Sverre lítur yfir ferilinn - 3. hluti - Akureyri Handboltafélag


Fréttir - Leikir tímabilsins - Leikmenn - Stjórn - Saga og tölfræði - Höllin - Lagið - Myndir - Myndbönd - Tenglar
- Úrvalsdeild karla - Senda skilaboð - Vefur KA - Vefur Þór - Fréttaleit

Meistarafl. karla

Næstu leikir

Nýjustu úrslit

Stjarnan-Akureyri 28-23
Þri. 4. apr. 2017
Olís deild karla

ÍBV-Akureyri 22-22
Mið. 29. mar. 2017
Olís deild karla

Stjarnan U-Akureyri U 35-30
Fös. 7. apr. 2017
1. deild karla

Akureyri U-KR 34-30
Fös. 31. mar. 2017
1. deild karla

deildin staðan

Fréttir

Þú flettir milli frétta með örvalyklunum eða smellir á bláu örvarnar!


Sverre endaði leikmannaferilinn með Akureyri og er nú alkominn í þjálfunina		16. september 2015 - Akureyri handboltafélag skrifar Sverre lítur yfir ferilinn - 3. hluti Þá er komið að lokahluta viðtalsins við þjálfarann okkar hann Sverre Andreas Jakobsson um leikmannaferil sinn. Ef þú hefur ekki lesið fyrstu tvo hlutana þá mælum við endregið með því að renna yfir það sem þessi mikli kappi hefur afrekað. Sverre lítur yfir ferilinn - 1. hluti Sverre lítur yfir ferilinn - 2. hluti Þú tekur svo fimm ár með Grosswallstadt, hvernig var að fara aftur út í atvinnumennsku? Ég fann að mig langaði að fara aftur út, hafði talað við önnur lið eins og Magdeburg og Füchse Berlin en það gekk ekki upp. Svo fyrir tilviljun var þjálfari Magdeburgar að fara að taka við Grosswallstadt eftir eitt ár og hann bað félagið um að fá mig. Þeir byrjuðu á að bjóða mér samning sem tæki gildi eftir ár en aðeins tveimur tímum síðar hættu þeir við þann samning og vildu fá mig strax. Sáu að vörnin var ekki nægilega góð og vildu fá hana í lag sem fyrst og sáu mig sem hugsanlega lausn á því. Einar Hólmgeirs var í liðinu þegar ég mætti sem var skemmtilegt en ég var líka mjög spenntur fyrir krefjandi verkefni. Liðið hafði fengið á sig yfir 30 mörk að meðaltali í leik og ég hafði það hlutverk að stoppa í það gat. Tíminn með liðinu byrjaði mjög vel, liðið var gott og stemningin fín. Við vorum með háleita drauma, komumst í evrópukeppni, sláum stigamet félagsins í efstu deild þannig að þetta fyrsta ár var frábært. Næsta ár var líka mjög gott en eftir það urðum við svolítið litaðir af vandræðum innan klúbbsins og þá sérstaklega peningavandræði. Við þurftum að selja bestu leikmenn okkar og fá slakari spilara inn útaf fjárhagnum. Gengið var því ekki eins gott sem endaði síðan með falli úr Bundesligunni sem er það erfiðasta sem ég hef upplifað sem leikmaður. Ég var fyrirliðið liðsins sem jók á álagið á mér, það fór einhvernveginn allt úrskeiðis á þessu tímabili sem við föllum. Einn mánuðinn töpuðum við öllum leikjunum með einu marki, allt í allt töpuðust átta leikir með minnsta mun. Síðasta sóknin mislukkaðist alltaf hjá okkur sem kom í veg fyrir að stigasöfnunin varð ekki meiri. Klúbburinn náði að lifa þetta af á þeim tíma og þá byrjaði uppbygging sem því miður hefur ekki tekist og liðið þurfti að fara í gjaldþrotaskipti nú nýlega. En tíminn að búa á svæðinu var æðislegur, magnað að búa þarna í Grosswallstadt, var einn af fáum leikmönnum sem gerði það, og fékk ég því að kynnast fólkinu vel í kringum allt þarna. Sverre í búning Grosswallstadt Það fer ekkert á milli mála að þú ert mikils metinn af stuðningsmönnum í Þýskalandi, það berast til dæmis reglulega kveðjur til Akureyrar frá stuðningsmönnum þínum Já gaman af því, tókst einhvernveginn á báðum stöðum í Þýskalandi að ná vel til stuðningsmanna. Þetta er svo sem ekkert flókið, bara að vera almennilegur við fólkið sitt og það kunna allir að meta. Þjóðverjarnir kunna líka að meta vinnusemi og baráttu, sem varnarmaður sýnir maður nóg af báðu sem hjálpaði væntanlega til að ná til hjarta stuðningsmannanna! Sverre að stöðva stórskyttuna Filip Jicha Þá komum við að Ólympíuleikunum í London 2012 þar sem ég vil meina að landsliðið hafi spilað sinn besta bolta í sögunni þangað til að kom að Ungverjaleiknum í útsláttarkeppninni, hvernig voru þeir leikar og hvernig er að hugsa til baka eftir að hafa sigrað meistara mótsins? Við spiluðum fyrstu fimm leikina á mótinu alveg svakalega vel og unnum Frakkana til að mynda. Sjálfstraustið og samheldnin í hópnum var