Guðmundur Hólmar var markahæstur í kvöld
| | 18. apríl 2011 - Akureyri handboltafélag skrifarAkureyri í úrslitarimmuna eftir góðan sigur á HKNú rétt í þessu lauk leik oddaleik Akureyrar og HK með þriggja marka sigri Akureyrar 28-25. Það er því ljóst að það verða Akureyri og FH sem mætast í úrslitarimmunni. Hér á eftir fer umfjöllun Snorra Sturlusonar fréttritara Sport.is frá leiknum:
Leikur Akureyrar og HK verður færður til bókar sem taugatrekkjandi háspennuleikur af bestu gerð, enda mikið í húfi og minnstu mistök dýrkeypt í meira lagi. Fyrri hálfleikurinn var hnífjafn nánast frá upphafi til enda, bæði lið spiluðu þéttan og grimman varnarleik á upphafsmínútunum og litlar hreyfingar voru á markatöflunni. Akureyringar léku án Guðlaugs Arnarssonar, sem verið hefur máttarstólpinn í vörninni, en hann lá heima með ælupest og því þurftu félagar hans að fylla í skarðið. Það gerðu þeir með bravör. Markverðir liðanna, Sveinbjörn og Björn Ingi, lögðu lóð sín á vogarskálarnar, vörðu báðir prýðilega framan af leiknum og það varð til þess að hleypa enn meiri taugatitringi í allar sóknaraðgerðir. Liðin héldust í hendur fram undir lok hálfleiksins, en þá náðu Kópavogsbúar tveggja marka forystu og gerðu vel, voru þolinmóðir í sókninni og fundu glufur þegar allt virtist vera að renna út í sandinn. Akureyringar svöruðu reyndar með góðum spretti í blálokin og jöfnuðu metin áður en hálfleikurinn var allur, 14-14.
Seinni hálfleikurinn einkenndist af rosalegri baráttu og frábærri frammistöðu Sveinbjörns Péturssonar í marki Akureyrar. Hann varði jafnt og þétt, tók nokkra erfiða bolta og úðaði jákvæðni í hæfilegum skömmtum yfir liðsfélaga sína. Menn voru rólegir í markaskorun á fyrstu mínútunum, en síðan tóku Akureyringar rykk og skoruðu tvö mörk í röð, komust í 20-18, og þessi stutti kafli hafði afgerandi áhrif á gang mála. HK-ingar náðu að minnka muninn í eitt mark, en lentu hvað eftir annað í vandræðum með hrikalega sterka vörn heimamanna og Sveinbjörn í markinu. Varnarleikur Akureyringa var til hreinnar fyrirmyndar í seinni hálfleik, menn voru hrikalega einbeittir og færslan var frábær. Guðmundur Hólmar var ofboðslega sterkur í sókninni, skoraði næstum því að vild og dró vagninn af miklum myndarskap. Akureyringar náðu þriggja marka forystu, 24-21, þegar rúmar sjö mínútur voru til leiksloka og þetta 24. mark lagði línurnar. HK-ingar náðu ekki að rétta sinn hlut þrátt fyrir einbeittan vilja. Ólafur Bjarki, sem átti flottan leik, dúndraði í stöng úr vítakasti þegar rúmar fjórar mínútur voru eftir og staðan 25-22 og þar með var sagan öll. Síðustu mínúturnar voru spennandi, það er hreinlega ekki í karakter HK-inga að gefast upp og þeir fá stóran plús í kladdann fyrir það hvernig þeir nálguðust þetta verkefni. Þeir voru ekki fjarri því að slá á spár spekinga, en urðu að lokum að játa sig sigraða. Lokatölur í Höllinni urðu 28-25 fyrir Akureyri.
Deildarmeistarar Akureyrar eru komnir í úrslit N1-deildar karla og mæta þar FH, en þeir þurftu svo sannarlega að hafa fyrir hlutunum gegn HK-ingum.
Mörk Akureyrar: Guðmundur Hólmar Helgason 8, Bjarni Fritzson 6 (2 úr vítum), Oddur Gretarsson 5 (1 úr víti), Daníel Einarsson 3, Heimir Örn Árnason 3, Hreinn Hauksson 2 og Hörður Fannar 1.
Sveinbjörn varði 20 skot, þar af eitt vítakast, Stefán Guðnason reyndi við tvö víti og þar af fór annað þeirra í stöngina.
Mörk HK: Ólafur Bjarki Ragnarsson 12 (5 úr vítum), Leo Snær Pétursson 3, Bjarki Már Elísson 2, Atli Backmann 2, Vilhelm G. Bergsveinsson 2, Sigurjón Björnsson 1, Bjarki Már Gunnarsson 1, Daníel Berg Grétarsson 1, Atli Ævar Ingólfsson 1.
Björn Ingi Friðþjófsson varði 10 skot og Andrés Örn Aðalsteinsson 4. |
Úrvalsdeild karla
Senda skilaboð
Vefur KA
Vefur Þór
Fréttaleit
Þú flettir milli frétta með örvalyklunum eða smellir á bláu örvarnar!