Bergvin fingurbrotinn

Segja má að sigurinn hjá strákunum í 2. flokki gegn Fram hafi verið dýru verði keyptur þar sem að Bergvin Gíslason varð fyrir meiðslum sem binda enda á tímabilið hjá honum.

Bergvin fékk högg á hægri höndina í síðari hálfleik sem olli því að bein í þumalfingri brotnaði. Bergvin hefur verið einn af máttarstólpum liðsins í vetur enda fjölhæfur leikmaður sem leyst hefur hinar ýmsu stöður.

Frammistaða hans hefur orðið til þess að hann hefur fengið tækifæri í liði meistaraflokks og staðið sig þar vel.


Bergvin í sínum fyrsta meistaraflokksleik, gegn HK þann 4. mars

Það er því ljóst að Bergvin getur ekki tekið þátt í fjögurra liða úrslitum annars flokks sem fram fer um næstu helgi. Strákarnir mæta þá liði ÍR í undanúrslitunum á laugardag og hefst leikurinn klukkan 14.

Í hinum undanúrslitaleiknum eigast við Hafnarfjarðarliðin FH og Haukar en sá leikur hefst klukkan 12. Sigurvegarar þessara leikja spila svo til úrslita um Íslandsmeistaratitilinn á sunnudag og fara allir þessir leikir fram í Íþróttahúsinu við Strandgötu í Hafnarfirði.