
Fréttir - Leikir tímabilsins - Leikmenn - Stjórn - Saga og tölfræði - Höllin - Lagið - Myndir - Myndbönd - Tenglar
- Úrvalsdeild karla - Senda skilaboð - Vefur KA - Vefur Þór - Fréttaleit

Stjarnan-Akureyri 28-23
Þri. 4. apr. 2017
Olís deild karla

ÍBV-Akureyri 22-22
Mið. 29. mar. 2017
Olís deild karla

Stjarnan U-Akureyri U 35-30
Fös. 7. apr. 2017
1. deild karla

Akureyri U-KR 34-30
Fös. 31. mar. 2017
1. deild karla

deildin staðan

Fréttir

Þú flettir milli frétta með örvalyklunum eða smellir á bláu örvarnar!

Hörður Fannar gaf ekkert eftir frekar en fyrri daginn

5.mars 2009 - Akureyri handboltafélag skrifar

Háspennuleik lyktaði með jafntefli

Það var ekki laust við að taugarnar væru þandar hjá leikmönnum Akureyrar og HK þegar liðin mættust í Höllinni í gær enda mikið í húfi hjá báðum liðum. Rúnar þjálfari byrjaði í skyttustöðunni vinstra megin og það voru heimamenn sem tóku frumkvæðið í leiknum þó að jafnt væri á öllum tölum upp í stöðuna 4-4. Þá komu tvö mörk í röð frá Herði Fannari og Akureyri komið í 6-4. Sá munur hélst síðan lengst af í fyrri hálfleik þar til HK tókst að jafna í 11-11 en Akureyri átti síðasta orðið í hálfleiknum og fór með eins marks forystu 12-11 í leikhléð.

Handboltinn sem liðin buðu upp á var ekki sá glæsilegasti sem sést hefur, sóknarleikurinn frekar varfærnislegur og ekki tekin mikil áhætta.

Hörður Fannar var öflugur á línunni en perla hálfleiksins var þó tvímælalaust undir lok hálfleiksins þegar Björn Óli sem var nýkominn inná, fintaði sig á stórbrotinn hátt í gegnum HK vörnina og lagði boltann í netið án þess að nokkrum vörnum yrði komið við.

Hálfleiknum lauk með því að Akureyri fékk aukakast og var Björn Óli eldsnöggur að skila boltanum í netið en dómarar leiksins virtust ekki vera að fylgjast með og létu hann endurtaka aukakastið sem hafnaði í varnarvegg HK í seinna skiptið.

Hafþór stóð í markinu og byrjaði ágætlega, tók marga góða bolta.

Byrjun seinni hálfleiks lofaði góðu, Hafþór ver og Rúnar jók muninn í tvö mörk. Andri Snær fékk þungt högg í andlitið og var utan vallar með fossandi blóðnasir mestallan hálfleikinn. HK menn tvíefldust og skoruðu þrjú mörk í röð og komust þar með yfir í fyrsta sinn í leiknum 13-14 og síðan í 14-17. Á þessum tíma var sóknarleikurinn vandræðalegur og lítið fór fyrir markvörslu. Þessi 2 – 3 marka munur hélst lengst af, Árni Sigtryggsson hélt lífi í leiknum með fínum mörkum utan af velli og virðist allur vera að koma til í skothöndinni.

Hörður Flóki kom í markið og átti fína innkomu. Þegar sjö mínútur voru eftir af leiknum hafði loksins tekist að tjasla Andra Snæ saman og kom hann með aukinn kraft í sóknarleikinn.

Útlitið var þó ekki bjart, fjórar mínútur til leiksloka og HK með vænlega stöðu 21-24 og í sókn. En þá sýndu leikmenn Akureyrar frábæran karakter og sneru leiknum gjörsamlega. Hörður Fannar minnkar muninn í tvö mörk, næsta sókn HK brotin á bak aftur og HK menn brjóta illa á Andra Snæ í hraðaupphlaupi sem kostar þá brottvísun og vítakast. Goran Gusic skoraði af öryggi úr vítinu, Hörður Flóki ver meistaralega frá HK þakið ætlaði að rifna af Höllinni þegar Andri Snær fór inn úr vinstra horninu og jafnaði leikinn í 24-24.

