Warning: Undefined array key "frettanr" in /web/akhandadmin/public_html/index.php on line 15 Grátlegt tap í hörkuleik í Eyjum - Akureyri Handboltafélag
Dómarar: Bjarni Viggósson og Jón Karl Björnsson. Eftirlit Kristján Halldórsson
Umfjöllun
Tengdar fréttir
Sverre tekur tapið á sig sjálfan
19. september 2016 - Akureyri handboltafélag skrifar
Viðtöl eftir leikinn í Eyjum í gær
Mbl., visir.is og fimmeinn.is hafa birt viðtöl við þjálfara Akureyrar og ÍBV. Hér á eftir fara viðtölin eins og þau koma fyrir á þessum miðlum. Byrjum á Guðmundi Tómasi Sigfússyni mbl.is sem ræddi við þjálfarana:
Sverre: Þetta skrifast 100% á mig
Akureyri tapaði með eins marks mun úti í Eyjum gegn toppliði ÍBV í 3. umferð Olís-deildar karla í dag. Lokatölur 25:24 en Akureyri jafnaði metin þegar 6 sekúndur voru eftir, þeir höfðu því miður tekið leikhlé rétt áður. Í raun algjör óheppni hjá gestunum sem hefðu átt stig skilið. „Leikurinn var mjög skemmtilegur og mikið hrós á mína stráka. Þeir áttu svo sannarlega skilið stig, ég myndi segja að jafntefli hefði alveg verið sanngjarnt, miðað við allt og allt. Það er leiðinlegt að það skuli hafa verið ég sem kom í veg fyrir það,“ sagði Sverre sem var í raun miður sín að hafa tekið leikhlé á þeim tíma sem hann gerði það.
Akureyri virtist koma ÍBV á óvart í upphafi leiks þegar liðið tók afgerandi forystu. „Það er búin að vera undiralda í fyrstu tveimur leikjunum en við tökum hverju verkefni fagnandi til að bæta okkur. Strákarnir voru flottir frá a til ö og er ég mjög ánægður með þá. Fullt af mjög jákvæðum hlutum og eins og ég sagði áðan er sorglegt að fara héðan með ekkert í farteskinu. Þetta skrifast á mig 100%.“
Hvað er það helsta sem Sverre tekur jákvætt úr leiknum? „Karakter liðsins, sóknarleikurinn, barátta, varnarleikur á stórum köflum, hraðaupphlaupin voru mun betri, yfirvegun var betri, ákvarðanataka var betri.“
Hvernig líst Sverre á liðið eftir fyrstu þrjá leikina? „Ég er ekki kominn með stig og nú verður þú að fylla inn í eyðuna. Ég er alls ekkert sáttur við það en þetta er frábært svar hjá liðinu og gefur tilefni til bjartsýni.“ Afturelding í næsta leik hjá Akureyri, er krafa á tvö stig úr þeim leik? „Hver leikur er krafa um tvö stig, eða kannski ekki krafa um tvö stig. Frekar að spila vel og bæta sig, gera betur og við ætlum að gera það. Við viljum að sjálfsögðu fara að safna einhverju inn á reikninginn,“ sagði Sverre sem getur verið stoltur af sínum mönnum í dag.
Arnar Pétursson: Aggi kláraði þetta, hann er svo klikkaður
„Þetta var hörkuleikur og við erum mjög ánægðir með þennan sigur. Þetta var barátta frá mínútu eitt, við þurftum að hafa mjög mikið fyrir þessu og er ég virkilega þakklátur fyrir að hafa klárað þetta,“ sagði Arnar en óvenju lítið var um tveggja mínútna brottvísanir í dag miðað við aðra leiki ÍBV á tímabilinu.
