Hvernig var hljóðið í mönnum eftir oddaleikinn?


Fréttir - Leikir tímabilsins - Leikmenn - Stjórn - Saga og tölfræði - Höllin - Lagið - Myndir - Myndbönd - Tenglar
- Úrvalsdeild karla - Senda skilaboð - Vefur KA - Vefur Þór - Fréttaleit

Meistarafl. karla

Næstu leikir

Nýjustu úrslit

Stjarnan-Akureyri 28-23
Þri. 4. apr. 2017
Olís deild karla

ÍBV-Akureyri 22-22
Mið. 29. mar. 2017
Olís deild karla

Stjarnan U-Akureyri U 35-30
Fös. 7. apr. 2017
1. deild karla

Akureyri U-KR 34-30
Fös. 31. mar. 2017
1. deild karla

deildin staðan

Fréttir

Þú flettir milli frétta með örvalyklunum eða smellir á bláu örvarnar!


Hörður Fannar skorar gegn HK		20. apríl 2011 - Akureyri handboltafélag skrifar Hvernig var hljóðið í mönnum eftir oddaleikinn? Það er af ýmsu að taka eftir oddaleikinn milli Akureyrar og HK, hefðbundin blaðaviðtöl og vídeóviðtöl. Við byrjum á viðtölum Þrastar Ernis Viðarssonar á Vikudegi sem hitti Odd Gretarsson, Guðmund Hólmar og Ólaf Bjarka: Oddur: Áhorfendurnir okkar áttundi maður „Tilfinningin er bara svakalega góð og held að ég hafi aldrei spilað jafn skemmtilegan leik í þessu húsi áður,“ sagði Oddur Gretarsson eftir sigur Akureyrar gegn HK. „Áhorfendurnir voru algjörlega frábærir og þeir voru okkar áttundi maður í leiknum. Svona eiga bara oddaleikir að vera og þetta var alvöru leikur Þetta var hnífjafnt allan tímann en við náðum þriggja marka forystu sem var mikilvægt. Við vorum með hausinn í lagi allan tímann. Ég verð að hrósa liði HK sem eru alveg frábærir en við vorum betri. Mér er alveg sama hvaða liði við mætum í úrslitum, við ætlum að taka Íslandsmeistaratitilinn,“ sagði Oddur en FH verður andstæðingur Akureyringar í úrslitum. Oddur Gretarsson átti magnaðan leik Guðmundur Hólmar Helgason: Þurftum að hafa okkur alla við „Það var eitthvað af þessu sem fór inn hjá mér en það voru líka mörg skot að klikka hjá mér. Við unnum hins vegar og það var það sem skiptir máli,“ sagði Guðmundur Hólmar Helgason leikmaður Akureyrar, en hann skoraði átta mörk í kvöld. „Þetta var hörkuleikur. HK-menn eru með frábært lið og við þurftum að hafa okkur alla við til þess að vinna í kvöld. Mér líst vel á FH-inga í úrslitunum. Þeir eru með hörkulið og þetta verður eflaust fimm leikja rimma. Við þurfum að leggja okkur alla fram í úrslitunum líkt og í kvöld til þess að verða Íslandsmeistarar en það er að sjálfsögðu takamarkið,“ sagði Guðmundur. Guðmundur Hólmar með mark í uppsiglingu Ólafur Bjarki Ragnarsson: Hefði viljað vinna leikinn „Þetta var mjög tæpt og stál í stál allan tímann. Akureyringar eru með frábært lið og með frábæra áhorfendur. Við vissum að þetta yrði hörkuleikur og spennandi allan tímann en þeir voru betri í lokin. Ég var ágætlega sáttur með okkur í kvöld en ég hefði auðvitað vilja vinna leikinn. Það voru nokkur atriði í leiknum hjá okkur í kvöld þar sem við vorum að henda boltanum frá okkur en annars get ég ekki kvartað yfir okkar frammistöðu,” sagði Ólafur leikmaður HK sem hefur sýnt það í þessari undanúrslitarimmu og þarna er á ferðinni sennilega besta sóknarmaður sem spilar á Íslandi í dag. Ólafur Bjarki var yfirburðamaður í HK liðinu Þá skiptum við yfir á Andri Yrkil Valsson blaðamann mbl en hann hitti sömuleiðis fulltrúa beggja liða: Hörður Fannar: Frábært einvígi „Þetta var hörku leikur frá fyrstu mínútu,“ sagði línumaðurinn sterki í liði