Fréttir  -  Leikir tímabilsins  -  Leikmenn  -  Stjórn  -  Saga og tölfræði  -  Höllin  -  Lagið  -  Myndir  -  Myndbönd  -  Tenglar
  - Úrvalsdeild karla - Senda skilaboð - Vefur KA - Vefur Þór - Fréttaleit
Meistarafl. karla
Næstu leikir
Nýjustu úrslit
Stjarnan-Akureyri 28-23
Þri. 4. apr. 2017
Olís deild karla
ÍBV-Akureyri 22-22
Mið. 29. mar. 2017
Olís deild karla
deildin staðan

Ungmennalið karla
Næstu leikir
Nýjustu úrslit
Stjarnan U-Akureyri U 35-30
Fös. 7. apr. 2017
1. deild karla
Akureyri U-KR 34-30
Fös. 31. mar. 2017
1. deild karla
deildin staðan
    Fréttir                       Þú flettir milli frétta með örvalyklunum eða smellir á bláu örvarnar! 

Bjarni fagnar frábærum leik gegn FH

21. apríl 2012 - Akureyri handboltafélag skrifar

Viðtöl við leikmenn og þjálfara eftir leikinn á föstudaginn

Að sjálfsögðu voru blaðamenn tilbúnir til að grípa leikmenn og þjálfara liðanna í viðtöl strax að loknum leik Akureyrar og FH á föstudagskvöldið. Við byrjum hér á viðtölum Andra Yrkils Valssonar á mbl.is, hefjum þetta á viðtali við markvörðinn geðþekka Stefán Guðnason sem fór einmitt á kostum á lokasekúndum leiksins.


Stefán Guðnason: Stemningin ávallt góð

„Stemningin á bekknum er ávallt mjög góð,“ sagði hinn síkáti Stefán Guðnason, markvörður Akureyrar, eftir sigur liðsins á FH, 25:18. Stefán er gríðarlega vinsæll hjá stuðningsmönnum liðsins, en hann kemur jafnan inn þegar skammt er eftir og leysir þá Sveinbjörn Pétursson af á milli stanganna. Stefán skilur þó oft ekkert í kollega sínum.


Stefán Guðnason frábær á hliðarlínunni

„Þegar Sveinbjörn kemur til manns og segir manni að skipta við sig eftir að hafa fengið á sig 12 mörk á 50 mínútum eins og í þessum leik á maður ekki orð. Hvað á maður að segja við svona vitleysing? Að standa sig svona vel og það í úrslitaleik, en biður um skiptingu. Það er náttúrlega hrikalega gaman að honum. Hann tekur svo marga mikilvæga bolta að það er hreint með ólíkindum. Ótrúlegur karakter. Ef hann verður ekki maður leiksins eftir þetta þá þarf ég nú að fara að ræða við ákveðna menn,“ sagði Stefán glettinn.

Hann lætur þó ekki sitt eftir liggja á hliðarlínunni. „Það er alltaf gaman hjá heilögu þrenningunni, en það erum ég, Jón Heiðar og Daníel. Jón Heiðar fékk nú reyndar að spila eitthvað núna svo það er bara heilaga „tvenningin“ núna. En það er líka gríðarlega gaman að fylgjast með svona leik. Við vorum góðir varnarlega sem bætti upp fyrir rólegan sóknarleik á köflum. En nú erum við búnir að stimpla okkur inn. Við vorum óheppnir í fyrsta leiknum en erum að senda skýr skilaboð núna að við munum fylgja þeim fast á eftir suður fyrir næsta leik,“ sagði Stefán.

Samstarf hans og Sveinbjörns er greinilega gott og eru þeir duglegir að styðja hvor annan. Stefán segir það gríðarlega mikilvægt. „Já, þetta gengur mjög vel hjá okkur. Ég þurfti reyndar að spila heldur mikið í síðasta leik svo ég er eiginlega með strengi ennþá eftir það. Það væri því ágætt ef minn spilakvóti í þessu einvígi væri búinn núna og ég styð Bubba bara af bekknum,“ sagði Stefán Guðnason, markvörður Akureyrar, skælbrosandi í leikslok.

