Hvað sögðu menn eftir Aftureldingarleikinn?


Fréttir - Leikir tímabilsins - Leikmenn - Stjórn - Saga og tölfræði - Höllin - Lagið - Myndir - Myndbönd - Tenglar
- Úrvalsdeild karla - Senda skilaboð - Vefur KA - Vefur Þór - Fréttaleit

Meistarafl. karla

Næstu leikir

Nýjustu úrslit

Stjarnan-Akureyri 28-23
Þri. 4. apr. 2017
Olís deild karla

ÍBV-Akureyri 22-22
Mið. 29. mar. 2017
Olís deild karla

Stjarnan U-Akureyri U 35-30
Fös. 7. apr. 2017
1. deild karla

Akureyri U-KR 34-30
Fös. 31. mar. 2017
1. deild karla

deildin staðan

Fréttir

Þú flettir milli frétta með örvalyklunum eða smellir á bláu örvarnar!


Sæt stund í Höllinni á fimmtudagskvöldið		2. apríl 2011 - Akureyri handboltafélag skrifar Hvað sögðu menn eftir Aftureldingarleikinn? Eins og við er að búast þá blönduðust saman viðtöl um leik Akureyrar og Aftureldingar og að sjálfsögðu deildarmeistaratitilinn á fimmtudagskvöldið. Byrjum að þessu sinni á viðtölum Andra Yrkils Valssonar á Morgunblaðinu: Sveinbjörn Pétursson: Mikill heiður að fá að spila með Akureyri „Það er mikill heiður að fá að spila með Akureyri og ég er rosalega stoltur að hafa unnið þennan bikar með liðinu,“ sagði Sveinbjörn Pétursson, markvörður Akureyrar, eftir að liðið tók á móti deildarmeistaratitlinum þrátt fyrir tap gegn Aftureldingu, 21:24. „Mér fannst menn mæta kannski svolítið kærulausir til leiks en það gerist auðvitað ósjálfrátt þegar við höfum ekki heyrt annað í vikunni nema að við munum lyfta þessum bikar. Þá gleymast aðalatriðin og það sem við lögðum upp með, en við náðum aðeins að laga þetta þegar á leið. Við spiluðum með mjög breytt lið í dag þar sem margir fengu að spreyta sig. Gulli [Guðlaugur Arnarsson] og Höddi [Hörður Fannar Sigþórsson]fengu alveg hvíld vegna smávægilegra meiðsla og sumir nýttu tækifærið í kjölfarið en sumir ekki. Ég reyndi að undirbúa mig fyrir þennan leik eins og hvern annan en ég veit ekki með hina. En það er alveg frábært að lyfta bikar með Akureyri Handboltafélagi og það eiga rosalega margir hlut í honum: áhorfendurnir, fólkið sem kom að myndun félagsins, fólkið sem sér um umgjörðina á heimaleikjunum og svo á allur bærinn sinn hlut í þessu.“ Stór stund hjá Sveinbirni Sveinbjörn er sem kunnugt er í láni hjá Akureyri frá HK, en aðspurður hvar hann muni spila á næsta tímabili er fátt um svör. „Það er alveg óvitað en ég get allavega svarað því að ég er ekki á leiðinni til Reykjavíkur. Ég reyni að hugsa sem minnst um hvað mun gerast í sumar og næsta vetur og einbeiti mér bara að mínum leik eins vel og ég get.“ Atli Hilmarsson: Súrsætt að taka við titlinum eftir tapleik „Það var hálf súrt að taka á móti titlinum eftir tapleik,“ sagði Atli Hilmarsson, þjálfari Akureyrar. „Þetta var ekki einn af okkar bestu leikjum en það er bara svona. Afturelding var að berjast fyrir lífi sínu og spiluðu mjög vel í leiknum. Við fengum fín færi en klikkuðum mikið í dauðafærum á móti Hafþóri og því fór sem fór. Varnarleikurinn var aðeins betri í síðari hálfleik en við vorum að klúðra hraðaupphlaupum sem hafa verið okkar helsta vopn og það telur mikið. Svo Ég hugsa að menn hafi bara verið með hugann við bikarinn enda er það skiljanlegt.