Akureyrar, Hörður Fannar Sigþórsson, eftir að liðið tryggði sér sæti í úrslitaeinvíginu um Íslandsmeistaratitilinn eftir sigur á HK, 28:25. „Við náðum upp mjög góðum varnarleik í síðari hálfleik og það skilaði okkur sigrinum að mínu mati, en þetta var frábært einvígi við mjög gott HK lið. Þeir voru mjög góðir og það kom okkur ekkert á óvart hvað þeir komu einbeittir til leiks. Við erum búnir að spila svo oft við þá í vetur, fórum nokkuð auðveldlega með þá í fyrsta leiknum í haust en svo hafa allir hinir verið hörku leikir. HK liðið er því mjög sterkt og greinilegt að Kiddi og Erlingur eru að gera mjög góða hluti með þetta lið.“ Hörður Fannar í ákjósanlegu færi Atli Hilmarsson: Hvergi nærri hættir „Við eigum bara eftir að halda áfram, erum hvergi nærri hættir,“ sagði Atli Hilmarsson, þjálfari Akureyrar, kampakátur eftir að lærisveinar hans tryggðu sér sæti í úrslitaeinvíginu um Íslandsmeistaratitilinn eftir sigur á HK í oddaleik. „Miðað við hvernig við spiluðum á laugardaginn var ótrúlegt hvernig við náðum að svara fyrir okkur inni á vellinum í þessum leik, en það var nákvæmlega það sem við þurftum að gera. Munurinn á þessum tveimur liðum í dag var að við vorum á heimavelli. Það var frábært að fá þennan stuðning frá öllum áhorfendunum. Þrátt fyrir að við spiluðum skelfilega á laugardaginn kom fólkið til þess að styðja okkur og hjálpaði okkur svo sannarlega yfir þennan erfiða hjalla,“ sagði Atli. Atli Hilmarsson steig villtan dans í leikslok Hjá HK var Ólafur Bjarki Ragnarsson áberandi sem fyrr, skoraði 12 mörk í leiknum og var einnig duglegur að mata liðsfélaga sína með góðum sendingum. Aðspurður sagðist Atli alltaf hafa reiknað með að Ólafur myndi draga vagninn fyrir HK í leiknum. „Við leyfðum Ólafi að leika svolítið lausum hala en einbeittum okkur frekar að því að stoppa liðsfélaga hans. Við tókum hann úr umferð seinni hluta leiksins en við vildum bíða með það sem lengst því þegar hann er tekinn úr umferð opnast spilið hjá þeim inn á línuna. Hann hefur skorað grimmt í þessum leikjum en við höfum náð að halda öðrum mönnum í skefjum svo það jafnast svolítið út,“ sagði Atli ennfremur og hann var að vonum gríðarlega stoltur af sínu liði, en þrátt fyrir gott tímabil er hann langt frá því að vera saddur. „Það er alveg frábært að vera komnir í úrslitarimmuna. Við höfum fengið tvo silfurpeninga í vetur á móti einum úr gulli, svo við munum gera hvað við getum til að ná í annað gull, það er ekki spurning,“ sagði Atli Hilmarsson, þjálfari Akureyrar, við Morgunblaðið að leiknum loknum. Ólafur Bjarki: Akureyri gekk á lagið „Já þetta var góður leikur hjá mér, en það er ekki nóg,“ sagði hinn knái Ólafur Bjarki Ragnarsson, leikmaður HK, eftir tapið gegn Akureyri fyrir norðan, 28:25. Ólafur fór mikinn líkt og í síðustu leikjum og skoraði 12 mörk, en þegar hann var tekinn úr umferð undir lokin datt sóknarleikur liðsins alveg niður. „Síðustu mínúturnar voru ekki nægilega góðar hjá okkur. Sóknarleikurinn var hálf vandræðalegur þar sem við köstuðum boltanum mikið frá okkur og á móti náðu þeir að keyra á okkur. Sóknarleikurinn var því svolítið ragur þarna í lokin og Akureyri gekk á lagið.