Vefur Akureyrar Handboltafélags fyrir farsíma

Undanfarið höfum við verið að útbúa létta útgáfu af vefsíðunni og koma þannig til móts við lesendur okkar sem vilja geta fylgst með gangi mála í símanum sínum eða öðrum smátækjum. Nú er kominn tími til að setja farsímavefinn formlega í loftið og sjá hvernig til hefur tekist.

Í hausnum á aðalvefnum er komið tákn og tengillinn Farsímaútgáfa sem opnar símavefinn. Til að byrja með er vefurinn í fjórum hlutum:

• Fréttir - sem sýnir fréttayfirlitið og hægt að smella á fyrirsagnir til að lesa einstakar fréttir
• Úrslit - sýnir úrslit síðustu leikja Akureyrar
• Næstu leikir - sýnir komandi leiki félagsins
• Deildin - sýnir stöðuna í N1 deildinni, leiki næstu umferða ásamt öllum úrslitum

Í dag er jafnframt leikdagur og heimasíðan verður með beina textalýsingu sem mun uppfærast í fréttayfirliti aðalvefsins og jafnframt í fréttayfirliti farsímasíðunnar.

Við höfum reynt að gera þessa útgáfu þannig úr garði að hún sé sem léttust fyrir símana og þannig hagkvæm í rekstri. Símarnir eru mismunandi svo og spjaldtölvur en við vonumst til að vefurinn birtist eðlilega á öllum tegundum þó við höfum eðlilega ekki getað prófað nema nokkrar tegundir.

Þetta er sem sé fyrsta prófun á þessum vettvangi og örugglega munum við lagfæra eitt og annað og betrumbæta á næstu dögum.

Slóðin á farsímaútgáfuna er: http://akureyrihandbolti.is/m