Afturelding heppið með að ná stigi á heimavelli - Akureyri Handboltafélag

Warning: Undefined array key "frettanr" in /web/akhandadmin/public_html/index.php on line 15
Afturelding heppið með að ná stigi á heimavelli - Akureyri Handboltafélag


Fréttir - Leikir tímabilsins - Leikmenn - Stjórn - Saga og tölfræði - Höllin - Lagið - Myndir - Myndbönd - Tenglar
- Úrvalsdeild karla - Senda skilaboð - Vefur KA - Vefur Þór - Fréttaleit

Meistarafl. karla

Nýjustu úrslit

Stjarnan-Akureyri 28-23
Þri. 4. apr. 2017
Olís deild karla

ÍBV-Akureyri 22-22
Mið. 29. mar. 2017
Olís deild karla

deildin staðan

Ungmennalið karla

Nýjustu úrslit

Stjarnan U-Akureyri U 35-30
Fös. 7. apr. 2017
1. deild karla

Akureyri U-KR 34-30
Fös. 31. mar. 2017
1. deild karla

deildin staðan

Ljósmyndir frá leiknum

Myndband frá leiknum

Tölfræði leiksins

		Afturelding - Akureyri 23-23 (8-13)
		Olís deild karla
		Íþróttamst. Varmá
		Lau. 26. nóv. 2016 klukkan: 18:30
		Dómarar: Ramunas Mikalonis og Þorleifur Árni Björnsson, eftirlit Hlynur Leifsson

Umfjöllun


Tomas flottur og einnig ungmennliðsmennirnari Sigþór og Arnór		27. nóvember 2016 - Akureyri handboltafélag skrifar Afturelding heppið með að ná stigi á heimavelli Endurkoma Akureyrarliðsins hélt áfram í gær þegar liðið mætti Aftureldingu í Mosfellsbænum. Þarna mættust liðin í efsta og neðsta sæti Olísdeildarinnar og því hefði mátt búast við að þetta yrði leikur kattarins að músinni. En það varð öðru nær, Akureyri tók öll völd á vellinum og komst í 2-5 eftir rúmlega fimm mínútna leik. Arnór Þorri Þorsteinsson byrjaði í stöðu leikstjórnanda og gerði það vel. Patrekur Stefánsson gat ekki tekið þátt í leiknum vegna veikinda en í hans stað kom inn í hópinn kornungur strákur, Sigþór Gunnar Jónsson. Afturelding svaraði með tveim mörkum en Akureyri hélt sínu og munurinn áfram 2 til 3 mörk. Akureyri varð síðan fyrir áfalli um miðjan hálfleikinn þegar Karolis Stropus varð að yfirgefa völlinn vegna alvarlegra meiðsla, leikur grunur jafnvel á að hann hafi slitið hásin. Við þetta þurfti að stokka upp sóknarleikinn, Igor kom inn í vinstra hornið í stað Andra Snæs sem tók stöðu leikstjórnanda en Arnór Þorri í hægri skyttuna. Það var þó ekkert slakað á og Akureyrarliðið bætti við fimm mörkum fram að hálfleik á móti tveim mörkum heimamanna, staðan 8-13 fyrir Akureyri í hálfleik. Mindaugas