Vörnin hirti síðan boltann af HK mönnum sem virtust alveg heillum horfnir og það var svo Goran sem kórónaði flotta innkomu í lokin með því að skorar af öryggi úr hægra horninu og kom Akureyri loksins yfir á ný 25-24 og einungis 45 sekúndur til leiksloka. Vörn Akureyrar virtist ætla að halda þetta út en í blálokin barst boltinn úr í hornið á Ásbjörn Stefánsson sem var búinn að vera öryggið uppmálaði allan leikinn og hann hélt uppteknum hætti og náði að jafna fyrir HK þegar fjórar sekúndur voru til leiksloka.

Það tók ótrúlega langan tíma að klára þessar fjórar sekúndur sem eftir lifðu, Akureyri fékk aukakast á miðju vallarins þegar leiktíminn var liðinn, HK menn mölduðu í móinn og Sverre Jakobsson uppskar brottvísun en leiknum lauk sem sé með jafntefli 25-25.

Vissulega var það súrt að missa leikinn í jafntefli eftir að hafa komist yfir en trúlega má segja að þetta hafi verið sanngjörn úrslit að lokum.

Dómarar leiksins, þeir Ingvar Guðjónsson og Jónas Elíasson höfðu nokkuð góð tök á honum enda má segja að hann hafi í heildina verið mjög prúðmannlega leikinn. Til marks um það voru aðeins dæmd tvö vítaköst í öllum leiknum, eitt á hvort lið og sá einnig má telja það til tíðinda að engum leikmanni Akureyrar var vísað af velli í leiknum.

Það var margt jákvætt í leiknum og ekki auðvelt að taka einstaka leikmenn út en við ætlum þó að útnefna Hörð Fannar Sigþórsson sem mann leiksins en hann var feykiöflugur bæði í sókn og sennilega í fyrsta sinn á ferlinum aldrei vísað af leikvelli!

Mörk Akureyrar skoruðu: Árni 7, Andri Snær og Hörður Fannar 4 hvor, Jónatan 3, Björn Óli og Goran 2 hvor, Heiðar, Oddur og Rúnar síðan 1 mark hver.

Eins og áður segir átti Hafþór fínan fyrri hálfleik í markinu en fann sig ekki í þeim seinni en Hörður Fannar varði vel á lokakafla leiksins.

Að þessu sinni hófst leikurinn hálftíma fyrr en venjulega og trúlega hafa margir ekki áttað sig á því, allavega voru óvenjufáir áhorfendur mætti þegar leikurinn hófst en þeim fjölgaði ört og eftir tuttugu mínútna leik voru um 600 manns mættir í stúkuna.

Baráttan um sæti í fjögurra liða úrslitum er afar hörð, Haukar og Valur eru nokkuð örugg en ljóst að baráttan stendur á milli HK, Fram, FH og Akureyrar um hin tvö sætin. Næsti leikur Akureyrar er á mánudagskvöldið, útileikur gegn Stjörnunni og síðan heimaleikur gegn Haukum á óvenjulegum tíma, föstudaginn 13. mars klukkan 18:00 og þá er eins gott að allir mæti tímanlega í Höllina.

Staðan í N1-deildinni er nú sem hér segir:

Nr.	Félag	Leikir	U	J	T	Mörk	Hlutfall	Stig		-
1.	Haukar	17	13	0	4	491 : 422	69	26	:	8
2.	Valur	17	10	3	4	469 : 400	69	23	:	11
3.	Fram	17	8	3	6	467 : 466	1	19	:	15
4.	HK	17	7	4	6	451 : 459	-8	18	:	16
5.	FH	17	8	2	7	507 : 502	5	18	:	16
6.	Akureyri	17	7	2	8	437 : 462	-25	16	:	18
7.	Stjarnan	17	4	3	10	425 : 463	-38	11	:	23
8.	Víkingur	17	2	1	14	418 : 491	-73	5	:	29

Fletta milli frétta

Til baka

Senda á Facebook

Umsjón og hönnun: Stefán Jóhannsson og Ágúst Stefánsson