Warning: Undefined array key "frettanr" in /web/akhandadmin/public_html/index.php on line 15 Öruggur sigur Akureyrar á Stjörnunni - Akureyri Handboltafélag
13. nóvember 2016 - Akureyri handboltafélag skrifar
Morgunblaðið fjallar um Tomas Olason
Frammistaða markvarðarins Tomas Olason í leiknum gegn Stjörnunni fór ekki framhjá blaðamönnum og tók Morgunblaðið Tomas til sérstakrar umfjöllunar að lokinni 9. umferð Olís deildarinnar. Morgunblaðið spurði þjálfarann Sverre Jakobsson út í markvörðinn sem er hálfur Íslendingur og hálfur Dani.
„Við spiluðum að hluta til flotta vörn og hann varði mikilvæg skot. Við höfum oft verið að horfa til þess að markvarslan hjá okkur nái að vera fimmtán skot í leik og meira. Hann braut þann múr í þessum leik en við höfum reynt að vinna í því að ná markvörslunni upp um eitt þrep ef svo má segja. Tomas og Arnar Þór Fylkisson hafa unnið gríðarlega vel saman í umsjón Bjössa,“ sagði Sverre og vísar þar til Björns Björnssonar sem handboltaunnendur ættu að muna eftir í markinu hjá KA á tíunda áratugnum.
„Bjössi kom inn í þjálfunina hjá okkur fyrir tæpum tveimur mánuðum til að hjálpa okkur með markmannsþjálfunina. Þetta er mikilvægur partur af leiknum og þarf að sinna vel en vill stundum gleymast. Ég held að það hjálpi markvörðunum okkar hiklaust og Bjössi er gríðarlega góð viðbót fyrir okkur. Ég reikna með að það hafi verið gaman fyrir hann að sjá frammistöðuna úr stúkunni í gær.“
Á íslenskan föður Tomas missti úr fimm leiki vegna hnémeiðsla í haust og er tiltölulega nýbyrjaður að spila aftur. „Hann bítur á jaxlinn og hefur verið að komast hægt og rólega í form. Hann er einbeittur og allur af vilja gerður. Þegar menn eru tilbúnir til að leggja mikið á sig þá hljóta þeir að fá verðlaun fyrir það með einhverjum hætti og hann átti skilið að ná frammistöðu eins og gegn Stjörnunni,“ sagði Sverre en um síðasta veturinn er að ræða hjá Tomasi á Akureyri. Hann hyggst flytjast aftur til Danmerkur næsta vor eftir fimm vetur á Íslandi. Tomas á íslenskan föður og ákvað að koma til Íslands haustið 2012 eftir að hafa búið alla tíð í Danmörku. Tomas kynntist Andra Snæ Stefánssyni, hornamanni Akureyrarliðsins, í Danmörku og Andri viðraði þá hugmynd að Tomas kæmi til Íslands og spilaði með Akureyri.
Talar íslenskuna Tomas gat bjargað sér á íslensku þegar hann kom og hefur aðlagast vel á Akureyri og hefur meðal annars sest á skólabekk í háskólanum í bænum. „Tomas er fínn persónuleiki og mjög góður félagi í hóp. Hann hefur reynst okkur vel. Ásamt Arnari og Bjössa er hann að vinna í að markvarslan verði betri hjá okkur. Við þurfum á því að halda að hún verði aðeins betri og þeir eru mjög einbeittir í þeirri vinnu“, sagði Sverre Jakobsson ennfremur í samtali við Morgunblaðið.
Mindaugas kominn á flott skrið
13. nóvember 2016 - Akureyri handboltafélag skrifar
Mindaugas valinn í úrvalslið 10. umferðar
Vefurinn fimmeinn.is velur úrvalslið hverrar umferðar Olís-deildar karla og birti í gær val sitt fyrir 10. umferðina. Þar átti Akureyri einn fulltrúa en Midaugas Dumcius var valinn besta hægri skyttan og er hann vel að því kominn.
Úrvalslið umferðarinnar er þannig að mati þeirra á fimmeinn.is: Markmaður: Helgi Hlynsson, Selfoss Vinstri horn: Andri Þór Helgason, Fram Vinstri skytta: Josip Juric Gric, Val Miðja: Elvar Örn Jónsson, Selfoss Lína: Orri Freyr Gíslason, Val Hægri skytta: Mindaugas Dumcius, Akureyri Hægri horn: Finnur Ingi Stefánsson, Grótta
Mindaugas skoraði beint úr aukakasti í lok fyrri hálfleiks og hér fagnar hann með Kristjáni Orra Jóhannssyni.
