Oddur Gretarsson maður 8. umferðarinnar hjá mbl


Fréttir - Leikir tímabilsins - Leikmenn - Stjórn - Saga og tölfræði - Höllin - Lagið - Myndir - Myndbönd - Tenglar
- Úrvalsdeild karla - Senda skilaboð - Vefur KA - Vefur Þór - Fréttaleit

Meistarafl. karla

Næstu leikir

Nýjustu úrslit

Stjarnan-Akureyri 28-23
Þri. 4. apr. 2017
Olís deild karla

ÍBV-Akureyri 22-22
Mið. 29. mar. 2017
Olís deild karla

Stjarnan U-Akureyri U 35-30
Fös. 7. apr. 2017
1. deild karla

Akureyri U-KR 34-30
Fös. 31. mar. 2017
1. deild karla

deildin staðan

Fréttir

Þú flettir milli frétta með örvalyklunum eða smellir á bláu örvarnar!


Til hamingju Oddur		22. nóvember 2011 - Akureyri handboltafélag skrifar Oddur Gretarsson maður 8. umferðarinnar hjá mbl Í Morgunblaðinu í dag er greint frá vali blaðsins á leikmanni og liði 8. umferðar N1 deildarinnar. Að þessu sinni er Oddur Gretarsson valinn besti leikmaður umferðarinnar en Bjarni Fritzson er sömuleiðis valinn í lið umferðarinnar. Ólafur Már Þórisson, blaðamaður Morgunblaðsins (omt@mbl.is ) ræddi við Odd Gretarsson af þessu tilefni og fer viðtalið hér á eftir. Morgunblaðið fékk að trufla Odd Gretarsson, leikmann Akureyrar, þar sem hann var að sinna börnunum á leikskólanum Naustatjörn þar sem hann vinnur ásamt liðsfélaga sínum Jóni Heiðari Magnússyni. „Það er mjög gaman, við byrjuðum hérna í haust,“ sagði Oddur spurður um það hvernig væri að vinna með börnum. Hann er þó ekki bara að starfa með sér áður ókunnugum börnum því liðsfélagar hans Heimir Örn Árnason og Guðlaugur Arnarsson eiga tvo stráka á deildinni hans Odds. „Þeir eru ótrúlegir og æfa bæði handbolta og fótbolta. Þá þekkja þeir nöfnin á öllum leikmönnunum bæði í handboltanum og fótboltanum þrátt fyrir að vera aðeins fjögurra og fimm ára.“ Litlu pjakkarnir gátu verið ánægðir með Odd á fimmtudaginn þegar hann fór á kostum gegn Aftureldingu í 8. umferð N1-deildarinnar í handknattleik. Oddur skoraði ellefu mörk og er að þessu sinni maður umferðarinnar að mati Morgunblaðsins. „Við erum búnir að eiga tvo góða leiki í röð. Það má hinsvegar ekki gleyma því að þetta voru tvö neðstu liðin sem við unnum. Ef við ætlum okkur í úrslitakeppnina sem við stefnum að þá þurfum við líka að vinna þessi lið sem eru fyrir ofan okkur. Það þýðir ekki að stæra sig af því að taka stig á heimavelli gegn liðunum fyrir neðan okkur,“ sagði Oddur um gott gengi Akureyrar að undanförnu. Oddur skorar í leik gegn Gróttu Deildarmeistararnir frá síðustu leiktíð byrjuðu tímabilið mjög illa þrátt fyrir lítið breytt lið milli tímabila. Þeir voru aðeins með 5 stig eftir fyrstu umferðina. Spurður hvort það hafi komið honum á óvart sagði Oddur: „Auðvitað hefur þetta komið á óvart. Ég bjóst við og við ætluðum okkur að vera með fleiri stig eftir fyrstu umferðina. Vegna meiðsla voru hinsvegar lykilmenn fjarverandi í nokkrar vikur og það setti strik í reikninginn. Auðvitað hefði ég viljað vera með fleiri stig.“ Mörkin segja ekki alla söguna Oddur hefur skorað 43 mörk í átta leikjum það sem af er. Hann er í 5. til 6. sæti yfir markahæstu leikmenn deildarinnar. Hann segist þokkalega sáttur með frammistöðu sína. „Ég veit að ég á að geta gert betur, sérstaklega í nokkrum leikjum. Ég er samt ánægður með nýtinguna hjá mér í skotunum. Þrátt fyrir það hef ég skorað minna en á síðustu leiktíð. Markaskorun skiptir auðvitað ekki öllu máli heldur líka að standa sig vel í vörn og fyrir liðið.“ Oddur skorar úr hraðaupphlaupi gegn Val Ástæðan fyrir því að Oddur hefur skorað minna á þessu tímabili gæti skrifast á að hann hefur ekki alltaf fengið að spila í sinni stöðu sem er vinstra horn. Þar kemur til að Heimir Örn hefur verið mikið meiddur og því hefur Oddur þurft að bregða sér í hlutverk leikstjórnanda eða jafnvel skyttu sem hann er þó ekki alveg óvanur. „Það er ekkert alveg nýtt fyrir mér því ég spilaði þessar stöður upp alla yngri flokkana og í 2. flokki. Ég var samt alltaf að upplagi hornamaður og hef ekki mikið gert af því að spila þessar stöður í meistaraflokki fyrr en nú. Það hefur þó bara gengið ágætlega.“ Vinir berjast um landsliðssæti Oddur sem er 21 árs hefur verið viðriðinn landsliðið að undanförnu eftir frábæra frammistöðu í fyrra. Samkeppnin er þó hörð, sérstaklega í vinstra horninu. Þar koma tveir leikmenn í N1-deildinni auk Odds sterklega til greina í landsliðshópinn fyrir EM í Serbíu í janúar. „Sturla Ásgeirsson og Bjarki Már Elísson hafa spilað mjög vel. Þess vegna þarf maður að vera á tánum og standa sig. Samkeppnin er alltaf af hinu góða. Það er líka gaman að því að ég og Bjarki þekkjumst vel og erum góðir vinir frá því í unglingalandsliðunum.“ Spurður hvort þeir væru ekkert að senda einhverjar pillur hvor á annan sagði Oddur svo ekki vera. „Við erum mjög góðir félagar og það er ekkert illt þar á milli. Við spjöllum frekar á jákvæðu nótunum um þetta,“ sagði Oddur með bros á vör. Eiga harma að hefna gegn FH Næsti leikur er gegn FH annað kvöld en milli liðanna hefur mörg hildurin verið háð að undanförnu, allt frá úrslitarimmunni um Íslandsmeistaratitilinn í fyrra. Í bikarnum á dögunum féll Akureyri út fyrir FH þar sem Hafnarfjarðarliði nánast niðurlægði strákana að norðan. „Eftir þann leik vildi maður helst spila við þá strax aftur. Nú ætlum við hinsvegar að sýna okkar rétta andlit og mæta dýrvitlausir eins og þeir gera líklega einnig. Við eigum hinsvegar harma að hefna bæði frá síðasta leik og frá því í vor,“ sagði Oddur áður en hann hljóp aftur til barnanna á Naustatjörn.
Fletta milli frétta	Til baka Senda á Facebook

Umsjón og hönnun: Stefán Jóhannsson og Ágúst Stefánsson