var mjög sprækur framan af og Kristján Orri nýtti færin sín vel, Róbert Sigurðarson brá sér nokkrum sinnum í sóknina og skoraði tvö góð mörk líkt og Arnór Þorri. Þá tók Tomas afar mikilvæga bolta í vörninni. Kristján Orri skartaði nýrri hárgreiðslu og skorar hér úr víti. Mynd: Hanna K. Andrésdóttir visir.is Andri Snær skoraði fyrsta mark seinni hálfleiksins og munurinn orðinn sex mörk, 8-13 fyrir Akureyri. En þar með kom kafli þar sem ekkert gekk í sókn Akureyrar og næstu fimm mörk voru eign Aftureldingar og munurinn kominn niður í eitt mark. Sverre tók leikhlé í kjölfarið og Akureyri svaraði með þrem næstu mörkum, staðan 13-17. Spennan hélt áfram, vörn Aftureldingar og markvarsla var allt önnur en í fyrri hálfleiknum en sem betur fer hélt Tomas Olason einnig áfram að verja vel í Akureyrarmarkinu. Nýliðinn, Sigþór Gunnar kom inn í sóknarleikinn og lagði sitt að mörkum, ógnaði vel og skilaði marki. Akureyri hélt frumkvæðinu, tvö til þrjú mörk og var staðan 20-23 fyrir Akureyri þegar fjórar og hálf mínúta var til leiksloka. En ekki tókst að bæta við marki á þeim tíma, vítakast fór forgörðum en heimamönnum í Aftureldingu tókst að jafna leikinn. Akureyri átti síðustu sókn leiksins en lokaskotið var framhjá þannig að topplið Aftureldingar gat fagnað því að ná stigi út úr leiknum. Mörk Akureyrar: Mindaugas Dumcius 6, Kristján Orri Jóhannsson 6 (2 úr vítum), Andri Snær Stefánsson 2 (1 úr víti), Arnór Þorri Þorsteinsson 2, Friðrik Svavarsson 2, Róbert Sigurðarson 2, Igor Kopyshynskyi 1, Karolis Stropus 1 og Sigþór Gunnar Jónsson 1 mark. Tomas Olason varði 14 skot í leiknum og völdum við hann mann leiksins í annars jöfnu og flottu liði Akureyrar. Mörk Aftureldingar: Árni Bragi Eyjólfsson 8 (3 úr vítum), Elvar Ásgeirsson 6, Guðni Már Kristinsson 4, Gestur Ólafur Ingvarsson 3, Jón Heiðar Gunnarsson 1 og Mikk Pinnonen 1. Kristófer Fannar Guðmundsson hóf leik í marki Aftureldingar og varði 2 skot en Davíð Hlíðdal Svansson sem tók við varði 12 skot, þar af tvö vítaköst. Leikurinn var í beinni útsendingu á Akureyri TV smelltu hér til að horfa á leikinn. Með þessu stigi jafnaði Akureyri við Fram og Stjörnuna í deildinni, innbyrðis viðureignir liðanna gera það að verkum að Fram er í 8. sætinu, Akureyri því 9. en Stjarnan á botninum í 10. sæti. Reyndar á Stjarnan inni frestaðan leik gegn Valsmönnum.