Leikurinn var kaflaskiptur og byrjuðu gestirnir mun betur. ÍBV átti síðan frábæran kafla frá miðjum fyrri hálfleik og að fertugustu mínútu. Hvað er það sem Arnar tekur út í leiknum? „Við byrjuðum þetta í óðagoti, Aggi er meiddur og ætlaði samt að reyna þetta. Eftir sjö mínútur var þetta búið með hann og við tókum hann út. Við þetta róaðist leikurinn aðeins, Aggi ætlaði að sýna að hann væri í lagi og var svolítið bráður til að byrja með.“ „Við lendum þar undir en það er karakter að svara þessu og koma til baka. Menn héldu ró og ég er mjög ánægður með það.“
Það var gríðarleg dramatík í lokin eftir að Eyjamenn komust yfir þegar 7 sekúndur voru eftir. „Við setjum Agga inn á meiddan, því að Teddi var kominn með tvær mínútur. Aggi kláraði þetta, hann er svo klikkaður, við fengum gott mark. Þeir keyra upp og við erum með engan í markinu, Sverre tók leikhlé, sem er eðlilegt. Hann átti ekki von á að þeir myndu nýta sér það.“
ÍBV er komið með fimm stig eftir þrjá leiki, er Arnar ánægður með það? „Já, ég er mjög sáttur. Ég skal alveg viðurkenna það, þið sjáið að Beggi er frábær í 40 mínútur, svo fer að draga af honum. Hann er nýkominn úr aðgerð þannig að það er eðlilegt. Sindri, Maggi og Aggi eiga nokkuð í land hvað formið varðar. Eftir 40-50 mínútur í dag vorum við orðnir helvíti þreyttir.“
Ungur og efnilegur strákur úr Eyjum, Daníel Örn Griffin, kom skemmtilega inn í liðið í dag og skoraði fjögur góð mörk. „Við setjum hér inn strák úr 3. flokki, Daníel Griffin, sem kemur gríðarlega sterkur inn og flottur. Við erum með Tedda í skyttunni, Dag á miðjunni, svo erum við með Begga, Grétar og Kára. Ungir peyjar sem koma inn og standa sig virkilega vel. Ég er ánægður með það.“
Róbert Aron Hostert verður eitthvað frá á næstunni vegna meiðsla, það hlýtur að vera áfall fyrir liðið. „Auðvitað er það áfall að missa Robba, hann er frábær leikmaður og var hægt og rólega að koma sér í stand. Svona er þetta, það er ekkert við þessu að segja. Vonandi fáum við hann þrefaldan til baka.“
Nú missir ÍBV Stephen Nielsen á láni til Frakklands, af hverju gerist það? „Það að missa eitthvað er svolítið neikvætt, en við tókum þessa ákvörðun að gefa honum tækifæri til að fara til Frakklands. Þetta er úrvalsdeild í Frakklandi, þarna er hann að spila í einni af bestu deildum í heimi. Mér fannst ekki réttlætanlegt hans vegna að gefa honum ekki færi á þessu. Við treystum Kolla og ungum markverði sem heitir Andri Ísak, hann er mikið efni og við treystum honum fyllilega til þess að koma inn í þetta og standa í þessu með okkur.“
Fyrir visir.is tók Gabríel Sighvatsson viðtöl við þjálfarana en ræddi þó fyrst við Magnús Stefánsson, fyrirliða Eyjamanna:
Magnús: Tökum hverju stigi fagnandi
Magnús Stefánsson, fyrirliði ÍBV, var að vonum sáttur með tvö stig úr leiknum í dag. „Ég er mjög sáttur með tvö stig í dag, við þurftum karakter og baráttur í lokin til þess að klára þetta og það var það sem sótti þessi tvö stig frekar en gæðin,“ sagði Magnús. „Mótið er rétt að byrja og við tökum hverju einasta stigi fagnandi, við erum hægt og rólega að koma okkur inn í þetta og stilla saman strengi, þetta er allt á réttri leið.“
Magnús segist litlar áhyggjur hafa af fjarveru Róberts Arons Hostert sem meiddist í síðasta leik. „Við erum með frábært lið og sama hvað allir segja þá finnst mér við hafa góða breidd og Robbi fær bara sinn tíma,“ Næsti leikur Eyjamanna er gegn FH. „FH-ingarnir eru með frábært lið og þeir eru búnir að sýna það, þeir eru mjög vel spilandi, þú mætir ekkert svona liði öðruvísi en 100%,“ sagði Magnús að lokum.
Sverre: Þetta skrifast 100% á mig
„Strákarnir mínir voru mjög einbeittir og eiga mikið hrós skilið í dag, ég held að jafntefli hefði verið sanngjarnt miðað við allt en það er hálfleiðinlegt að það skuli vera ég sem komi í veg fyrir það,“ sagði Sverre Jakobson, þjálfari Akureyrar.
Mistök hans sem fólust í því að taka leikhlé þegar hans lið var í sókn undir lok leiksins, kostaði liðið stig í dag og viðurkenndi hann það fúslega. Hann var þó ánægður með spilamennsku sinna manna. „Við tökum hverju verkefni fagnandi og strákarnir voru flottir frá A-Ö og það er sorglegt að þurfa að fara héðan með ekkert í farteskinu og aftur skrifast þetta á mig, 100 prósent,“ sagði Sverre. „Ég er ekki kominn með stig, sem ég er ekki sáttur með en þetta er frábært svar hjá liðinu og gefur tilefni til bjartsýni,“ bætti hann við.
Krafan er tvö stig gegn Aftureldingu í næstu umferð. „Það er krafa um tvö stig fyrir hvern einasta leik og við viljum að sjálfsögðu fara að safna einhverjum stigum.“
Arnar: Mjög sáttur með fimm stig
Arnar Pétursson, þjálfari ÍBV, var ánægður með sitt lið eftir sigurinn í dag. „Þetta var hörkuleikur og ég er mjög ánægður að ná í sigur, þetta var barátta frá fyrstu mínútu og við þurftum að hafa mjög mikið fyrir þessu,“ sagði Arnar.
