Slæmt tap fyrir Haukum í kvöld


Fréttir - Leikir tímabilsins - Leikmenn - Stjórn - Saga og tölfræði - Höllin - Lagið - Myndir - Myndbönd - Tenglar
- Úrvalsdeild karla - Senda skilaboð - Vefur KA - Vefur Þór - Fréttaleit

Meistarafl. karla

Næstu leikir

Nýjustu úrslit

Stjarnan-Akureyri 28-23
Þri. 4. apr. 2017
Olís deild karla

ÍBV-Akureyri 22-22
Mið. 29. mar. 2017
Olís deild karla

Stjarnan U-Akureyri U 35-30
Fös. 7. apr. 2017
1. deild karla

Akureyri U-KR 34-30
Fös. 31. mar. 2017
1. deild karla

deildin staðan

Fréttir

Þú flettir milli frétta með örvalyklunum eða smellir á bláu örvarnar!


Bergvin setti tvö mörk gegn Haukum		12. mars 2012 - Akureyri handboltafélag skrifar Slæmt tap fyrir Haukum í kvöld Það var vægast sagt léleg uppskera hjá Akureyrarliðinu í kvöld þegar liðið sótti Hauka heim á Ásvelli. Eftir fína frammistöðu í undanförnum leikjum fékk liðið skell í kvöld þar sem hreinlega ekkert gekk sóknarlega og flestum leikmönnum virtist alveg fyrirmunað að skora hjá landsliðismarkverðinum, Aroni Eðvarðssyni. Klárlega langslakasti leikur liðsins í vetur. Við grípum hér niður í umfjöllun Snorra Sturlusonar á sport.is um leikinn: Því verður seint haldið fram að Haukar og Akureyringar hafi efnt til taumlausrar skemmtisýningar í Schenkerhöllinni að Ásvöllum í kvöld, toppbaráttan virðist hafa sest misvel í menn og haft sérstaklega hamlandi áhrif á sóknarhæfileikana. Akureyringar voru sínu verri hvað þetta varðar, þeir virkuðu taktlitlir meira og minna allan leikinn og mikilvægir póstar voru alltof hlédrægir. Haukar náðu fljótlega undirtökunum í leiknum, án þess þó að sýna einhvern glansleik, og þeir nýttu sér ágæta frammistöðu Arons Rafns í markinu og dapra færanýtingu norðanmanna til góðra verka. Í raun var það ekki góðum varnarleik að þakka, eða kenna, að sóknarleikur liðanna hökti, hvorugt liðanna fann sóknartaktinn í fyrri hálfleik og að því leytinu til reyndi kannski ekkert sérlega mikið á vel útfærðan varnarleik. Haukar tóku kipp undir lok hálfleiksins og rifu sig frá gestunum, en í hálfleik var staðan 10-7 fyrir heimamenn. Bjarni Fritzson var markahæstur Akureyrar í kvöld. Mynd: Snorri Sturluson sport.is Sóknartaktur Haukanna var öllu betri í síðari hálfleik, heimamenn voru miklu viljugri að ráðast til atlögu og ákveðnari í öllum sínum aðgerðum og það skilaði sér í aukinni forystu. Vörn Haukanna var reyndar betri í síðari hálfleiknum líka, Akureyringar fundu alltof fá svör og alltof margir þeirra fóru í feluleik. Ljómandi góð markvarsla Arons virtist líka fylla Akureyringa ótta við að taka af skarið og norðanmenn litu hreinlega alls ekki út fyrir að vera líklegir til stórræðna. Tjörvi stýrði sóknarleik Haukanna af miklum myndarskap, sem ekki er fréttnæmt í sjálfu sér, og fær ekki alltaf það hrós sem hann á skilið, Stefán Rafn lét talsvert til sín taka í sókninni og Sveinn hlóð í nokkrar neglur. Annars var bragurinn á Haukaliðinu ágætur í síðari hálfleik og ljóst að Aronssveinar ætla lítið að gefa eftir í baráttunni um deildarmeistaratitilinn. Akureyringar voru heillum horfnir í þessum leik og það veit ekki á gott þegar meira að segja tryggustu stoðirnar þeirra týna fjölinni sinni. Atli Hilmarsson reynir að berja sína menn áfram. Mynd: Snorri Sturluson sport.is Norðanmenn áttu ágæta kafla í fyrri hálfleik, en þeir voru stuttir og máttlitlir og um miðjan síðari hálfleikinn voru vopnin einfaldlega lögð niður. Haukarnir bættu hægt og bítandi við forystuna og gerðu margt ljómandi vel, eins og þrælöruggur átta marka sigur þeirra ber vott um, lokatölur 26-18 fyrir Hauka. Svo mörg voru þau orð. Mörk Akureyrar: Bjarni Fritzson 6 (3 úr vítum), Oddur Gretarsson 4, Heimir Örn Árnason 3, Bergvin Gíslason 2, Guðmundur Hólmar Helgason 2, Heiðar Þór Aðalsteinsson 1. Sveinbjörn Pétursson varði sextán skot, þar af eitt vítakast. Sveinbjörn fékk brottvísun í leiknum og á meðan stóð Stefán Guðnason í markinu en náði ekki að verja. Bergvin Gíslason sækir og Haukamaðurinn rekinn útaf. Mynd: Snorri Sturluson sport.is Eins og áður segir var þessi leikur afspyrnu lélegur hjá okkar mönnum og væntanlega geta þeir ekki beðið eftir að reka af sér slyðruorðið í næsta leik sem er einmitt heimaleikur gegn toppliði FH en sá leikur verður mánudaginn 19. mars í Íþróttahöllinni.
Fletta milli frétta	Til baka Senda á Facebook

Umsjón og hönnun: Stefán Jóhannsson og Ágúst Stefánsson