Útileikjatörn hjá öllum flokkum um helgina

Það er óhætt að segja að leikmenn Akureyrar Handboltafélags verði á faraldsfæti um helgina. Meistaraflokkur mætir ÍR í Austurbergi á laugardaginn klukkan 15:00 í algjörum úrslitaleik um sæti í úrslitakeppninni í vor. ÍR er í 4. sæti þrem stigum á undan Akureyri sem er í 5. sætinu. Með sigri heldur Akureyri í vonina um að ná 4. sætinu en með tapi er vonin nánast úr sögunni.
Leikurinn verður í beinni útsendingu á RÚV

2. flokkur
Það er líka strangt prógram hjá báðum liðunum í 2. flokki. Akureyri 1 mætir FH klukkan 17:30 á föstudaginn í Kaplakrika. FH er sem stendur efst í 1. deildinni og hefur ekki tapað leik. Þegar liðin mættust hér á Akureyri gerðu þau jafntefli 30-30.

Klukkan 18:00 heldur Akureyri 1 í Mosfellsbæinn og leikur við heimamenn í Aftureldingu. Akureyri vann heimaleikinn 29 – 24.

Akureyri 2 leikur sömuleiðis tvo leiki í 2. deildinni. klukkan 19:30 á föstudag mæta þeir HK í Digranesi. HK er taplaust í efsta sæti deildarinnar þannig að það er ekki ráðist á garðinn þar sem hann er lægstur. Akureyri 2 og HK mættust á Akureyri um síðustu helgi og þar fór HK með eins marks sigur eftir að Akureyi 2 hafði verið með sex marka forystu í hálfleik.

Á laugardaginn klukkan 12:00 mætir Akureyri 2 síðan Víkingum. Stutt er síðan liðin léku tvo leiki á Akureyri þar sem Akureyri vann þægilega sigra báðum leikjum. Það er þó ekkert gefið í boltanum og strákarnir verða að mæta af fullum krafti í þennan leik.

Strákarnir í 2. flokki ætla síðan að fjölmenna á leik Akureyrar og ÍR í meistaraflokki á laugardaginn og halda uppi baráttustemmingu á pöllunum.

Við minnum stuðningsmenn á að fulltrúar Akureyrar verða með forsölu á bikarleikinn gegn Stjörnunni í Austurbergi í tengslum við leikinn gegn ÍR.