“ Stuðningsmenn HK létu ekki sitt eftir liggja í stúkunni og segir Ólafur það skipta miklu máli. „Það var frábær stuðningur frá áhorfendum, okkar fólk lét vel í sér heyra á móti öllum fjöldanum frá Akureyri. Það er mjög gaman að spila hérna, Höllin er nánast full í hvert skipti svo það er alltaf gaman að koma norður. Að sjálfsögðu er maður fúll núna og eflaust næstu daga, en svo koma menn bara sterkari til baka á næsta tímabili, það er bara þannig. Atli Ævar Ingólfsson: Trúi ekki ennþá að við höfum tapað „Ég trúi hreinlega ekki ennþá að við höfum tapað,“ sagði línumaðurinn sterki í liði HK, Atli Ævar Ingólfsson, eftir leikinn. „Við vorum ekki nægilega klókir í sóknarleiknum undir lokin þar sem við völdum mjög vitlausa kosti og því fór sem fór, ákvarðanirnar sóknarlega hjá okkur gerðu útslagið. Við vitum sjálfir að við eigum að vera mikið betri en þetta þar sem við vorum ekki að spila eins vel og við getum. Þetta er því mjög sárt. Við unnum þá stórt í síðasta leik en fylgdum því ekki nægilega vel eftir og það vantaði karakterinn hjá okkur. En svona er þetta, við erum að tapa leiknum naumlega en það telur mikið.“ Atli segir að liðið hafi haft fulla trú á að geta lagt deildarmeistara Akureyrar að velli. „Við höfðum trú á þessu frá upphafi og vorum sannfærðir um að vinna þennan leik. Ég hafði mjög góða tilfinningu fyrir leiknum allan tímann og en svona fór þetta. Við eigum hins vegar að vera miklu betri en þetta,“ sagði Atli Ævar við mbl.is. Atli Ævar fékk aldrei frið hjá Akureyrarvörninni Vilhelm Gauti: Vonandi fer Akureyri alla leið „Svona er þetta, stundum vinnur maður og stundum ekki,“ sagði Vilhelm Gauti Bergsveinsson, leikmaður HK, eftir tapið gegn Akureyri. „Ég veit eiginlega ekki hvað gerðist hjá okkur undir lokin. Þeir náttúrulega tóku Óla [Ólaf Bjarka Ragnarsson] út í sókninni og við vorum kannski svolítið lengi að finna lausn á því. Svo voru mikil læti allt í kring svo það var erfitt að koma skilaboðum á milli manna sem hefur kannski haft áhrif á okkur líka. Við sýndum það í síðasta leik að við áttum allan tímann möguleika á að leggja Akureyri að velli. Það hefði náttúrulega verið fásinna af okkar hálfu að koma hingað norður og halda það að við ættum ekki möguleika á sigri. Okkur langaði alveg hrikalega að fara í úrslit en ég vil nota tækifærið og óska Akureyri til hamingju með þetta. Þeir eru vel að þessu komnir og búnir að vera sterkasta liðið í vetur og ég vona fyrir okkar hönd að þeir fari alla leið og taki titilinn fyrst þeir þurftu að slá okkur út,“ sagði Vilhelm Gauti við mbl.is. Vilhelm Gauti í rökræðum við eftirlitsdómarann í fyrsta leiknum Þeir félagar Hjalti Þór Hreinsson og Stefán Árni Pálsson eru skrifaðir fyrir viðtölunum í Fréttablaðinu og visir.is: Guðmundur Hólmar: Sigur liðsheildarinnar „Ég er alveg búin á því, en mikið rosalega er ég ánægður,“ sagði Guðmundur Hólmar, leikmaður Akureyrar, eftir sigurinn í gær. „Ég er eiginlega bara búinn á því. Andlega og líkamlega. Þetta var svakalegur rússíbani hjá okkur. Við erum búnir að vinna HK fimm eða sex sinnum í vetur, við drulluðum upp á bak í leik númer tvö eftir góðan sigur fyrst en það er frábært að klára þetta,“ sagði Guðmundur. Sjá vídeóviðtal við Guðmund. Hann segir að Heimir Örn Árnason hafi hótað að hætta ef liðið kæmist ekki í úrslitin, en hann gerði slíkt hið sama áður en liðið varð Deildarmeistari. „Heimir sagðist ætla að leggja skóna á hilluna ef við kæmumst ekki í úrslitin og ég lagði mig því enn meira fram,“ sagði Guðmundur sem ræddi síðan við blaðamann um ítrekaðar