Hvernig raðast leikirnir í lokaumferð N1 deildarinnar?

Eins og kunnugt er þá var fyrirkomulagi Íslandsmótsins hjá körlunum breytt á þann veg að nú eru leiknar þrjár meginumferðir og síðan fara fjögur efstu liðin í úrslitakeppni um sjálfan Íslandsmeistaratitilinn.

Í hverri meginumferð eru aftur sjö umferðir þar sem öll liðin leika innbyrðis. Lið sem fékk heimaleik í fyrstu meginumferð sækir hitt liðið heim í þeirri annarri o.s.frv. Strax í upphafi var birt leikjaskipulag fyrstu tveggja umferðanna en þriðja og síðasta meginumferðin ræðst svo af stöðu liðanna að lokinni annarri umferð.

Þar sem hvert lið leikur sjö leiki í hverri meginumferð er ljóst að þau geta ekki öll fengið jafnmarga heimaleiki. Reglan er sú að liðin sem sitja í efstu fjórum sætunum fá 4 heimaleiki á meðan neðri fjögur liðin fá 3 heimaleiki.
HSÍ hefur birt hvernig þetta mun raðast upp í 3. meginumferðinni og er kerfið eins og hér er lýst:

1. umferð: B:G, C:F, D:E og A:H
2. umferð: F:D, G:C, A:B og H:E
3. umferð: C:A, D:G, E:F og B:H
4. umferð: G:E, A:D, B:C og H:F
5. umferð: D:B, E:A, F:G og C:H
6. umferð: A:F, B:E, C:D og H:G
7. umferð: E:C, F:B, G:A og D:H

Liðið sem verður í efsta sætinu eftir tvær meginumferðir (14 leiki) verður er táknað með A, liðið í öðru sæti B og svo framvegis. Tökum sem dæmi að ef staðan í deildinni eftir tvær umferðir yrði eins og hún er núna (að loknum 12 leikjum) þá er Akureyri í 6. sæti og fær táknið F.

Staðan í deildinni er nú sem hér segir:

Nr.	Félag	Leikir	U	J	T	Mörk	Hlutfall	Stig		-
1. (A)	Fram	12	7	2	3	342 : 331	11	16	:	8
2. (B)	Haukar	12	8	0	4	344 : 310	34	16	:	8
3. (C)	Valur	12	6	3	3	330 : 288	42	15	:	9
4. (D)	FH	12	6	2	4	361 : 357	4	14	:	10
5. (E)	HK	12	5	3	4	320 : 327	-7	13	:	11
6. (F)	Akureyri	12	6	0	6	313 : 326	-13	12	:	12
7. (G)	Stjarnan	12	2	3	7	302 : 323	-21	7	:	17
8. (H)	Víkingur	12	1	1	10	309 : 359	-50	3	:	21

Þar með yrði leikjaniðurröðun Akureyrar sem hér segir:

1. umferð: Valur - Akureyri
2. umferð: Akureyri - FH
3. umferð: HK - Akureyri
4. umferð: Víkingur - Akureyri
5. umferð: Akureyri - Stjarnan
6. umferð: Fram - Akureyri
7. umferð: Akureyri – Haukar

Liðið fengi sem sagt þrjá heimaleiki í lokaumferðinni. Athugið samt að enn á liðið eftir að leika tvo leiki, útileik gegn Val og loks heimaleik gegn Fram áður en að endanleg uppröðun fer fram og að sjálfsögðu vonumst við til að liðið klifri ofar í deildinni og næli sér í fjóra heimaleiki.

Fletta milli frétta

Til baka

Senda á Facebook

Efst á síðu

Umsjón og hönnun:
Stefán Jóhannsson og Ágúst Stefánsson