Akureyrarliðið hefur ekki átt marga fulltrúa í vali fimmeins það sem af er tímabilsins en Mindaugas er sá þriðji það sem af er. Í fimmtu umferð var Andri Snær Stefánsson valinn vinstri hornamaður umferðarinnar eftir að Akureyri lagði Selfoss á útivelli Í þriðju umferð var Karolis Stropus valinn besta vinstri skyttan eftir leik Akureyrar gegn ÍBV í Eyjum.
Við óskum þeim öllum til hamingju með útnefningarnar.
Friðrik og Andri Snær voru í viðtölum eftir leikinn
11. nóvember 2016 - Akureyri handboltafélag skrifar
Viðtöl eftir leik Akureyrar og Stjörnunnar
Líkt og oft áður þá voru blaðamenn mbl.is og visir.is mættir til að fylgjast með heimaleik Akureyrar og eiga þeir heiður skilið fyrir sitt framlag. Það vekur hinsvegar alltaf meiri og meiri athygli að RÚV hefur ekki enn sýnt áhuga á að senda starfsmenn sína til að fylgjast með heimaleik Akureyrar á tímabilinu.
En gefum Einari Sigtryggssyni blaðamanni mbl.is orðið, hann ræddi við leikmennina Friðrik Svavarsson og Sveinbjörn Pétursson:
Friðrik: Hélt að Sverre ætlaði að afhausa mig
Friðrik Svavarsson, línumaður Akureyringa, gat brosað í kampinn eftir að lið hans hafði lagt Stjörnuna í Olís-deild karla í kvöld. Var Akureyri að vinna fyrsta heimasigur vetrarins og þurfti mikið að hafa fyrir honum en leiknum lauk 24:20. „Þetta var virkilega mikilvægur sigur fyrir okkur. Við erum búnir að vinna töluvert í okkar málum og byggja okkur upp sem lið og við erum að springa út núna.“
Hvernig var undirbúningurinn þegar vitað var að tveir lykilmenn yrðu ekki með, þeir Sigþór Árni og Brynjar Hólm. Menn hafa ekkert verið smeykir? „Sko, það talar enginn um þetta. Við erum ekkert að skýla okkur á bak við einhver meiðsli eða eitthvað svoleiðis. Við erum alltaf með fullan hóp og allir sem eru með eru tilbúnir að leggja sig 100% fram, alveg sama hverjir það eru og alveg sama hverjir eru inni á.“
Friðrik Svavarsson kominn í gegn og mark í uppsiglingu
En að Friðriki sjálfum, sem einhverra hluta vegna er kallaður Friðrik axlir meðal liðsfélaganna. Nú ert þú alltaf að spila betur á línunni og nýtir færin betur en áður. Er einhver galdur á bak við það, kannski aukaæfingar klukkan sjö á morgnana? „Ég fer reyndar í ræktina klukkan sex á morgnana, fyrir vinnu. En það er enginn galdur á bak við þetta. Líklega er þetta bara hluti af því að við erum að vaxa sem lið,“ sagði kappinn, hæverskan uppmáluð.
Friðrik stal svo eiginlega senunni á lokamínútunni þegar hann skoraði með skoti eftir uppstökk við punktalínuna við mikla kátínu áhorfenda. Hvað var það? „Ég hélt að Sverre ætlaði að afhausa mig þegar ég horfði á hann eftir skotið. Sem betur fer þá var boltinn inni. Þetta var bara svona andartak sem kemur yfir mann og ég fann að ég myndi skora.“
Svo þarf eitthvað að ræða næstu skref. „Það er búið að taka sinn tíma að slípa liðið saman og við erum kannski fyrst núna að sýna hvað í okkur býr og hvað það er góð liðsheild í hópnum. Báðir Litháarnir eru partur af liðinu og svo er Igor kominn í hópinn og við erum bara ein heild. Við tökum vel á móti öllum og erum ein fjölskylda,“ sagði hinn skemmtilegi línumaður að lokum.
