Mikilvægur sigur Akureyrar á Seltjarnarnesinu


Fréttir - Leikir tímabilsins - Leikmenn - Stjórn - Saga og tölfræði - Höllin - Lagið - Myndir - Myndbönd - Tenglar
- Úrvalsdeild karla - Senda skilaboð - Vefur KA - Vefur Þór - Fréttaleit

Meistarafl. karla

Næstu leikir

Nýjustu úrslit

Stjarnan-Akureyri 28-23
Þri. 4. apr. 2017
Olís deild karla

ÍBV-Akureyri 22-22
Mið. 29. mar. 2017
Olís deild karla

Stjarnan U-Akureyri U 35-30
Fös. 7. apr. 2017
1. deild karla

Akureyri U-KR 34-30
Fös. 31. mar. 2017
1. deild karla

deildin staðan

Fréttir

Þú flettir milli frétta með örvalyklunum eða smellir á bláu örvarnar!


Kristján Orri með sannkallaðan stórleik í dag		13. nóvember 2016 - Akureyri handboltafélag skrifar Mikilvægur sigur Akureyrar á Seltjarnarnesinu Það var sannkallaður baráttuleikur á milli Gróttu og Akureyrar á Seltjarnarnesinu í dag, bæði lið lögðu allt í sölurnar til að krækja í dýrmæt stig sem voru í boði. Gróttumenn byrjuðu betur og komust í þriggja marka forystu í upphafi 4-1. En Akureyringar gáfust ekki upp og minnkuðu muninn í eitt mark, 4-3. Hægt gekk þó að jafna leikinn og tókst ekki fyrr en eftir tæpar tuttugu mínútur þegar Kristján Orri Jóhannsson jafnaði í 8-8. Kristján bætti raunar öðru marki við og Akureyri komið yfir, en sú gleði var þó ekki langvinn því Grótta svaraði með þrem síðustu mörkum hálfleiksins og leiddi 11-9 í hálfleik. Bæði lið voru að leika hörkuvarnarleik, Gróttumenn léku með framliggjandi miðju sem virtist trufla sókn Akureyrar töluvert. Stropus og Mindaugas náðu sér ekki á strik í hálfleiknum en áðurnefndur Kristján Orri var frábær, með 5 mörk í hálfleiknum, einnig var Patrekur Stefánsson öflugur og skoraði tvö góð mörk fyrir utan. Akureyri kom af miklum krafti inn í seinni hálfleikinn, Stropus minnti rækilega á sig og jafnaði með tveim glæsimörkum. En það var þó Tomas Olason sem gaf tóninn með því að verja tvö vítaköst í röð á fyrstu fjórum mínútum hálfleiksins, Tomas átti reyndar eftir að verja eitt víti til viðbótar áður en yfir lauk. Akureyri komst yfir í 12-13 og tóku frumkvæðið í leiknum. Erfiðlega gekk að hrista Gróttumenn af sér jöfnuðu alltaf jafnharðan. Í stöðunni 15-15 komu þrjú norðanmörk í röð og Akureyri virtist komið með góð tök á leiknum, en Adam var ekki lengi í paradís því Grótta svaraði einnig með þrem mörkum og jöfnuðu í 18-18 þegar rúmar þrjár mínútur voru til leiksloka. En Akureyri átti þær mínútur skuldlausar, Patrekur fiskaði vítakast sem Kristján Orri skoraði úr. Tomas varði frábærlega frá Finni Stefánssyni. Andri Snær fiskaði í kjölfarið ruðning á Finn og skoraði síðan tvö síðustu mörk leiksins og gríðarlega mikilvægur 18-21 sigur í höfn. Hér er einmitt hægt að horfa á þennan lokakafla leiksins. Seinni hálfleikurinn var í raun frábær hjá Akureyrarliðinu, vörnin hreint mögnuð og Tomas átti stórleik þar fyrir aftan. Kristján Orri lék klárlega sinn besta leik á tímabilinu og virðist vera að komast í sinn albesta ham, sem er aldeilis ekki ónýtt fyrir liðið. Mörk Akureyrar: Kristján Orri Jóhannsson 11(2 úr vítum), Karolis Stropus 3, Andri Snær Stefánsson 2, Patrekur Stefánsson 2, Arnþór Gylfi Finnsson 1, Friðrik Svavarsson 1 og Mindaugas Dumcius 1. Tomas Olason stóð í markinu allan tímann og var hreint út sagt frábær, 14 skot varin þar af 3 vítaköst. Mörk Gróttu: Finnur Ingi Stefánsson 5 (1 úr víti), Leonharð Þorgeir Harðarson 3, Þráinn Orri Jónsson 3, Júlíus Þórir Stefánsson 2, Aron Dagur Pálsson, Árni Benedikt Árnason, Elvar Friðriksson, Vilhjálmur Geir Hauksson og Þórir Bjarni Traustason 1 mark hver. Lárus Helgi Ólafsson í markinu reyndist Akureyri erfiður, varði 14 skot auk þess sem Lárus Gunnarsson kom í markið til að spreyta sig á vítakasti en án árangurs. Leikurinn var í beinni útsendingu á Akureyri TV en fyrir þá sem misstu af leiknum þá er hægt að horfa á hann hér. Fimm stig af síðustu sex mögulegum gefa liðinu og stuðningsmönnum aukið sjálfstraust og stemmingu. Nú er bara að undirbúa sig undir næstu átök í deildinni en það er heimaleikur gegn ÍBV sem verður sunnudaginn 20. nóvember klukkan 14:00.
Fletta milli frétta	Til baka Senda á Facebook

Umsjón og hönnun: Stefán Jóhannsson og Ágúst Stefánsson