Bjarni Fritzson, besti leikmaður 19. umferðar N1 deildar


Fréttir - Leikir tímabilsins - Leikmenn - Stjórn - Saga og tölfræði - Höllin - Lagið - Myndir - Myndbönd - Tenglar
- Úrvalsdeild karla - Senda skilaboð - Vefur KA - Vefur Þór - Fréttaleit

Meistarafl. karla

Næstu leikir

Nýjustu úrslit

Stjarnan-Akureyri 28-23
Þri. 4. apr. 2017
Olís deild karla

ÍBV-Akureyri 22-22
Mið. 29. mar. 2017
Olís deild karla

Stjarnan U-Akureyri U 35-30
Fös. 7. apr. 2017
1. deild karla

Akureyri U-KR 34-30
Fös. 31. mar. 2017
1. deild karla

deildin staðan

Fréttir

Þú flettir milli frétta með örvalyklunum eða smellir á bláu örvarnar!


Til hamingju Bjarni - frábær frammistaða í vetur		21. mars 2012 - Akureyri handboltafélag skrifar Bjarni Fritzson, besti leikmaður 19. umferðar N1 deildar Morgunblaðið birtir í dag val sitt á leikmanni og liði 19. umferðar N1 deildarinnar sem fór fram á mánudagskvöldið. Bjarni Fritzson, leikmaður Akureyrar Handboltafélags var valinn besti leikmaður umferðarinnar en auk Bjarna eru Oddur Gretarsson og Guðlaugur Arnarsson valdir í liðið. Bjarni er besti hægri hornamaðurinn og er þetta í 10. sinn sem hann er í liði umferðarinnar. Oddur Gretarsson er besti vinstri hornamaðurinn en þetta er 5. sinn sem Oddur er í liðinu. Guðlaugur Arnarsson er valinn besti varnarmaðurinn í þriðja sinn. Annars er lið 19. umferðarinnar þannig skipað samkvæmt vali Morgunblaðsins: Markvörður: Hlynur Morthens, Valur (1. sinn) Vinstra horn: Oddur Gretarsson, Akureyri Handboltafélag (5. sinn) Vinstri skytta: Róbert Aron Hostert, Fram (4. sinn) Línumaður: Heimir Óli Heimisson, Haukar (4. sinn) Leikstjórnandi: Tjörvi Þorgeirsson, Haukar (2. sinn) Hægri skytta: Jóhann Gunnar Einarsson, Fram (2. sinn) Hægra horn: Bjarni Fritzson, Akureyri Handboltafélag (10. sinn) Besti varnarmaður: Guðlaugur Arnarsson, Akureyri Handboltafélag (3. sinn) Jafnframt kemur fram að Bjarni Fritzson er markahæsti leikmaður N1 deildarinnar með 145 mörk og Sveinbjörn Pétursson hefur varið flest skot allra markvarða deildarinnar, 297 skot samkvæmt tölfræði Morgunblaðsins. Við óskum öllum ofangreindum til hamingju með árangurinn. Bjarni og Geir voru einnig í liði 17. umferðarinnar Það er rétt að geta þess í leiðinni að Bjarni var einnig valinn hægri hornamaður 17. umferðarinnar og þá var Geir Guðmundsson valinn besta hægri skytta þeirrar umferðar. Í 17. umferðinni tók Akureyri á móti HK og vann góðan sigur. Ívar Benediktsson, blaðamaður Morgunblaðsins tók eftirfarandi viðtal við Bjarna Fritzson þar sem þeir spjalla um FH leikinn, keppnistímabilið svo og lífið og tilveruna: „Þetta var góður sigur hjá okkur og vart annað hægt því stemningin í höllinni var frábær,“ sagði Bjarni Fritzson, leikmaður Akureyrar, sem er leikmaður 19. umferðar N1-deildar karla í handknattleik að mati Morgunblaðsins. Akureyri fór langt með að tryggja sér sæti í úrslitakeppni N1-deildarinnar með sigri á Íslandsmeisturum FH á heimavelli sínum í fyrrakvöld fyrir framan fullt hús stuðningsmanna. Bjarni segir Akureyrarliðið vera á góðri siglingu. „Okkur hefur gengið mjög vel frá því í öðrum hluta mótsins. Framan af spiluðum við ekki illa en úrslitin voru ekki alveg að falla með okkur. En eftir að við komumst í gang þá höfum við verið á góðu róli,“ segir Bjarni og bætir við stefnan sé nú tekin á sigur á Fram á föstudaginn í Safamýri þegar næstsíðasta umferðin fer fram. „Með sigri tryggjum við okkur sæti í úrslitakeppninni.