Bjarni Fritzson: Tóku sig saman í andlitinu

„Við tókum okkur bara saman í andlitinu eftir skelfilega byrjun og það skilaði sér. Það tók smá tíma hjá dómurunum að finna línuna, þetta er úrslitaeinvígi og þeir leyfa ósjálfrátt aðeins meira sem er bara flott og ekkert út á það að setja. En það skiptir miklu fyrir okkur að hafa alla þessa áhorfendur, stuðningurinn er ómetanlegur.“


Bjarni fagnar einu af 10 mörkum sínum

Baráttan var allsráðandi í þessum leik og ekkert gefið eftir. Leikir þessara liða hafa yfirleitt verið mjög jafnir enda liðin álíka sterk. Það voru því líklega fáir sem spáðu því að annað liðið myndi tryggja sig örugglega í úrslitaeinvígið enda kom það á daginn. Akureyringar hafa hins vegar lítinn tíma til þess að fagna, en næsti leikur í einvíginu fer fram á sunnudag.

„Það er örstutt í næsta leik, ég þakka HSÍ fyrir það. En þetta eru allt ótrúlega erfiðir leikir gegn FH-ingum sem eru með frábært lið og ég reikna með að Krikinn verði alveg pakkaður á sunnudaginn. Það gerir þetta bara ennþá skemmtilegra,“ sagði Bjarni. Mikið gekk á í herbúðum Akureyrar fyrir úrslitakeppnina. Þjálfaraskipti voru tilkynnt fyrir næsta tímabil þar sem þeir Bjarni og Heimir Örn Árnason munu taka við liðinu, auk þess að leika með því áfram.

„Þetta er mjög spennandi verkefni. Þegar þetta var nefnt við okkur varð maður pínu hissa en eftir að hafa hugsað um þetta þá ákváðum við að slá til. Svo það má segja að þetta hafi bæði verið lengi í spilunum en einnig komið á óvart,“ sagði Bjarni Fritzson

Einar Andri Einarsson: Misstum taktinn

„Við byrjuðum leikinn af miklum krafti og spiluðum mjög vel í upphafi. Eftir það misstum við taktinn og spilamennskan fór dalandi,“ sagði Einar Andri Einarsson, annar þjálfara FH, eftir ósigurinn gegn Akureyri, 25:18.

Lærisveinar Einars byrjuðu leikinn vel og náðu fljótt góðu forskoti. Þegar Akureyringar vöknuðu til lífsins gekk hins vegar ekkert upp hjá Hafnfirðingum. „Það kannski kom okkur á óvart hvað við byrjuðum vel. Við áttum von á því að Akureyringar myndu nú koma sér fljótt inn í þetta. Vörnin og markvarslan var mjög góð á þeim kafla en svo fórum við að missa menn af velli og missum þar með taktinn. Það hélt áfram í síðari hálfleik þar sem við vorum mjög slakir bæði varnarlega og sóknarlega.“


Einar Andri fylgist með orðaskiptum Heimis og Pálmars markvarðar FH

Einar segir að nú komi ekkert annað til greina en að gleyma þessum leik og einbeita sér að næsta, sem fer fram á sunnudag. „Liðin eru það jöfn að ég held að enginn hafi búist við því að annað liðið myndi sigla örugglega áfram úr þessu einvígi. Staðan er bara 1-1 og það skiptir ekki neinu máli hvernig leikirnir fara. Við unnum í framlengingu síðast en þeir sigla þessu örugglega í hús núna en það er bara jafnt á tölum. En nú er bara nýtt einvígi og við munum bara fara yfir þennan leik og munum mæta mjög beittir fyrir framan okkar stuðningsmenn á sunnudag,“ sagði Einar Andri Einarsson í leikslok.

