1 dagur í leik: Fram liðið

Á morgun koma Íslandsmeistarar Fram í KA-Heimilið til að spila gegn Akureyri í 8-liða úrslitum SS-Bikarsins. Þetta verður án vafa einhver stærsti leikur ársins enda mun sigurliðið fara áfram í undanúrslit keppninnar. Heimasíðan hvetur alla til að mæta enda verður leikurinn frábær upplifun. Við skulum kíkja aðeins á Fram liðið fyrir leikinn.

Fram varð Íslandsmeistari í fyrra einfaldlega með öguðum varnarleik og um leið og boltinn vannst var keyrt á hitt liðið og andstæðingarnir hreinlega kaffærðir. Framarar eru að spila alveg eins bolta í ár.

Liðin mættust á heimavelli Fram á dögunum í DHL-Deildinni og þar unnu Framarar sigur 32-29. Akureyri lék mjög vel á köflum í leiknum en menn voru allt of seinir til baka. Skelfilegur kafli kom undir lok fyrri hálfleiks sem Framarar nýttu sér til hins fyllsta og náðu öruggri forystu.

Akureyri skellti hinsvegar toppliði Vals á heimavelli eftir að hafa tapað gegn Fram og munaði mestu um það að liðið var fljótt til baka og hélt haus allan leikinn. Það kom ekki þessi skelfilegi kafli sem hafði komið gegn Fram og gegn HK.

Ef Akureyri tekst að halda hraðanum niðri gegn Fram og verður fljótt til baka bæði eftir mörk og mistök þá verður gaman að leik loknum. Til að það gerist þarf liðið sem mestan stuðning og það þurfa allir að mæta á morgun klukkan 19:15.

Helstu leikmenn Fram
Sigfús Páll Sigfússon er maðurinn sem ber uppi sóknarleik Fram. Hann er aðeins 20 ára gamall en var valinn í fyrra sóknarmaður ársins og átti þátt í næstum öllum mörkum Fram. Hann er eldsnöggur og hugsar mikið um liðið, hann býr til færi fyrir alla leikmenn en getur einnig skorað vel sjálfur. Hann fór illa með Akureyri í leik liðanna fyrr í vetur og skoraði 9 mörk, mörg eftir hraða miðju. Það þarf að stöðva Siffa til að Akureyri geti komist í undanúrslit.

Jóhann Gunnar Einarsson er mjög mikilvægur í sóknarleik Fram, hann er öflug skytta og hefur sýnt það til að mynda í Meistaradeild Evrópu að hann getur skorað að vild. Hann er góð vítaskytta og hann hefur einnig virkilega góð skot fyrir utan. Markverðir Akureyrar þurfa að vera vel stemmdir fyrir leikinn svo Jóhann raði ekki inn mörkunum.

Brjánn Guðni Bjarnason er aðalvarnarmaður Framara, hann kom til liðsins fyrir tímabilið til að fylla í skarðið sem Sverre Andreas Jakobsson skildi eftir. Brjánn hefur verið mjög öflugur í liði Fram, og eitt er víst að ef að hann kemst í gang þá fer öll vörn Framara í gang. Akureyri þarf að spila agaðan sóknarleik og þarf að halda haus allan leikinn.

Björgvin Páll Gústavsson er markvörður Fram, hann kom til liðsins fyrir tímabilið og hefur verið frábær. Hann hinsvegar getur misst sig í leikjum og ef Akureyri mætir nógu vel stemmt til leiks og byrjar af miklum krafti er aldrei að vita nema að Björgvin fari að hugsa um eitthvað allt annað en það sem hann á að vera að hugsa um.


Mætum öll, Akureyri þarf á öllum stuðningi að halda sem í boði er!