“ Eitt af einkennum Akureyrar í vetur hefur verið hvað þeir keyra mikið á sama liðinu. Atli leyfði hins vegar fleirum að spila í þessum leik og var ánægður með þeirra framlag. „Ég er ánægður með þá sem fengu langþráð tækifæri í leiknum og það er ekkert hægt að kvarta undan þeirra framlagi. Ég ákvað að hvíla Gulla og Hödda sem hafa verið meiddir en koma frískir til leiks í úrslitakeppninni. Við sjáum svo bara til hvernig staðan verður í næstu viku á móti Fram og svo tekur bara undirbúningur fyrir úrslitakeppnina við. Svo það er ágætt að eiga einn leik sem við getum farið í frekar rólegir eins og raunin var með þennan,“ sagði Atli við Mbl.is. Oddur Gretarsson: Þetta er meiriháttar „Við prófuðum ýmislegt nýtt í þessum leik sem getur kannski skýrt hvað við vorum sveiflukenndir, við prófuðum nýjan varnarleik og margir fengu að spila sem stóðu sig engu að síður mjög vel. En við eigum samt sem áður að gera betur en við gerðum í þessum leik. Auðvitað hefðum við viljað enda þetta betur en það er rosalega erfitt að gíra sig upp fyrir svona leik þar sem maður veit hvað bíður í leikslok. En það sem skiptir máli er bikarinn og það er frábært að fá hann loksins í hús. Við munum fagna vel í kvöld en svo hefst bara undirbúningur fyrir næsta leik ásamt úrslitakeppninni. Auðvitað er súrt að tapa en við látum það ekki eyðileggja gleðina,“ sagði Oddur. Oddur lengst til hægri fagnar bikarnum Sverrir Hermannsson: Algjör úrslitaleikur fyrir okkur „Þetta er rosalega mikilvægur sigur,“ sagði Sverrir Hermannsson, leikmaður Aftureldingar, eftir sigurinn á nýkrýndum deildarmeisturum Akureyrar, 24:21. „Þetta var algjör úrslitaleikur fyrir okkur og við töluðum um að það væri miklu betra að taka sigur hérna fyrir norðan en treysta á hreinan úrslitaleik á móti Selfossi þar sem það verður mjög erfiður leikur. Gæðin í leiknum voru ekki þau bestu þar sem varnarleikurinn var í aðalhlutverki en spurningin fyrir okkur var bara að lifa þetta af. Þetta var þriðji leikurinn á rúmri viku og nú skipti úthaldið sköpum. Með þennan sigur í farteskinu mætum við enn ákveðnari til leiks á móti Selfossi og ætlum að sýna að við séum betri en þeir. Við erum ákveðnir að klára tímabilið með stæl,“ sagði Sverrir við Mbl.is. Sverrir, númer 14 þjarmar að Heimi Erni í leiknum Hafþór Einarsson: Stóðum vel saman í þessum leik Samherji hans Hafþór Einarsson var ekki síður ánægður. „Eina sem skiptir mig máli er að vinna, það er svo einfalt,“ sagði Hafþór Einarsson, markvörður Aftureldingar, en hann átti stórleik og varði 26 skot, þar af tvö vítaköst, gegn sínum gömlu félögum í Akureyri. „Skiptir ekki máli hvort maður verji einn bolta eða tíu, eina sem skiptir máli er sigur. Við höfum verið rosalega sveiflukenndir í vetur og þurftum á þessum stigum að halda. Hafþór tekur við viðurkenningu sinni, besti leikmaður Aftureldingar Við stóðum vel saman í þessum leik og vonandi náum við að halda þeim dampi í næsta leik á móti Selfossi og eins í umspilinu enda ætlum við að halda sæti okkar í deildinni þar sem við eigum heima. Það er rosalega góð tilfinning fyrir okkur að landa þessum sigri, sérstaklega þegar við erum að heyra að Selfoss hafi tapað. Sigurinn skiptir okkur gífurlega miklu máli og það léttir óneitanlega mikið á okkur að þurfa ekki í hreinan úrslitaleik á móti Selfossi. En það verður engu að síður mikill baráttuleikur og vonandi fáum við fullt af fólki með okkur. Síðan tekur bara við undirbúningur fyrir umspilið.