Sveinbjörn: Áttum hvert einasta orð skilið
Sveinbjörn Pétursson var á kunnuglegum slóðum í kvöld þegar hann varði mark Stjörnunnar gegn Akureyringum í Olís-deild karla. Hann lék með Þór í yngri flokkunum og svo með liði Akureyrar áður en hann hélt til Þýskalands í atvinnumennsku. Má segja að Sveinbjörn, eða Bubbi eins og hann er iðulega kallaður, sé enn í guðatölu hjá Akureyringum en hann var algjör lykilmaður í liði norðanmanna þegar það barðist um Íslandsmeistaratitla fyrir nokkrum misserum. Bubbi stóð fyrir sínu í leiknum þrátt fyrir fjögurra marka tap Stjörnunnar. Auðvitað var hann súr með úrslitin og hafði þetta að segja. „Við náðum þeim aldrei í þessum leik. Þeir byrjuðu betur og voru yfir en forystan var aldrei það stór að það væri ekki hægt að vinna hana upp. Þetta voru þrjú til fimm mörk og maður hefði kannski haldið að með góðum kafla hjá okkur og slæmum kafla hjá þeim myndum við ná þeim og gera þetta spennandi. Góðu kaflarnir hjá okkur voru bara of stuttir og þeir svöruðu alltaf.“
Sveinbjörn kemur boltanum í leik
En hvernig var fyrir hann að koma aftur norður? „Auðvitað var mjög gaman að koma hingað og sjá mörg kunnugleg andlit í stúkunni. Ég vildi vissulega sýna mig fyrir þeim og standa mig vel fyrir liðið mitt. Þetta er sérstakt, ég neita því ekki. En það er langt síðan ég kom hérna í KA-heimilið. Ég var vel stemmdur en þó vantaði upp,á hjá mér. Jú, ég varði vel á köflum en þeir kaflar voru ekki nógu langir. Það var þarna talsvert af mörkum sem ég get tekið beint á mig. Liðið þarf bara á því að halda að ég verji þessa bolta til að við eigum möguleika á sigri. Og ég tek einhver mörk algjörlega á mig.“
Nú hefur ekki gengið nógu vel eftir góða byrjun á mótinu. Fimm tapleikir í síðustu sex leikjum. Kanntu einhverjar skýringar á því? „Við byrjuðum mótið vel og erum með gott lið. En við höfum verið að klikka í síðustu leikjum. Ég veit ekki hvað veldur. Þetta er mjög jöfn deild og það má aldrei slaka neitt á. Einar leggur leikina vel upp og það gengur fínt á æfingum en það er eitthvað sem vantar þessa stundina. Ég get ekki talað fyrir hina en hugsanlega vantar einhvern karakter eða gæði til að vinna leiki í þessari deild. Hver leikur er virkilega erfiður og það þarf að koma meira frá hverjum og einum í liðinu. Við vissum það fyrir mót að við gætum gert góða hluti en yrðum að hafa fyrir hverju einasta stigi. Það hefur sýnt sig í leikjum vetrarins. Í öllum leikjunum sem við höfum náð stigi út höfum við gjörsamlega lagt allt í leikinn. Við erum með tvö jafntefli og tvo eins marks sigra. Maður skapar sína eigin heppni og við þurfum bara að fara að grafa djúpt í okkur. Ég kom inn í hópinn í sumar og leist strax vel á liðið. Við erum með mjög flotta leikmenn og nokkra utan hópsins sem gætu komið inn. Það búa mikil gæði í þessu liði en við þurfum að kalla þau fram. Við sem erum inni á vellinum verðum bara að svara fyrir þetta og ég er viss um að við mætum grimmir til leiks á mánudaginn gegn FH-ingum.“
Að lokum varð blaðamaður að spyrja Bubba um það hvernig upplifum það var að sitja inni í klefa eftir tapleikinn í kvöld og hlusta á Einar Jónsson þjálfara hreinlega öskra á leikmenn og segja þeim til syndanna. Alex Ferguson hefði eflaust orðið stoltur af kjarnyrtri ræðu Einars inni í klefa skömmu eftir leik. „Við áttum hvert einasta orð skilið. Við unnum okkur ekki fyrir neinu hrósi. Einar er mjög sanngjarn og lætur okkur heyra það þegar við á en á móti þá hrósar hann okkur þegar við eigum það skilið. Ég vil að það komi fram,“ sagði Bubbi að lokum.
