsins sé búinn að fá sig fullsaddan af þessum hringlandahætti enda er þetta í annað skipti á þessu tímabili sem heimaleik 2. flokks strákanna er frestað að ósk sunnanliðanna sem virðast eiga í gríðarlegum erfiðleikum með að fylgja þeim áætlunum sem HSÍ gefur út, að minnsta kosti þegar kemur að því að mæta til leiks til Akureyrar.

Um næstu helgi eiga Akureyrarstrákarnir í 2. flokki tvo útileiki í Íslandsmótinu en þeir eiga leik gegn Aftureldingu klukkan 20:15 á föstudagskvöldið og gegn Selfossi klukkan 16:00 á laugardaginn. Spurning hvað HSÍ segir ef Akureyrarstrákarnir neita að mæta þar sem þarna glatast jú tveir dýrmætir dagar í prófalestri hjá nokkrum þeirra!

Annars er það af strákunum að frétta að þeir eru ásamt FH á toppnum í deildinni en bæði liðin eru með fullt hús stiga eftir að hafa leikið fimm leiki.

Staðan í deildinni hjá 2. flokki núna er sem hér segir:

Nr.	Félag	Leik	U	J	T	Mörk	Nett	Stig
1.	FH	5	5	0	0	175:118	57	10
2.	Akureyri	5	5	0	0	178:124	54	10
3.	ÍR	6	4	0	2	180:154	26	8
4.	Valur	5	3	1	1	150:137	13	7
5.	HK	5	2	1	2	158:144	14	5
6.	Stjarnan	5	2	1	2	147:143	4	5
7.	Haukar	5	1	2	2	139:150	-11	4
8.	Selfoss	4	2	0	2	120:104	16	4
9.	Fram	6	2	0	4	176:195	-19	4
10.	Víkingur	5	1	1	3	144:133	11	3
11.	Afturelding	5	1	0	4	128:166	-38	2
12.	Fjölnir	6	0	0	6	110:237	-127	0

Bjarni Jónasson sem hefur leikið mjög vel með liðinu í vetur varð fyrir því óhappi að fingurbrotna í síðasta leik liðsins gegn HK og verður hann frá æfingum og keppni í nokkrar vikur í viðbót.

Það verður forvitnilegt að fylgjast með því hvenær næsti heimaleikur strákanna fer fram, leikurinn sem átti að vera í dag hefur ekki verið fastsettur en samkvæmt leikjaskipulagi HSÍ ættu ÍR-ingar að koma hingað laugardaginn 13. desember en spurning hvort því sé að treysta. Viku seinna laugardaginn 20. desember er svo von á Fram til að spila leikinn sem þeir fengu frestað fyrr í haust.

Fletta milli frétta

Til baka

Senda á Facebook

Efst á síðu

Umsjón og hönnun:
Stefán Jóhannsson og Ágúst Stefánsson