“ Þá kíkjum við á viðtöl Þrastar Ernis Viðarssonar á Vikudegi sem ræddi við Heimi Örn Árnason og Hafþór Einarsson: Heimir Örn Árnason: Geggjað að lyfta bikarnum Heimir Örn Árnason, fyrirliði Akureyrar Handboltafélags, fékk þann heiður að lyfta fyrsta titli félagsins þegar deildarbikarinn fór á loft í Höllinni eftir tapleikinn gegn Aftureldingu í kvöld í N1-deild karla. Leikmenn Akureyrar voru fljótir að jafna sig eftir tapið og brutust út mikil fagnaðarlæti í Höllinni þegar bikarinn fór á loft fyrir framan 859 áhorfendur. „Það var geggjað að lyfta bikarnum og frábær tilfinning að gera það fyrstur manna fyrir þetta félag,“ sagði Heimir við Vikudag eftir leik. Fyrsti stóri bikarinn í sögu félagsins fer á loft Hann viðurkenndi að leikur sinna manna í kvöld hafi ekki verið upp á marga fiska. „Við vorum 2-3 mínútur að jafna okkur eftir leikinn en svo var það bara búið. Þetta var ömurlegur leikur hjá okkur. Við ætluðum að reyna að gíra okkur upp en það tókst bara ekki. Við vorum bara komnir með hugann við bikarinn og vorum að hvíla lykilmenn en á fimmtudaginn næsta ætlum við sýna betri leik gegn Fram. Það var svo sem ágætt að norðanmaður var sennilega að tryggja Aftureldingu áframhaldandi sæti í deildinni,“ sagði Heimir og vísaði þar til Hafþórs Einarssonar sem var erfiður viðureignar í kvöld í marki gestanna. Hafþór Einarsson: Gekk vel í kvöld Sem fyrr segir átti Hafþór Einarsson markvörður Aftureldingar stórleik og skóp hann sigurinn fyrir sitt lið í kvöld með 26 skot varin í leiknum. „Þetta gekk rosalega vel í kvöld hjá mér. Þetta var mikilvægur sigur fyrir okkur og getur tryggt okkur í umspil. Fyrir okkur var þetta baráttuleikur og við lögðum upp með það að berjast,“ sagði Hafþór sem hrósaði liði Akureyrar fyrir gott gengi í vetur. „Þetta var náttúrulega komið hjá þeim fyrir leikinn í kvöld. Þeir hafa verið frábærir í vetur og það verður mjög gaman að fylgjast með þeim í úrslitakeppninni,“ sagði Hafþór. Að lokum sjáum við hvað Hjalti Þór Hreinsson blaðamaður visir.is og Fréttablaðsins fékk upp úr mönnum: Heimir Örn: Menn eins og Uxinn mega ekki gleymast Fyrirliðinn Heimir Örn Árnason lék sér að því að henda bikarnum fyrir sigur í N1-deildinni á loft í kvöld. Mikil stemning var í Höllinni á Akureyri þegar bikarinn flaug á loft hjá fyrirliðanum sem sjálfur var kampakátur. „Leikurinn var ekki góður, en auðvitað er frábært að taka á móti bikarnum. Það tók okkur þrjár mínútur að jafna okkur eftir leikinn en núna er bara gleði. Það var smá barátta í þessu í seinni hálfleik en enginn sóknarleikur,“ sagði Heimir. „Það var margt skemmtilegt í leiknum, Þorvaldur (Þorvaldsson) kom skemmtilegur inn. En okkur er svosem nokk sama um úrslitin. Ég frétti að FH og HK hefðu unnið. Það verður spennandi að sjá hvað FH gerir í næsta