hótanir Heimis að hætta ef liðið tapar. Lúmskur fyrirliðinn, sem skoraði nokkur mikilvæg mörk í kvöld á milli þess sem hann kastaði boltanum útaf. „Við áttum held ég bara meira eftir í restina og vorum alltaf skrefinu á undan þeim í síðari hálfleik. Það var alveg frábært að spila hér í kvöld fyrir framan þessa áhorfendur. Það hjálpaði okkur klárlega í kvöld,“ sagði Guðmundur. „Einvígið við FH leggst bara vel í mig, en við verðum að mæta alveg 100% klárir ef við ætlum að eiga möguleika“. Atli Hilmarsson: Heimavöllurinn á eftir að skila okkur langt „Seinni hálfleikurinn var í raun okkar frá fyrstu mínútu. Við áttum gríðarlega erfitt með Ólaf Bjarka, en náðum að stoppa alla hina leikmennina sem skilaði okkur þessum sigri. Það verður virkilega gaman að spila til úrslita og ég er fegin að vera með heimaleikjaréttinn. HK spilaði sérstaklega vel í þessu einvígi en heimavöllur okkar skilaði okkur áfram,“ sagði Atli Hilmarsson sáttur eftir sigurinn í gær. Atli Hilmarsson tileinkaði Guðlaugi Arnarssyni, Húsavíkurtröllinu sem oftast er kallaður Öxlin, sigurinn á HK í kvöld. Hann sat heima á dollunni með Nóró vírusinn, að öllum líkindum, og því vantaði þennan lykilmann í vörn Akureyrar í kvöld. „Við gerðum þetta fyrir Gulla, nú er hann búinn að léttast um nokkur kíló með æluna og ég veit ekki hvað, hann verður að koma til baka í úrslitunum,“ sagði Atli kíminn. Sjá vídeóviðtal. Heimir: Þetta er frábær tilfinning „Þetta er frábær tilfinning að vera komin í úrslit,“ sagði Heimir Örn Árnason, leikmaður Akureyrar, eftir sigurinn á HK í oddaleiknum fyrir norðan í kvöld. „Ég var síðast í úrslitaeinvígi með KA fyrir átta árum og það var virkilega skemmtilegt að taka þátt í því, það verður án efa jafn gaman í ár“. „Það sem við höfðum framyfir HK-inga í kvöld er að við erum kannski með örlítið sterkari vörn, en við vorum að spila á móti alveg hreint sjóðandi heitum leikmanni sem var erfitt“. Ólafur Bjarki Ragnarsson, leikmaður HK, var stórkostlegur í kvöld og Akureyringar réðu ekkert við hann. „Þetta var í raun vandræðalegt fyrir mig í fyrri hálfleik þar sem ég spilaði eins og ég veit ekki hvað, ég þurfti bara að stíga upp í þeim síðari og fara spila eins og maður“. Sjá vídeóviðtal við Heimi. Heimir Örn fagnar sigri í leikslok Ólafur Bjarki: Gekk bara ekki upp hjá okkur „Þetta gekk ekki alveg hjá okkur í kvöld, þeir náðu að keyra mikið í bakið á okkur í restina og við áttum erfitt með að verjast þeim. Sóknarleikur okkar var ekki alveg nægilega góður hjá okkur, en í raun lékum við nokkuð vel í kvöld. Ég er nokkuð sáttur við þetta tímabil hjá okkur. Okkur var spáð sjötta sætinu, en við komust í úrslitakeppnina og spilum þrjá alveg hörku leiki við Akureyri," sagði Ólafur Bjarki. Sjá vídeóviðtal við Ólaf. Kristinn Guðmundsson: Við erum virkilega svekktir „Ég er auðvita drullu svekktur, við ætluðum okkur áfram og ekkert annað,“ sagði Kristinn Guðmundsson, annar þjálfari HK. „Við töldum okkur alltaf hafa getuna og gæðin til þess að komast áfram, en það bara gekk ekki í kvöld. Við erum með frábært lið í höndunum og það verður virkilega gaman að undirbúa næsta tímabil. Við ætlum okkur að halda saman mannskap og þessir strákar eiga eftir að ná langt,“ sagði Kristinn. Sjá vídeóviðtal við Kristinn. Kristinn þurfti að ræða málin í fyrsta leik liðanna
Fletta milli frétta	Til baka Senda á Facebook