svakaleg, við höfðum æft mjög vel um sumarið og markmiðið var alveg ljóst, við ætluðum okkur aftur í úrslitaleikinn. Eftir að hafa unnið alla leikina í riðlinum vorum við alveg sannfærðir um að við gætum farið alla leið. Svo kom þessi leikur við Ungverja í 8-liða úrslitum sem var ábyggilega mjög skemmtilegur leikur að fylgjast með, jafn allan tímann og mikil spenna. En það var eins og þetta ætti ekki að gerast hjá okkur og það var svakalega erfitt að reyna að kyngja því tapi og enn í dag er maður ekki búinn að ná sér og mun líklega aldrei ná því. Stóri munurinn á Peking og London var í rauninni sá að við unnum réttu leikina í Peking en í London kom tapið akkúrat á því augnabliki sem það mátti ekki koma. Hér má sjá nokkur varnartilþrif hjá okkar manni Svo endarðu leikmannaferilinn á heimaslóðum með Akureyri og spilar á HM í Katar, ertu sáttur með lokaárið sem leikmaður og upphafið á þjálfaraferlinum? Ég er mjög sáttur með endann á leikmannaferlinum, ég ætlaði reyndar ekki að spila þegar ég kom aftur heim en var á endanum sannfærður um að spila. Eftir á að hyggja hefði verið alveg hræðilegt að spila ekki, ég naut þess miklu meira að spila með Akureyri en ég hélt og gaman að enda þetta á sama stað og þetta byrjaði allt saman. Strákarnir voru frábærir og sýndu mikinn karakter yfir tímabilið þó einhverjir telji kannski árangurinn undir væntingum. Ég tel mig svo reyndar alveg geta haldið áfram að spila, viljinn er allavega enn til staðar en einhvern tímann þarf að finna lokapunktinn. Sverre fagnar með Kristjáni Orra Þetta síðasta tímabilið einkennist auðvitað af hrikalegum meiðslavandræðum hjá Akureyri sem skemmir að miklu leiti tímabilið. Já, við vorum mjög litaðir af meiðslum og ég er sannfærður um það að við hefðum náð meira útúr liðinu ef við hefðum ekki misst mikið af mönnum reglulega í meiðsli. Vorum mjög litaðir af meiðslum frá október og allt til enda. Þetta var svakalega erfitt á tíma en sýnir samt hvað býr í hópnum að menn héldu alltaf áfram, mórallinn var alveg frábær allt í gegn og allir tilbúnir til að berjast fyrir félagið. Ótrúlegur leiðtogi hann Sverre Þegar litið er yfir þennan glæsilega feril, allir titlar sem hægt er að vinna á Íslandi, leikið með stórliði í bestu deild í heimi, 182 landsleikir, silfur á Ólympíuleikum og brons á Evrópumóti. Hvaða augnablik eru eftirminnilegust eða hvaða sigur er sætastur? Það að leika í bestu deild í heimi og ná að festa sig í sessi þar sem leikmaður er auðvitað mjög skemmtilegt að hafa afrekað. Ég tók auðvitað annan snúning heldur en flestir með því að hætta í handbolta og koma svo að því er mér finnst ferskur aftur og fór þá að ná mínum stærstu markmiðum sem leikmaður. Líka mjög gaman að hafa náð því að spila í Meistaradeild Evrópu. Það er alltaf stórt augnablik að klæða sig í landsliðstreyjuna og að spila á 10 stórmótum er mikill heiður og í raun forréttindi, það er eitthvað sem ég mun búa að alla ævi. Í raun er engin eftirsjá fyrir utan að hafa kannski ekki komist í enn stærra lið enda tel ég mig hafa haft getuna í það sem kristallast í árangrinum með landsliðinu. En jú Ungverjaleikurinn er auðvitað eitthvað sem auðvelt er að hugsa til, hvað ef við hefðum klárað hann hvernig hefði það mót endað? Sverre einbeitir sér nú að miðla af reynslu sinni og þjálfa upp ungt lið Akureyrar Nú er svo komið að því að einbeita sér að þjálfun Akureyrar, hvernig líst þér á veturinn og á nú að demba sér í þjálfunina? Mér líst mjög vel á þetta, algjörlega nýtt fyrir mér og ég vil læra. Mitt markmið er að hjálpa ungum leikmönnum til að verða betri sem vonandi gerir það að verkum að þeir geti uppfyllt sína drauma. Hópurinn er mjög skemmtilegur, umhverfið er líka skemmtilegt þannig að ég er bara mjög spenntur að halda utan um þetta. Við þurfum samt auðvitað að líta raunsætt á hlutina, við höfum misst menn og erum að byggja á ungum leikmönnum. Stóra markmiðið er því að tengja meistaraflokkinn betur við yngri flokkastarfið, við ætlum okkur að halda áfram að búa til góða leikmenn og það gerum við með því að gefa strákunum möguleikann á að spila.
Fletta milli frétta	Til baka Senda á Facebook

Umsjón og hönnun: Stefán Jóhannsson og Ágúst Stefánsson