Að þessu sinni var það Birgir H. Stefánsson sem var fréttaritari Vísis í Höllinni. Hann ræddi við Atla Hilmarsson, Sveinbjörn Pétursson og Einar Andra eftir leikinn.

Atli Hilmarsson: Gekk betur eftir að við róuðum okkur

„Við vorum grimmir í upphafi en greinilega eitthvað pirraðir,“ sagði Atli Hilmarsson, þjálfari Akureyrar. „Við gerðum fullt af mistökum, bæði í vörn og sókn, sem mér finnst vera sjaldséð hjá okkur. Um leið og við fórum svo að róa okkur niður og halda okkar skipulagi fór þetta að ganga betur.


Atli fer yfir málin með sínum mönnum í leikhléi

Við vorum að fá þessi hraðaupphlaupsmörk sem okkur vantaði í Krikanum í fyrsta leiknum. Við vorum svo grátlega nálægt þessu þar - hefðum við fengið okkar hraðaupphlaup þá hefðum við unnið þann leik.

Sveinbjörn Pétursson: Mómentið með okkur

„Þetta er mikill léttir, ég hélt að leikurinn ætlaði aldrei að verða búinn. Við vorum komnir með góða forystu og það stefndi í að við værum að fara að sigla þessu heim. Ég er virkilega ánægður með fókusinn hjá mönnum. Það var alveg sama hver kom inn hjá okkur í dag, það voru allir fókuseraðir algjörlega á verkefnið,“ sagði Sveinbjörn Pétursson, markvörður Akureyrar.

„Mómentið bara datt hjá mér. Ég var ekki góður fyrir sunnan og ekki góður fyrstu 15-20 mínúturnar í þessum leik. Liðið átti því talsvert inni hjá mér. Stundum bara smellur þetta og ég náði að koma með sama krafti inn í seinni hálfleikinn en það má ekki taka neitt af vörninni. Þvílík vinna hjá þeim og þeir voru að neyða þá í erfið skot sem ég hirti bara upp. Það vantaði lítið upp á að þetta gengi upp í síðasta leik en það gekk upp í dag og við mætum bara bjartsýnir inn í næsta leik á sunnudaginn. Núna er mómentið með okkur.


Sveinbjörn ver víti í leiknum gegn FH

Í dag var allt annað upp á teningnum. Við spiluðum frábæra vörn ef við tökum þessar upphafsmínútur frá og það var með ólíkindum að okkur tókst bæði að jafna metin og komast yfir áður en fyrri hálfleik lauk.“

Einar Andri: Hættum að spila sem lið

Einar Andri Einarsson, annar þjálfara FH, átti erfitt með að koma auga á hvað hafi klikkað eftir góða byrjun sinna manna í leiknum. „Við vorum mjög einbeittir og spiluðum rosalega vel í tólf mínútur,“ sagði hann. „Vörnin var að virka og markvarslan frábær. Akureyringar voru líka að spila illa á þeim tíma þannig að það var alveg vitað þetta myndi jafnast út.

En það er ekki gott að segja hvað gerðist svo. Við hættum að spila sem lið og gerðum of mikið af mistökum. Sveinbjörn varði mjög vel og í mörgum dauðafærum. Sóknarleikur okkar var alls ekki nógu góður en markvarsla Sveinbjarnar hjálpaði ekki til. Við bara bökkuðum undan þeim og þurftum að skjóta lengra frá og þess vegna var þetta erfitt.

Við munum klárlega koma beittari til leiks á okkar heimavelli í Krikanum. Við þurfum að fara yfir nokkra hluti - ekkert sem er óyfirstíganlegt. Við þurfum að skerpa á nokkrum hlutum og þá munum við spila vel á sunnudaginn.“

Vídeóviðtöl af sport.is




Fletta milli frétta Til baka    Senda á Facebook
Umsjón og hönnun: Stefán Jóhannsson og Ágúst Stefánsson