Arnar ákvað að taka séns með leikmann sinn sem var tæpur vegna meiðsla. „Við byrjum þetta svolítið í óðagoti, Aggi (Agnar Smári Jónsson) er meiddur en vildi reyna þetta en tókum hann síðan út af á sjöundu mínútu og þá róaðist leikurinn aðeins.“
Lokamínúturnar voru dramatískar í dag og endaði það með að þjálfari Akureyrar var ábyrgur fyrir að tapa stigi í dag. „Ég veit ekki alveg hvað gerist undir lokin, við fáum gott mark og þeir keyra upp þegar við erum með engan í markinu og Sverre tekur leikhlé eins og eðlilegt er, hann átti ekki von á því að þeir myndu nýta sóknina sína,“ sagði Arnar. Þá er hann virkilega sáttur með byrjunina á tímabilinu og hvernig strákarnir hafa spilað í fyrstu leikjunum. „Ég er mjög sáttur með fimm stig, það er svolítið í land með Agga, Magga og Sindra og eftir 45 mínútur í dag erum við orðnir þreyttir. Í dag setum við inn Daníel Örn Griffin úr 3. flokki sem kemur gríðarlega sterkur og flottur inn, við erum með Tedda í skyttunni, Dag á miðjunni og Begga, Grétar og Kára sem stóðu sig allir mjög vel,“ sagði Arnar.
Á miðlinum fimmeinn.is eru vídeóviðtöl við sömu aðila, keimlík viðtölunum hér að ofan og fara þau hér á eftir:
Magnús Stefáns: Barátta frekar en gæði sem kláruðu þetta í dag
Magnús Stefánsson var aðallega sáttur með að hafa fengið tvö stig úr leiknum við Akureyri í dag en sagði að þeir þyrftu klárlega að fara yfir marga hluti en heilt yfir var það karakter að hafa náð að klára þetta.
Baráttan sem liðið sýndi hefði klárað þessi stig meira en einhver gæði en þetta hefðu verið tvö stig og það var fyrir öllu. Gæðin eru þó til staðar og hann væri alveg sáttur með að vera ennþá taplaus í deildinni. Aðspurður um meiðsli Róberts sagði Magnús að nú þyrftu menn bara að stíga upp fyrir hann og gefa honum þann tíma sem hann þyrfti. Menn ættu alveg að geta það.
Sverre: Tek þetta tap 100% á mig sjálfan
Sverre Jakobsson þjálfari Aureyrar var að vonum ekki sáttur með að fara alveg tómhentur frá Eyjum en sagði leikinn hafa verið skemmtilegur og það mætti hrósa sínum mönnum vel fyrir þeirra framlag í leiknum og sagði ennfremur að fullt af mjög jákvæðum hlutum hefði verið í leiknum hjá sínum mönnum.
Hann sjálfur hefði kostað það að ekkert stig hefði fengist en Sverre tók leikhlé í stöðu þar sem Akureyri var að taka hraða miðju en Eyjamenn voru ekki með neinn í markinu og þegar Sverre skellti spjaldinu græna á ritaraborðið en hann sá ekki tómt mark heimamanna.
Arnar Pétursson: „Þurftum að hafa mjög mikið fyrir þessu
„Þetta var bara hörkuleikur og ég er bara ánægður að hafa tekið stigin þetta var barátta og við þurftum að hafa mjög mikið fyrir þessu og því er ég þakklátur fyrir að hafa klárað þetta,“ sagði Arnar Pétursson þjálfari ÍBV eftir sigurinn á Akureyri í dag.
Arnar sagði einnig að Agnar Smári hefði verið meiddur fyrir leikinn en vildi láta reyna á þetta en eftir sjö mínútur var það orðið vonlaust. Það gekk mikið á undir lok leiksins og mikil dramatík þar sem Arnar setur meiddan Agnar Smára aftur inná og hann kláraði leikinn. „Aggi er svo klikkaður, en ég veit það ekki alveg við fáum bara gott mark og þeir keyra upp þegar við erum ekki með neinn í markinu en Sverre tekur leikhlé sem eðlilegt er en sem betur fer fyrir okkur.“
Við fylgjumst með útsendingu ÍBV-TV í dag
18. september 2016 - Akureyri handboltafélag skrifar
Leikur dagsins: ÍBV - Akureyri í beinni
Leikmenn Akureyrar Handboltafélags halda til Vestmannaeyja í dag og mæta þar heimamönnum í ÍBV. Þetta er fyrsti leikur þriðju umferðar Olís-deildar karla og hefst klukkan 15:00 í dag.
Eyjamenn ætla að sýna leikinn beint á netinu sem eru frábær tíðindi fyrir okkur sem eiga ekki tök á að fylgja liðinu til Eyja.
Við sendum að sjálfsögðu bestu baráttukveðjur til strákanna á þennan erfiða útivöll.
Útsending ÍBV-TV verður aðgengileg í spilaranum hér að neðan þegar leikurinn hefst, um klukkan 15:00 í dag.
Úrvalsdeild karla
Senda skilaboð
Vefur KA
Vefur Þór
Fréttaleit
Tölfræði leiksins 
Senda á Facebook