leik, hvort þeir tapi ekki,“ sagði Heimir sposkur. Hann segir að liðsheildin sé lykillinn að titlinum sem er langþráður hjá hinu unga félagi. „Menn eins og Stefán „Uxi“ Guðnason eru að gera frábæra hluti fyrir hópinn og þeir mega ekki gleymast. Hann er hundleiðinlegur sektarstjóri en hann bætir það upp með góðum fótbolta. Og handbolta. Uxinn er svakalegur,“ sagði Heimir og hljóp svo til að fagna með frábærum stuðningsmönnum liðsins. Hörður Fannar Sigþórsson: erum með gott lið og allt hefur smollið Akureyri uppskar ríkulega í gær þegar hið unga félag fékk bikarinn fyrir sigur í N1-deildinni afhendan. Aðeins einn leikmaður hefur tekið fullan þátt í öllum fimm tímabilunum sem Akureyri Handboltafélag hefur spilað. Hörður Fannar Sigþórsson er maðurinn en reyndar hefur Þorvaldur Þorvaldsson spilað eitthvað öll tímabilin. „Það er virkilega góð tilfinning að ná loksins í titil. Við höfum verið í sénsum en aldrei tekið þá. Það er kærkomið að landa þessu og frábært fyrir svona ungt félag,“ sagði Hörður Fannar. „Uppbyggingin hefur tekið smá tíma en við höfum tekið skref í rétta átt. Við erum með gott lið og allt hefur smollið. Margir efuðust kannski um okkur eftir að hafa misst sterka pósta en við fengum nýjan þjálfara og frábæra leikmenn inn. Þeir hafa spilað stórt hlutverk. Umgjörðin er samt aðalatriðið, allt frá leikmönnum, þjálfurum og stjórn til stuðningsmanna, þetta helst allt í hendur,“ sagði Hörður. Hörður Fannar fær aðstoð við að lyfta bikarnum Atli Hilmarsson: Með betra lið í höndunum en ég hélt Atli Hilmarsson kom norður á handboltavertíð eins og hann kallaði það. Atli landaði strax titli og er með sigurstranglegt lið í höndunum. „Þetta hefur tekið á. Þetta er mjög erfið deild en að vera búnir að klára þetta löngu fyrir mótslok er frábært. Við getum verið stolt af liðinu, allir sem einn, í kringum félagið,“ sagði Atli. „Ég var ekki lengi að koma mér inn í hlutina. Strákarnir eru auðveldir í umgengni og hafa mikinn metnað. Maður gerði samt aldrei ráð fyrir þessum árangri. Ég er með betra lið en ég hélt í höndunum. Ég vissi ekki að 17 og 18 ára guttar myndu stíga svona upp en þeir eldri hafa kennt þeim vel,“ sagði Atli. Hafþór Einarsson: Okkar úrslitakeppni er framundan Afturelding felldi Selfoss með sigrinum. Liðið keppir í fjögurra liða úrslitakeppni um laust sæti í N1-deildinni á næsta tímabili. „Það er magnað að hafa tryggt þetta. Það er magnað að hafa svona stuðning í kringum sig, ekki endilega á bakvið sig, en í kringum sig,“ sagði Hafþór Einarsson, markmaður, brosandi. Hann var lang besti maður vallarins, algjörlega frábær, og lokaði á sína gömlu félaga hvað eftir annað. „Það eru erfiðir leikir eftir. Okkar úrslitakeppni er framundan. Við verðum að byggja á þessum sigri,“ sagði Hafþór sem fannst liðið eiga sigurinn skilinn. „Við urðum að berjast eins og grenjandi ljón. Við vorum stemdir í leikinn, alveg tilbúnir, og lögðum okkur 100% fram. Við erum alltaf inni í leiknum þrátt fyrir að henda boltanum ítrekað frá okkur. Þetta var baráttusigur og með þessari baráttu uppskárum við sigurinn,“ sagði Hafþór.
Fletta milli frétta	Til baka Senda á Facebook