
Fréttir - Leikir tímabilsins - Leikmenn - Stjórn - Saga og tölfræði - Höllin - Lagið - Myndir - Myndbönd - Tenglar
- Úrvalsdeild karla - Senda skilaboð - Vefur KA - Vefur Þór - Fréttaleit

Stjarnan-Akureyri 28-23
Þri. 4. apr. 2017
Olís deild karla

ÍBV-Akureyri 22-22
Mið. 29. mar. 2017
Olís deild karla

Stjarnan U-Akureyri U 35-30
Fös. 7. apr. 2017
1. deild karla

Akureyri U-KR 34-30
Fös. 31. mar. 2017
1. deild karla

deildin staðan

Fréttir

Þú flettir milli frétta með örvalyklunum eða smellir á bláu örvarnar!

Guðmundur Hólmar, Heimir og Stefán Guðnason fóru heldur betur á kostum í dag

16. október 2010 - Akureyri handboltafélag skrifar

Dramatískur sigur Akureyrar á Fram - umfjöllun

Það vantaði ekki dramatíkina og spennuna í leik Fram og Akureyrar sem sýndur var beint í sjónvarpinu í dag. Líkt og í fyrstu tveim leikjunum hikstaði Akureyrarliðið á upphafsmínútunum og lentu 4-1 undir en þá fóru menn að sýna sitt rétta andlit. Guðmundur Hólmar jafnaði í 6-6 eftir sextán mínútna leik og í kjölfarið komst Akureyri yfir í 6-7 og síðan 7-8.

Fram jafnaði og náði frumkvæðinu í leiknum og náði tveggja marka forystu 12-10 meðan lítið gekk hjá Akureyri og Fram sigldi framúr með fjögurra marka forystu 7-13 í hálfleik.

Eftir góðan sprett um miðbik hálfleiksins voru lokamínúturnar frekar slakar. Vörnin náði sér ekki almennilega á strik en Sveinbjörn átti þrátt fyrir það þokkalegan leik í markinu. Heimir Örn Árnason var gríðarlega öflugur í sókninni og skoraði fjögur mikilvæg mörk.

Akureyrarliðið byrjaði seinni hálfleikinn af krafti, skoraði fyrstu tvö mörkin og Guðmundur Hólmar Helgason minnkaði muninn í eitt mark, 18-17 með tveim dúndurskotum. Fram liðið lagði þó ekki árar í bát og náði aftur fjögurra marka forystu 21-17. Lengst af hálfleiksins hafði Fram 2 – 4 marka forystu og virtust alltaf ná að svara fyrir sig við hverja atlögu Akureyrar.

En Akureyrarliðið gafst aldrei upp og greinilegt að gríðarleg einbeiting býr í mannskapnum. Sem dæmi um það má nefna að þegar Sveinbjörn fékk á sig ódýrt mark frá Halldóri Jóhanni Sigfússyni þótti honum það ekki boðlegt, skipti sjálfum sér útaf og Stefán Guðnason kom í markið í stöðunni 27-23.

Þegar rúmar tíu mínútur voru til leiksloka var staðan 28-24 fyrir Fram og flestir trúlega farnir að bóka öruggan sigur þeirra í leiknum, ekki síst í stöðunni 31-28. En þessar lokamínútur verða lengi í minnum hafðar. Grimmdin kom upp í vörninni og innkoma Stefáns Guðnasonar var hreint út sagt mögnuð, á þessum tíma varði hann sjö skot og þar af tvö vítaköst með tilþrifum. Heimir Örn Árnason var yfirvegaður í lokin, skoraði tvö mörk og jafnaði í 31-31 áður en Guðmundur Hólmar Helgason kórónaði stórkostlegan leik sinn þegar hann skoraði tólfta mark sitt í leiknum sem jafnframt reyndist sigurmarkið 31-32.

Fram fékk reyndar dauðafæri til að jafna leikinn en Stefán Guðnason setti punktinn yfir i-ið með glæsilegri vörslu.

Fram fékk boltann á lokasekúndum leiksins en Hörður Fannar tók enga áhættu og hindraði að Fram kæmist í sókn og fékk rautt spjald að launum.

Það var því stiginn trylltur norðlenskur sigurdans í Safamýrinni en Framarar að sama skapi svekktir að fara tómhentir eftir að hafa haft þægilega forystu lengst af í leiknum.

Guðmundur Hólmar Helgason átti stórbrotinn seinni hálfleik þar sem hann skoraði níu mörk með þrumuskotum og tólf mörk alls í leiknum. Heimir Örn Árnason lék að sama skapi einn sinn besta leik fyrir Akureyrarliðið, níu mörk og stjórnaði sóknarleiknum eins og hershöfðingi.

Þrátt fyrir þennan góða sigur þá er ljóst að það býr miklu meira í liðinu, Oddur Gretarsson, Bjarni Fritzson, Hörður Fannar Sigþórsson og Geir Guðmundusson eiga t.d. mikið inni. Liðið fékk aðeins tvö vítaköst í leiknum og vakti athygli að þau fóru bæði forgörðum sem er mjög óvanalegt.

Mörk Akureyrar: Guðmundur Hólmar Helgason 12, Heimir Örn Árnason 9, Bjarni Fritzson 4, Oddur Gretarsson 4, Guðlaugur Arnarsson 2 og Hörður Fannar Sigþórsson 1 mark.

Sveinbjörn Pétursson varði 13 skot og Stefán Guðnason 7 og þar af tvö vítaköst eins og áður segir.

Hjá Fram voru Jóhann Gunnar Einarsson og Róbert Aron Hostert langatkvæðamestir í markaskorun og Magnús Gunnar Erlendsson öflugur í markinu.

Sannarlega mikilvægur sigur sem þýðir að Akureyri og FH eru á toppi deildarinnar með fullt hús stiga.

Staðan í deildinni eftir þrjár umferðir

Nr.	Félag	Leikir	U	J	T	Mörk	Hlutfall	Stig		-
1.	FH	3	3	0	0	93 : 69	24	6	:	0
2.	Akureyri	3	3	0	0	101 : 83	18	6	:	0
3.	HK	3	2	0	1	95 : 98	-3	4	:	2
4.	Haukar	3	2	0	1	72 : 76	-4	4	:	2
5.	Fram	3	1	0	2	93 : 92	1	2	:	4
6.	Selfoss	3	1	0	2	84 : 94	-10	2	:	4
7.	Valur	3	0	0	3	84 : 95	-11	0	:	6
8.	Afturelding	3	0	0	3	70 : 85	-15	0	:	6

Myndir frá leiknum og umfjöllun er komin á sport.is

Þeir sem misstu af leiknum geta horft á hann á vef RÚV allavega næstu tvær vikurnar. Smelltu hér til að horfa á leikinn.

Næsta verkefni liðsins er bikarleikur á þriðjudaginn gegn HK í Kópavogi og síðan heimaleikur gegn Haukum en sá leikur verður föstudaginn 22. október klukkan 19:00 í Íþróttahöllinni.

Fletta milli frétta

Til baka

Senda á Facebook

Umsjón og hönnun: Stefán Jóhannsson og Ágúst Stefánsson