Leikur dagsins: FH - Akureyri frá sjónarhóli heimamanna


Fréttir - Leikir tímabilsins - Leikmenn - Stjórn - Saga og tölfræði - Höllin - Lagið - Myndir - Myndbönd - Tenglar
- Úrvalsdeild karla - Senda skilaboð - Vefur KA - Vefur Þór - Fréttaleit

Meistarafl. karla

Næstu leikir

Nýjustu úrslit

Stjarnan-Akureyri 28-23
Þri. 4. apr. 2017
Olís deild karla

ÍBV-Akureyri 22-22
Mið. 29. mar. 2017
Olís deild karla

Stjarnan U-Akureyri U 35-30
Fös. 7. apr. 2017
1. deild karla

Akureyri U-KR 34-30
Fös. 31. mar. 2017
1. deild karla

deildin staðan

Fréttir

Þú flettir milli frétta með örvalyklunum eða smellir á bláu örvarnar!


Þeir munu fá nóg að gera í kvöld		21. febrúar 2011 - Akureyri handboltafélag skrifar Leikur dagsins: FH - Akureyri frá sjónarhóli heimamanna Það er greinilegt að FH ingar leggja allt undir í leik kvöldsins þegar Akureyringar heimsækir þá í Kaplakrikann og óhætt að gera ráð fyrir hörkuleik. Hafnfirðingar ætla líkt og þegar liðin mættust í Hafnarfirðinum í fyrstu umferð N1 deildarinnar að bjóða öllum áhorfendum upp á grillaða hamborgara og lifandi tónlist með Matta og Draugabönunum. Gassi býður í grill! Klukkutíma fyrir leik mun framkvæmdastsjóri knattspyrnudeildar FH sem er enginn annar en Gassi (Gunnar Gunnarsson) fyrrum framkvæmdastjóri knattspyrnudeildar KA kveikja upp í grillinu og splæsa hamborgurum á jafnt norðanmenn sem og FH inga. Við hvetjum því alla stuðningsmenn Akureyrar Handboltafélags sem eru staddir á suðvesturhorninu til að drífa sig í Kaplakrikann og hita þannig vel upp fyrir bikarúrslitaleikinn næstkomandi laugardag. Á vef FH skrifar Árni Freyr Helgason athyglisverðan upphitunarpistil fyrir leikinn og er fróðlegt fyrir stuðningsmenn Akureyrar að kynnast hvernig Hafnfirðingar sjá hlutina fyrir sér: Upphitunarpistill FH inga Þriðja umferð N1-deildar karla hefst mánudaginn næstkomandi er FH og Akureyri eigast við í þriðja sinn á einni viku, að þessu sinni í íþróttahúsi okkar FH-inga í Kaplakrika. Leikirnir tveir fyrir norðan enduðu báðir með tapi, og þýddi seinna tapið að FH-ingar féllu niður í 4. sæti deildarinnar – einungis stigi á undan Haukum. Haukar eiga leik gegn botnliði deildarinnar, Selfossi, á sama tíma og FH-ingar leika gegn Norðanmönnum og má fastlega búast við sigri þeirra í þeirri viðureign. FH-ingar verða því að vinna sigur í Krikanum ef þeir ætla að halda í eitt af efstu fjórum sætunum. Nú er að duga eða drepast. Akureyri Akureyringar sitja sem fyrr í efsta sæti N1-deildar karla, nú með 6 stiga forskot á næsta lið. Þeir hafa unnið 12 leiki, gert eitt jafntefli en tapað einum leik og eru því með 25 stig. Norðanmenn eru orðnir FH-ingum nokkuð vel kunnir, enda hafa liðin mæst tvisvar í vikunni á heimavelli Akureyringa – Höllinni. Fyrri leikur liðanna, sem var í undanúrslitum bikarsins, endaði með þriggja marka sigri heimamanna (23-20). Seinni leikurinn, sem leikinn var í gærkvöldi, endaði með eins marks sigri Akureyringa, 25-24. Það má því segja að Akureyringar hafi hingað til haft tangarhald á FH-ingum, en þeir unnu einnig viðureign liðanna í Krikanum í nóvember. Fyrir þær sakir hljóta FH-ingar að mæta dýrvitlausir til leiks á mánudaginn. Akureyringar