Næst er komið að Ólafi Hauki Tómassyni blaðamanni visir.is en hann tók viðtöl við leikmennina Andra Snæ Stefánsson og Ara Pétursson.
Andri Snær: Ég fékk gæsahúð
„Þetta er auðvitað afar kærkomin stig og þetta er rosalega gott fyrir liðið. Við erum mjög spenntir fyrir törninni sem er framundan og við mættum rosalega ákveðnir í dag, uppskárum eftir því og þetta er frábært veganesti í törnina sem er framundan,“ sagði Andri Snær Stefánsson, fyrirliði Akureyrar eftir sigur sinna manna í kvöld.
Akureyri hefur gengið afar illa í vetur og aðeins unnið tvo leiki og gert eitt jafntefli í þessum tíu leikjum sínum. Oft hefur ekki munað miklu í tapleikjum þeirra og er Andri ánægður með hugarfarið hjá sínum mönnum. „Mér fannst karakterinn sem við sýndum standa upp úr og við erum að sýna frábæran karakter. Það eru pínu mistök inn á milli sem skipta engu máli og við höldum bara áfram. Við höfum verið í svona leikjum áður sem við höfum misst niður og það var karakterinn sem skapaði sigurinn. Við höfðum þor og vorum bara alveg frábærir.“
Andri Snær í hraðaupphlaupi, stingur sér framhjá Starra og boltinn lá í netinu
Stemmingin sem Akureyri náði að mynda á vellinum náði að smitast vel í áhorfendur og stemmingin var afar góð og minnti á það sem hefur einkennt KA-heimilið í mörg ár. Það hefur verið langt síðan unnist hefur sigur heimaliðs á Akureyri og telur Andri að þetta sé bara upphafið. „Við erum búnir að fá alltof lítið úr þessum heimavelli. Við vorum allir frekar orkumiklir í dag og það skiptir bara ofboðslega miklu máli að það séu allir með í þessu. Við sýndum frábæra liðsheild sem skilaði sér yfir í fólkið. Það var æðislegt, ég fékk gæsahúð nokkrum sinnum og þetta er það sem koma skal í næstu leikjum,“ sagði Andri Snær kampakátur.
Ari: Héldum að þetta væri leikur sem gæti hjálpað okkur
„Við vorum ekki að nýta færin okkar. Tomas var að verja einhverja tuttugu bolta eða eitthvað og mér fannst það aðallega ástæðan. Vörnin var að standa fínt en við vorum bara ekki að nýta færin okkar,“ sagði Ari Pétursson leikmaður Stjörnunnar eftir tapið gegn Akureyri í kvöld.
Ari Pétursson kominn í færi
Leikmenn Stjörnunnar voru að skjóta frekar illa á köflum, sérstaklega í fyrri hálfleik en þrátt fyrir að Stjörnumenn verði fúlir með leik sinn í dag telur Ari þá hafa staðið sig ágætlega á einu sviði en ekki tekist að láta það telja í kvöld, hann taldi sitt lið hafa skapað vel af fínum færum en gengið illa að klára þau. „Við erum þriðja neðsta liðið og erum ekki sáttir með það og við héldum að þetta gæti orðið leikurinn sem myndi hjálpa okkur að keyra þetta í gang,“ sagði Ari sem var að vonum ekki ánægður með úrslitin í kvöld og er Stjarnan nú komin nær botnbaráttunni eftir tap í mjög mikilvægum leik.
Sjáumst á leiknum á eftir!
10. nóvember 2016 - Akureyri handboltafélag skrifar
Leikur Akureyrar og Stjörnunnar í beinni á Akureyri TV
Leikur Akureyrar og Stjörnunnar verður í beinni útsendingu hjá okkur á Akureyri TV og hefst útsendingin rétt fyrir klukkan 19:00 eða skömmu áður en leikurinn sjálfur hefst.
Þetta verður fyrsti leikur Stjörnunnar í KA heimilinu síðan 11. mars 2008
10. nóvember 2016 - Akureyri handboltafélag skrifar
Leikur dagsins: Akureyri - Stjarnan
Íslenska landsliðið í handknattleik var í sviðsljósinu um síðustu helgi og raunar alla vikuna þar á undan. Fyrir vikið var gert tveggja vikna hlé á Olís deildinni en í dag, fimmtudag verður þráðurinn tekinn upp á nýjan leik og um leið hefst annar hluti deildarkeppninnar. Akureyri fær Stjörnuna í heimsókn í KA heimilið og ljóst að í boði eru gríðarlega mikilvæg stig fyrir bæði lið þannig að það verður engin lognmolla yfir þeim leik.
