Það duga engin vettlingatök gegn Frömmurum
| | 20. nóvember 2012 - Akureyri handboltafélag skrifarHeimaleikur gegn Fram á fimmtudaginnÞað er óhætt að segja að allir leikir N1-deildarinnar séu úrslitaleikir þar sem öll liðin eru að reita stig hvert af öðru, nema þá kannski Haukar sem hafa siglt býsna þægilega í gegnum deildina til þessa. Haukarnir lentu þó í tölvuverðu brasi í síðasta leik gegn baráttuglöðu liði Fram sem verða einmitt gestir okkar á fimmtudaginn.
Fram var reyndar án nokkurra lykilmanna í Haukaleiknum en með skynsömum leik og baráttu sýndu þeir að það er heilmikið spunnið í liðið og ungu strákarnir fullklárir í að skila sínu. Ólafur Jóhann Magnússon og Elías Bóasson fóru fyrir liðinu í markaskorun gegn Haukunum en báðir skoruðu fimm mörk í leiknum.
Ólafur er okkur að góðu kunnur en hann var í Íslandsmeistaraliði Akureyrar í 2. flokki í fyrravor.
Ólafur kemur engum vörnum við gegn Bjarna Fritzsyni í fyrri leik liðanna
Annar fyrrum liðsmaður okkar, Hákon Stefánsson (frá Fagraskógi) er farinn að leika með Framliðinu á nýjan leik.
Í bland við þessa ungu pilta eru reynsluboltar eins og t.d. markvörðurinn Magnús Gunnar Erlendsson sem var frábær í Hauka-leiknum, Haraldur Þorvarðarsonar á línunni og Stefán Baldvin Stefánsson hornamaður en allir áttu þeir góðan leik gegn Haukunum.
Væntanlega verða síðan stórkanónurnar, Jóhann Gunnar Einarsson og Róbert Aron Hostert komnar til baka úr meiðslum svo og galdramaðurinn Sigurður Eggertsson en þessir ásamt Þorra Birni Gunnarssyni hafa verið aðalmarkamaskínur Fram liðsins í vetur.   
Jóhann Gunnar, Róbert Aron, Þorri Björn og Elías
Liðin mættust í 2. umferð deildarinnar og þá náði Akureyrarliðið frábærum leik og vann góðan fimm marka sigur í Safamýrinni. Liðið sýndi einnig frábæra stemmingu í síðasta leik gegn FH og óhætt að lofa frábærri stemmingu í Höllinni á fimmtudagskvöldið.
Það er rétt að benda á að þetta er næstsíðasti heimaleikur Akureyrarliðsins í N1-deildinni á árinu þannig að bæði leikmenn og stuðningsmenn gera örugglega sitt besta til að halda uppi fjörinu. |
Fréttir 
Þú flettir milli frétta með örvalyklunum eða smellir á bláu örvarnar!
Efst á síðu