Tengdar fréttir
Sverre stoltur af sínu liði		29. nóvember 2016 - Akureyri handboltafélag skrifar Viðtöl eftir leikinn í Mosfellsbæ Það eru ekki mörg viðtöl sem við finnum eftir jafnteflisleik Aftureldingar og Akureyrar á laugardaginn. Ívar Benediktsson stóð vaktina fyrir mbl.is og einnig tók fimmeinn.is viðtal við aðstoðarþjálfara Aftureldingar. Byrjum á viðtölum Ívars en hann ræddi við þjálfarana Sverre Andreas Jakobsson og Einar Andra Einarsson: Sverre: Strákarnir voru flottir „Við tökum þetta skref fyrir skref í baráttu fyrir lífi okkar í deildinni. Strákarnir voru flottir. Þeir þjappa sér betur og betur saman við hvert áfallið sem við verðum fyrir,“ sagði Sverre Andreas Jakobsson, þjálfari Akureyrar, eftir að liðið vann eitt stig í viðureign sinni við Aftureldingu í Olís-deild karla í handknattleik að Varmá í Mosfellsbæ í kvöld. „Menn berjast sem ein heild. Ég stoltur af þeim og er ánægður með að vera hluti af þessu liði,“ sagði Sverre enn fremur en lið hans varð fyrir enn einu áfallinu í kvöld þegar Karolis Stropus meiddist að því er virtist alvarlega í fyrri hálfleik. Hugsanlegt er að hann sé með slitna hásin. Sverre var í ham á hliðarlínunni. Mynd: Hanna K. Andrésdóttir visir.is „Við áttum alltaf skilið að fá eitthvað úr þessum leik og ef eitthvað var þá hefði verið sanngjarnt að sigur hefði fallið okkar megin. Það munaði litlu í lokin þegar síðasta skot okkar á markið fór rétt fram hjá á síðustu sekúndu. Þegar Afturelding jafnaði metin þá reyndum við að fá að minnsta kosti annað stigið og það tókst. Ég er mjög ánægður með stigið. Við höldum áfram baráttu okkar. Leiðin fram undan er löng og krefjandi. Við hugsum bara um næsta leik og ekki sentímetra lengra,“ sagði Sverre Andreas Jakobsson, þjálfari Akureyrar. Einar Andri: Rán að ná öðru stiginu „Í hreinskilni sagt þá áttum við ekki neitt skilið úr þessum leik,“ sagði Einar Andri Einarsson, þjálfari Aftureldingar, eftir jafntefli, 23:23, við Akureyri í Olís-deild karla í handknattleik að Varmá í kvöld. Akureyringar voru með yfirhöndina í leiknum allan leikinn. „Fyrri hálfleikur var hreinn skandall af okkar hálfu. Það var hreinlega ekki boðlegt af okkar hálfu að leika eins við gerðum. Þótt leikur okkar hafi skánað í seinni hálfleik þá var það nú kannski vegna þess að það var ekki hægt að leika mikið verr en í fyrri hálfleik,“ sagði Einar Andri. „Seinni hálfleikur snerist um að sýna að það væri eitthvað varið í okkur. Menn náðu varla að sýna fram á það,“ sagði Einar Andri og var ákaflega óhress með lið sitt að þessu sinni. „Akureyringar börðust eins og ljón og áttu sigurinn skilinn. Það var rán að við skyldum taka eitt stig úr þessum leik,“ sagði Einar Andri og bætti við að hann fyndi til með Akureyringum sem hugsanlega hefðu misst Karolis Stropus út úr liði sínu vegna alvarlegra meiðsla. „Þeir berjast vel og herðast við mótlætið. Ég held að öllum hafi verið ljóst að annað liðið lagði sig fullkomlega fram en ekki hitt,“ sagði Einar Andri Einarsson, þjálfari Aftureldingar, í samtali við mbl.is eftir leikinn að Varmá í kvöld. Einar Andri og Daði Hafþórsson leggja á ráðin þegar liðin mættust í KA heimilinu á síðasta tímabili Í svipaðan streng tók Daði Hafþórsson, aðstoðarþjálfari Aftureldingar í viðtali við vefinn fimmeinn.is. Daði: Miðað við frammistöðuna áttum við ekkert skilið í kvöld Daði Hafþórsson, annar þjálfari Aftureldingar, var langt frá því að vera sáttur með spilamennsku liðsins í kvöld og sagðist afar sáttur með jafntefli og það væri í raun ekki það sem liðið ætti skilið miðað við frammistöðuna sem það sýndi. „Þessi leikur er vonbrigði og við mættum ekki til leiks af fullum krafti. Það er í raun bæði varnarleikurinn og sóknin sem voru ekki í lagi í kvöld. Varnarleikurinn hélt einfaldlega ekki og sóknarleikurinn var allt of hægur“. „Þeir einfaldlega börðust eins og ljón Akureyringarnir og þeir eru bara ekki lið sem má vanmeta. Sverre hefur sýnt að hann er að gera mjög góða hluti með þetta lið Það er eins og þegar við mættum núna með nánast fullmannað lið að þá slaki menn eitthvað á og haldi að þetta gerist að sjálfu sér, það er bara alls ekki þannig sem það gerist. Við svo reynum að laga varnarleikinn í upphafi seinni hálfleiks með að spila 3-2-1 vörn á þá og vörnin skánaði við það en var alls ekki nægilega góð samt. Svo missa þeir sinn besta leikmann, Stropus af velli og við það laskast þeir aðeins, við fáum góðan kafla hjá Davíð í markinu. Þetta hleypir okkur aftur inn í leikinn en engu að síður vantaði okkur allt of margt í dag til að sigra svona leiki.“