“ Bjarni skorar mark úr hægra horninu gegn FH „Við lékum vel gegn FH og sigurinn var mikilvægur eftir tap fyrir Haukum í umferðinni á undan. Þá lékum við alls ekki illa, náðum að skapa okkur fullt af færum en tókst ekki að nýta þau þar sem Aron Rafn [Eðvarðsson markvörður Hauka] var í hörkuformi í leiknum,“ segir Bjarni sem er á sinni annarri leiktíð með Akureyrarliðinu. Meistararitgerð og kennslumyndband í vinnslu „Akureyrarliðið er afar gott og síðan er umgjörðin alveg til fyrirmyndar. Ég kann vel við mig nyrðra,“ segir Bjarni sem er vinna að meistararitgerð sinni í sálfræði auk þess sem hann hefur verið að vinna að gerð kennslumyndbands um handknattleik ásamt gömlum samherjum úr ÍR, Ingimundi Ingimundarsyni og Sturlu Ásgeirssyni. Bjarni hefur tíu sinnum verið í liði umferðarinnar í Morgunblaðinu í vetur. Þá er hann markahæsti leikmaður N1-deildarinnar og hefur skorað 7,6 mörk að meðaltali í leik. Einnig var Bjarni kallaður inn í íslenska landsliðið í handknattleik á dögunum og tók þátt í vináttulandsleik við Þjóðverja í Mannheim á miðvikudaginn í síðustu viku. Alltaf gaman með landsliðinu „Guðmundur landsliðsþjálfari leyfir mér einstöku sinnum að vera með,“ sagði Bjarni léttur í bragði þegar talið færist að landsliðinu. „Að öllum gamni slepptu þá er alltaf heiður og mikil ánægja að fá að taka þátt í landsleikjum, einnig að koma saman að hitta strákana. Síðast en ekki síst þá er góð tilbreyting fólgin í því að fá að eiga við nýjan mótherja, fá tilbreytingu en hér heima er maður alltaf að kljást við sömu mennina umferð eftir umferð. Ég spilaði reyndar ekki mikið í leiknum við Þjóðverja en það tekur alltaf í að fara í landsliðsferðir. Ég reiknaði alveg með að leikurinn og ferðalagið sæti að einhverju leyti í mér í leiknum við FH en sem betur fer var það ekki. Ég var bara nokkuð ferskur þegar á hólminn var komið.“ Bjarni skorar eitt af sjö mörkum sínum gegn FH N1-deildin hefur verið skemmtilegri og jafnaði í vetur en í fyrravetur að mati Bjarna. „Það er ekki mikill munur á liðunum í sex efstu sætunum. Margir leikir hafa verið jafnir og talsvert um að ungir leikmenn hafi gert vart við sig. Heilt yfir þá hefur deildarkeppnin verið jöfn. Þá er mikil spenna á lokasprettinum þar sem fimm lið eiga möguleika á að ná þeim þremur sætum sem eftir eru í úrslitakeppninni. Þar af leiðandi er ljóst að barist verður fram á síðustu stundu, reikna ég með,“ segir Bjarni. Sæti í úrslitakeppninni fyrsta markmið Akureyrarliðsins Markmið Akureyrarliðsins er alveg skýrt. „Það er að komast í úrslitakeppnina. Lengra hugsum við ekki í bili. Við viljum vera með í slagnum í úrslitakeppninni eins og í fyrra. Þá spiluðum við skemmtilega leiki við HK í undanúrslitum og síðan FH í úrslitunum. Stemningin var flott og umgjörð leikja glæsileg. Að sjálfsögðu viljum við Akureyringar ná lengra en á síðasta ári. En sæti í úrslitakeppninni er fyrsta markmiðið. Þegar því er náð getur allt gerst,“ sagði Bjarni Fritzson, leikmaður Akureyrar, markahæsti leikmaður N1-deildarinnar og leikmaður 19. umferðar. Hér er einmitt hægt að sjá stemminguna í Höllinni á FH-leiknum:
Fletta milli frétta	Til baka Senda á Facebook

Umsjón og hönnun: Stefán Jóhannsson og Ágúst Stefánsson