hafa yfir gríðarlega sterku byrjunarliði að skipa og er þar valinn maður í hverju rúmi. Fyrst skal nefna markverjuna Sveinbjörn Pétursson, sem hefur verið fremstur meðal jafningja í deildinni í vetur og var í æfingahóp landsliðsins fyrir HM sem fór fram í Svíþjóð í janúar. Hann reynist þeim ávallt drjúgur og á afar sjaldan slæman dag. Það var einmitt hann sem kom í veg fyrir að FH-ingar næðu jöfnunarmarki á síðustu mínútu leiksins í gærkvöldi, en alls varði hann 19 skot í leiknum. Hornamenn þeirra, Oddur Gretarsson og Bjarni Fritzson, eru ávallt fyrstir fram þegar skot andstæðinganna hafna í höndum markvarðarins og eru jafnan markahæstir í leikjum liðsins. Bjarni hefur þó upp á síðkastið leikið í hægri skyttu sökum veikinda hins efnilega Geirs Guðmundssonar, en hann greindist með blóðtappa í hægri handlegg í janúarmánuði og leikur því sennilega ekki með Akureyrarliðinu það sem eftir lifir leiktíðar. Það hlutskipti virðist henta Bjarna ágætlega, en hann var m.a.s. markahæstur í liði norðanmanna í gærkvöldið með 9 mörk. Daníel Einarsson, fyrrverandi leikmaður Stjörnunnar, hefur tekið stöðu hans í horninu. Í stöðu vinstri skyttu leikur hinn ungi og hæfileikaríki Guðmundur Hólmar Helgason, en hann er búinn að vera gríðarlega stöðugur með Akureyringum í vetur þrátt fyrir ungan aldur (Guðmundur verður 19 ára síðar á þessu ári). Hægra megin er svo Bjarni eins og áður segir. Í leikstjórnanda er Heimir Örn Árnason, fyrrverandi leikmaður Vals og Fylkis. Hann stýrir liði sínu eins og herforingi og skorar jafnan sinn skerf af mörkum. Þennan mann þarf að stoppa ef sigur á að vinnast. Síðan ber að nefna varnartröllið Guðlaug Arnarsson, sem stýrir gangi mála í illviðráðanlegum varnarleik Akureyrar. Hann ber einnig að varast í hraðaupphlaupum, en Guðlaugur leynir einmitt dálítið á sér þegar kemur að því að vera fyrstur fram. Baldvin skoraði 7 mörk í leik liðanna í deildarbikarnum Fyrri viðureignir liðanna 20. nóvember 2010, Kaplakrika: FH 25-33 Akureyri (N1-deildin) FH-ingar voru langt frá sínu besta í þessum leik, einkum í seinni hálfleik. Akureyringar voru mun grimmari og unnu að lokum verðskuldaðan 8 marka sigur, 25-33. Markahæstur FH-inga var Ólafur Gústafsson með 7 mörk en næstur honum kom nafni hans Guðmundsson með 6 mörk. Markahæstur í liði Akureyrar var Bjarni Fritzson með 9 mörk. 28. desember 2010, Strandgata: FH 29-26 Akureyri (Deildarbikar Flugfélags Íslands) Liðin mættust í úrslitaleik deildarbikarsins í íþróttahúsinu við Strandgötu, en þar áður höfðu FH-ingar slegið út Framara og Akureyringar slegið út Hauka í undanúrslitum. Leikurinn var jafn og spennandi, og náðu FH-ingar að landa sigri á lokamínútunum – vel studdir áfram af fjölmörgum og háværum FH-ingum. Ásbjörn Friðriksson og Baldvin Þorsteinsson skoruðu 7 mörk hvor fyrir FH-inga en Bjarni Fritzson og Heimir Örn Árnason skoruðu einnig 7 mörk hvor fyrir Akureyri. 