Liðin mættust í Garðabænum í fyrstu umferðinni þann 10. september og eftir hörkuleik fór Stjarnan með þriggja marka sigur, en þeir skoruðu einmitt þrjú síðustu mörk leiksins. Á lokakaflanum var það markvörðurinn knái, Sveinbjörn Pétursson sem lokaði markinu og tryggði sínum mönnum stigin. Sveinbjörn lék sem kunnugt er með Akureyri áður en hann fór í víking til Þýskalands og á flest öll félagsmet Akureyrar sem snúa að markvörslu.
Sveinbjörn ver hér eitt af 55 vítum sínum með Akureyrarliðinu og að sjálfsögðu skartar hann stuttbuxunum sem hann endurvakti sem hluta af markmannsbúningnum.
Nú þegar fyrsti þriðjungur Olís deildarinnar er að baki er áhugavert að líta á markahæstu menn Stjörnunnar en þar er efstur á blaði Ari Magnús Þorgeirsson með 43 mörk, línumaðurinn og vítaskyttan Garðar Benedikt Sigurjónsson með 38 mörk, Guðmundur Sigurður Guðmundsson með 30 og Andri Hjartar Grétarsson með 23 mörk. Þjálfari Stjörnunnar er reynsluboltinn Einar Jónsson sem m.a. gerði karlalið Fram að Íslandsmeisturum vorið 2013.
Akureyrarliðið hefur orðið fyrir miklum skakkaföllum með meiðsli það sem af er og spurning hversu vel landsleikjapásan hefur hjálpað mönnum að skríða saman á ný.
Markahæstu menn liðsins það sem af er tímabilsins eru Karolis Stropus 44 mörk, Andri Snær Stefánsson 39, Mindaugas Dumcius 37, Kristján Orri Jóhannsson 26 og Friðrik Svavarsson með 25 mörk.
Andri Snær, Friðrik og Stropus fagna marki í KA heimilinu í vetur
Stropus og Mindaugas voru með litháenska landsliðinu í hléinu þar sem Litháen vann góðan þriggja marka sigur á Norðmönnum en töpuðu fyrir Frökkum. Nýjasti liðsmaður Akureyrar, Úkraínumaðurinn Igor Kopyshynskyi var sömuleiðis upptekinn með sínu landsliði sem vann eftirminnilegan sigur á Íslandi um síðustu helgi. Raunar kom Igor ekkert inná í þeim leik. Þeir þremenningar komu til Akureyrar á þriðjudagskvöldið og eru vonandi í fínu standi eftir sín landsliðsverkefni.
Það var frábær stemming á síðasta heimaleik Akureyrar gegn FH og ekki að efast um að stuðningsmenn Akureyrar taka fullan þátt í leiknum gegn Stjörnunni sem hefst á hefðbundnum fimmtudagstíma, klukkan 19:00.
Eins og vanalega gerum við ráð fyrir að sýna leikinn beint á Akureyri TV og kemur linkur á útsendinguna hér á síðuna þegar nær dregur leiknum.
Merki Akureyrar á bílrúðuna og brjóstnælur í sparifötin
Þá minnum við á nýju bílrúðumerkin með Akureyrarmerkinu en hægt verður að kaupa þau í sjoppunni á leiknum, verð á þeim er aðeins 500 krónur. Auk þess eru til nokkrar glæsilegar brjóstnælur með Akureyrarmerkinu og verða þær einnig til sölu í sjoppunni á meðan birgðir endast.
Úrvalsdeild karla
Senda skilaboð
Vefur KA
Vefur Þór
Fréttaleit
Ljósmyndir frá leiknum
Myndband frá leiknum 
Tölfræði leiksins 
En gefum Einari Sigtryggssyni blaðamanni mbl.is orðið, hann ræddi við leikmennina Friðrik Svavarsson og Sveinbjörn Pétursson:
Næst er komið að Ólafi Hauki Tómassyni blaðamanni visir.is en hann tók viðtöl við leikmennina Andra Snæ Stefánsson og Ara Pétursson.
Senda á Facebook