Leikur dagsins: ÍR – Akureyri í beinni á RÚV

Það má búast við hörkuleik þegar Akureyri fer í heimsókn til ÍR-inga í Austurbergið. ÍR kom af krafti til leiks í úrvalsdeildinni í fyrravetur og fór í fjögurra liða úrslitin auk þess að hampa bikarmeistaratitlinum. Árið áður sigraði ÍR 1. deildina og styrkti leikmannahópinn svo um munaði fyrir baráttuna í fyrra.

ÍR-ingar ætla sér enn stærri hluti í vetur og halda flestum sínum leikmönnum en hafa heldur betur bætt í hópinn. Af nýjum leikmönnum í ár má nefna markvörðinn Arnór Frey Stefánsson, sem hefur leikið með HK undanfarin ár. Kristinn Björgúlfsson sneri heim eftir að hafa leikið erlendis undanfarin ár. Þá hafa ÍR-ingar fengið til sín Arnar Birki Hálfdánarson sem kom frá FH en hefur þrátt fyrir ungan aldur gert garðinn frægan með liði Fram.

Línumaðurinn Halldór Logi Árnason er hins vegar kominn aftur heim, í raðir Akureyrar og skyttan Jónatan Vignisson gekk í raðir Víkinga. Þá er Akureyringurinn og hornamaðurinn Ólafur Sigurgeirsson hættur svo og Hermann Marinósson.

Fyrir eru síðan kapparnir sem báru liðið uppi síðasta tímabil eins og Björgvin Hólmgeirsson, Sturla Ásgeirsson, Jón Heiðar Gunnarsson og Ingimundur Ingimundarson svo fáir séu nefndir.

Gengi ÍR-inga í fyrstu umferð deildarinnar varð þeim vonbrigði þar sem ÍR tapaði illa fyrir Vestmannaeyingum og næsta víst að þeir ætli sér að sýna að sá leikur var slys.

Akureyrarliðið ætlar sér síðan klárlega að fylgja eftir góðum sigri á Fram í upphafi mótsins þannig að það er fullljóst að áhorfendur fá fullt fyrir peninginn að þessu sinni.

Við hvetjum alla stuðningsmenn Akureyrar á höfuðborgarsvæðinu til að fjölmenna á leikinn og láta duglega í sér heyra en ÍR-ingar héldu uppi flottri stemmingu á heimaleikjum sínum síðasta vetur.

Rétt er að benda á að leikurinn verður í beinni útsendinu á RÚV og hefst klukkan 15:45 á laugardaginn.