Sverre og strákarnir ætla sér sigur í Mosó		26. nóvember 2016 - Akureyri handboltafélag skrifar Afturelding - Akureyri í beinni útsendingu Í dag mætir Akureyri toppliði Aftureldingar að Varmá klukkan 18:30. Það má búast við hörkuleik enda hafa síðustu viðureignir liðanna verið jafnar og spennandi. Við á heimasíðunni munum sýna leikinn beint þannig að það er um að gera að fylgjast vel með gangi mála ef þú kemst ekki í Mosfellsbæinn. SMELLTU HÉR TIL AÐ HORFA Á LEIKINN Hér fyrir neðan má svo sjá skemmtilegt myndband frá viðureign liðanna í KA-Heimilinu á síðustu leiktíð, áfram Akureyri!


Hörkuleikur framundan		26. nóvember 2016 - Akureyri handboltafélag skrifar Leikur dagsins: Afturelding – Akureyri í beinni Við minnum á að Akureyri sækir topplið Aftureldingar heim í kvöld klukkan 18:30. Það má reikna með hörkuleik og hvetjum við alla sem geta til að mæta að Varmá og hvetja strákana til sigurs, áfram Akureyri! Við munum sýna beint frá leiknum í kvöld smelltu hér til að fylgjast með leiknum. Liðin mættust í KA heimilinu á síðustu leiktíð þann 23. mars 2016. Gestirnir byrjuðu betur og leiddu 9-14 í hálfleik en Akureyringar komu sterkir til baka og úr varð hörkuleikur. Mosfellingar stóðu svo uppi sem sigurvegarar 24-26. Hér má sjá skemmtilegt myndband frá leiknum.


Afturelding hefur verið á miklu flugi það sem af er		22. nóvember 2016 - Akureyri handboltafélag skrifar Útileikur gegn Aftureldingu á laugardaginn Akureyri heldur í Mosfellsbæinn á laugardaginn og mætir þar toppliði Aftureldingar í 13. umferð Olísdeildar karla. Leikurinn hafði verið settur á sunnudaginn en Mosfellingar óskuðu eftir að færa leikinn fram á laugardag og nú hefur það verið fastákveðið. Leiktíminn er raunar nokkuð óvanalegur eða klukkan 18:30. Afturelding er sem áður segir á toppi deildarinnar með 18 stig eftir tólf leiki, þeir töpuðu má segja óvænt fyrir Selfyssingum í fyrsta leik deildarinnar en sneru í framhaldinu heldur betur við blaðinu og unnu næstu átta leikina. Sagan endurtók sig í upphafi annars hluta deildarinnar en þá tapaði Afturelding aftur fyrir Selfossi og máttu í kjölfarið sætta sig við stórtap, 17-35 gegn Haukum á heimavelli. Afturelding rétti síðan úr kútnum í síðustu umferð með góðum tíu marka útisigri á Fram, 28-38. Markahæstu menn liðsins í Olís deildinni eru Árni Bragi Eyjólfsson með 79 mörk, Birkir Benediktsson með 52, Elvar Ásgeirsson 38 og Mikk Pinnonen 35 mörk. Líkt og fleiri lið hefur Afturelding glímt við meiðsli lykilmanna, þannig hefur Mikk Pinnonen misst af síðustu fimm leikjum liðsins. Birkir Benediktsson meiddist í leiknum gegn Selfossi og missti fyrir vikið af tveim síðustu leikjum liðsins. Árni Bragi Eyjólfsson með mark úr hraðaupphlaupi í leik liðanna í september Liðin mættust hér á Akureyri 22. september og þar mátti Akureyri sætta sig við sex marka tap, 24-30 og þarf ekki að efast um að strákarnir ætla að kvitta fyrir þann leik. Við hvetjum alla norðanmenn sem verða í grennd við Mosfellsbæinn til að kíkja í Íþróttamiðstöðina á Varmá í Mosfellsbænum og styðja strákana í baráttunni á laugardagskvöldið. Við vitum ekki hvort Mosfellingar muni sýna beint frá leiknum en ef ekki þá munum við gera allt hvað við getum til að sýna leikinn á Akureyri TV, líkt og við gerðum á útileikjunum gegn Fram og Gróttu. Það skýrist allt þegar nær dregur leikdegi og verður auglýst hér á síðunni.

Til baka Senda á Facebook

Umsjón og hönnun: Stefán Jóhannsson og Ágúst Stefánsson

web statistics