Jón Þór var öflugur í dag
| | 7. nóvember 2009 - Akureyri handboltafélag skrifar2. flokkur: Góður sigur á Selfyssingum í dagÞað má segja að stálin stinn hafi mæst í dag þegar 2. flokkur Akureyrar og Selfoss mættust en bæði liðin eru líkleg til að berjast á toppi deildarinnar. Leikurinn fór fjörlega af stað og hraðinn var aðalsmerki beggja liða.
Jafnræði var með liðunum til að byrja með en Akureyri ávallt með frumkvæðið. Eftir stundarfjórðungsleik náði Akureyri þriggja marka forystu, 9-6 og með býsna örugg tök á leiknum. Mótlætið fór illa í Selfyssinga sem urðu stöðugt grófari í sínum leik þar til að á 23. Mínútu fékk þeirra öflugasti leikmaður, Ragnar Jóhannsson beint rautt spjald fyrir brot á Halldóri Loga.
Mestur varð munurinn í fyrri hálfleik 15-10 en Akureyri leiddi 17-14 í hálfleik.
Selfyssingar skoruðu fyrsta mark seinni hálfleiks en í kjölfarið komu fjögur mörk frá Akureyri og staðan orðin 21-15. Sá munur hélst áfram allt upp í stöðuna 27-21 en þó kom ótrúlegur leikkafli þar sem sóknarleikur Akureyrar skilaði engu á meðan að Selfyssingar gengu á lagið og skoruðu sex mörk í röð og jöfnuðu leikinn í 27-27 þegar tíu mínútur voru til leiksloka.
Í kjölfarið tók Geir Aðalsteinsson leikhlé sem skilaði góðum árangri. Akureyri skoraði næstu þrjú mörk og sigruðu síðan 33-31.
Fyrir utan kaflann í seinni hálfleik var sóknarleikur Akureyrar býsna góður, Halldór Logi fór mikinn á línunni, Jón Þór og Oddur góðir fyrir utan svo og Hlynur Matthíasson sem var mjög öflugur en þurfti að yfirgefa völlinn vegna meiðsla um miðjan seinni hálfleikinn.
Mörk Akureyrar: Jón Þór 8, Hlynur 7, Oddur 6 (2 víti), Halldór Logi 5, Alexander 2, Bjarni 2, Bergvin 2 og Halldór Örn Tryggvason 1 mark.
Í markinu stóð Siguróli lengst af í markinu og varði 9 skot, þar af eitt vítakast. Kristófer Mörtuson kom inná unir lok fyrri hálfleiks og aftur í lok seinni hálfleiks og átti fína innkomu, varði 5 skot og sömuleiðis eitt vítakast.
Strákarnir eru þar með komnir með fjögur stig, fullt hús en um næstu helgi halda þeir suður og leika þá tvo leiki við Hafnarfjarðarliðin Hauka og FH. |
Fréttir 
Þú flettir milli frétta með örvalyklunum eða smellir á bláu örvarnar!
Efst á síðu