Tveir leikmenn verða í banni þegar N1 deildin hefst á ný

Leikur Vals og Fram í síðustu viku hefur heldur betur dregið dilk á eftir sér. Upp úr sauð á lokamínútum leiksins og fékk Valdimar Fannar Þórsson beint rautt spjald fyrir brot en Reynir Þór Reynisson, þjálfari Fram lét óánægju sína með dómgæsluna í ljós eftir leikinn með þeim hætti að hann fékk sömuleiðis rautt spjald.

Mál þeirra voru tekin fyrir á fundi aganefndar HSÍ í dag og hlutu eftirfarandi afgreiðslu:

Fundur Aganefndar HSÍ, 21. des. 2010
Mættir voru Gunnar K. Gunnarsson, Rögnvald Erlingsson og Vala Valtýsdóttir. Eftirtalin mál lágu fyrir fundinum og voru afgreidd:

1. Valdimar Fannar Þórsson leikmaður Vals hlaut útilokun með skýrslu vegna grófs brots á síðustu mínútu í leik Vals og Fram í M.fl.ka. 16.12.2010. Niðurstaða aganefndar er að leikmaðurinn er úrskurðaður í eins leiks bann.
   
   
2. Reynir Þór Reynisson starfsmaður Fram hlaut útilokun með skýrslu vegna grófrar óíþróttamannslegrar framkomu eftir leik Vals og Fram í M.fl.ka. 16.12.2010. Niðurstaða aganefndar er að starfsmaðurinn er úrskurðaður í eins leiks bann.

Önnnur mál lágu ekki fyrir
Gunnar K. Gunnarsson formaður.

Þetta þýðir að þeir verða í leikbanni þegar N1 deildin hefst aftur þann 3. febrúar, Valdimar Fannar verður í banni þegar Valur sækir Akureyri heim og Reynir Þór mun ekki stýra sínum mönnum þegar FH mætir Fram í Safamýrinni.