14. febrúar 2011, Höllin Akureyri: Akureyri 23-20 FH (Eimskips bikar) FH-ingar voru í raun aldrei í takt við þennan leik. Akureyringar voru lengst af með stórt og gott forskot, en gáfu eftir síðasta korterið. Þá gengu FH-ingar á lagið og náðu mest að minnka muninn niður í eitt mark. Lengra komust þeir þó ekki og Akureyringar tryggðu sér sætið í úrslitaleik bikarsins á nokkuð þægilegan máta. Ólafur Guðmundsson og Ásbjörn Friðriksson voru markahæstir FH-inga í leiknum með 5 mörk hvor en í liði Akureyrar var Bjarni Fritzson markahæstur sem fyrr, en hann skoraði 8 mörk. 17. febrúar 2011, Höllin Akureyri: Akureyri 25-24 FH (N1-deildin) Það má í raun segja að þessi leikur hafi tapast í fyrri hálfleik, en FH-ingar áttu fá svör gegn sterkum varnarleik toppliðsins og klúðruðu þar að auki of mikið af færum. Akureyringar náðu mest 6 marka forskoti í síðari hálfleik, en þá gáfu FH-ingar í og náðu á ný að minnka muninn niður í eitt mark. Þeir höfðu tækifæri til að jafna leikinn en Sveinbjörn Pétursson varði vel og því lauk leiknum með eins marks tapi FH-inga, 25-24. Eins og svo oft áður voru þeir Ásbjörn Friðriksson og Ólafur Guðmundsson atkvæðamestir í liði FH, Ásbjörn skoraði 7 mörk en Ólafur skoraði 5 mörk. Þar að auki ber að minnast á flotta frammistöðu Pálmars Péturssonar í markinu í gær, en hann varði 16 skot. Markahæstur Akureyringa, eins og alltaf, var Bjarni Fritzson með 9 mörk. FH-ingar unnu sigur á Akureyri í deildarbikarnum FH FH-ingar sitja eftir leiki gærkvöldsins í 4. sæti deildarinnar með 17 stig, 8 stigum á eftir toppliði Akureyrar en einungis einu stigi á undan Haukum. Þeir hafa unnið 8 leiki, gert eitt jafntefli en tapað 5 leikjum. Eins og sagt var frá hér að ofan eiga Haukarnir auðveldan leik framundan á sama tíma og FH-ingar mæta Akureyri og því verður sigur að vinnast ætli strákarnir sér að halda í 4. sæti deildarinnar. Leikur FH-inga hefur verið upp og ofan á þessu tímabili. Tímabilið byrjaði með látum, eftir það kom dálítil lægð en svo náðu strákarnir sér hægt og bítandi á strik og náðu um áramótin að landa deildarbikarnum. Árið 2011 byrjaði svo sæmilega, FH-ingar gerðu jafntefli við Framara í hörkuleik í Safamýrinni og unnu svo í framhaldinu 10 marka stórsigur á liði Vals. Þar á eftir komu leikirnir tveir gegn Akureyringum, sem vart þarf að minnast meira á. Ólafur Guðmundsson hefur byrjað árið vel Í þeim leikjum þar sem að FH-ingar hafa verið að spila sem best hefur varnarleikurinn verið frábær, markvarslan góð og sóknarleikurinn hraður og frjór. Þá skora FH-ingar gjarnan mikið af hraðaupphlaupsmörkum, en þau eru gjarnan þekkt sem bestu mörkin sem hægt er að skora – bæði auðveld og áhrifarík. Í leikjunum tveimur gegn Akureyringum hefur þetta hins vegar vantað of stóran part af leikjunum og það verður að laga eigi sigur að vinnast. FH-ingar geta spilað mun betur og á góðum degi geta þeir vel unnið norðanmenn. Stuðningur áhorfenda er NAUÐSYNLEGUR í stórleikjum sem þessum En til þess að sigur vinnist verður stuðningurinn að vera góður. Það hefur margoft sýnt sig að stuðningur áhorfenda skiptir gríðarlega miklu máli – FH-ingar studdu vel við sína menn í deildarbikarnum í desember, enda vannst sigur þar. Á góðum degi, þegar Kaplakrikinn er þétt setinn af æstum stuðningsmönnum FH-liðsins, er enginn heimavöllur jafn erfiður heim að sækja. Enginn.
Fletta milli frétta	Til baka Senda á Facebook

Umsjón og hönnun: Stefán Jóhannsson og Ágúst Stefánsson