Fréttir  -  Leikir tímabilsins  -  Leikmenn  -  Stjórn  -  Saga og tölfræði  -  Höllin  -  Lagið  -  Myndir  -  Myndbönd  -  Tenglar
  - Úrvalsdeild karla - Senda skilaboð - Vefur KA - Vefur Þór - Fréttaleit
Meistarafl. karla
Næstu leikir
Nýjustu úrslit
Stjarnan-Akureyri 28-23
Þri. 4. apr. 2017
Olís deild karla
ÍBV-Akureyri 22-22
Mið. 29. mar. 2017
Olís deild karla
deildin staðan

Ungmennalið karla
Næstu leikir
Nýjustu úrslit
Stjarnan U-Akureyri U 35-30
Fös. 7. apr. 2017
1. deild karla
Akureyri U-KR 34-30
Fös. 31. mar. 2017
1. deild karla
deildin staðan
    Fréttir                       Þú flettir milli frétta með örvalyklunum eða smellir á bláu örvarnar! 

Tómas hefur staðið fyrir sínu það sem af er

20. október 2014 - Akureyri handboltafélag skrifar

Tomas Olason í viðtali við fimmeinn.is

Vefurinn fimmeinn.is birti í dag skemmtilegt viðtal við Tomas Olason markvörð Akureyrar Handboltafélag. Lúther Gestsson fréttaritari fimmeinn.is er skrifaður fyrir viðtalinu sem fer hér á eftir. Það er þó rétt að ítreka að Tomas er ekki hreinræktaður Dani þar sem faðir hans er íslenskur.

Tomas Olason: „Dauðhræddur við að fara á skíði“

Tomas Olason markvörður Akureyringa hefur vakið athygli með frammistöðu sinni í vetur en þessi knái Dani sem er yfir 2 metrar á hæð, kom til liðsins 2012 frá Odder í Danmörku og var kannski minna áberandi í fyrra þar sem Kukobat var þeirra aðalmarkvörður. En þar sem Kukobat yfirgaf Akureyri í sumar hefur það komið í hlut Tomasar að standa í markinu og hefur hann nýtt tækifærið vel. Tomas er með rétt um 40% markvörslu úr fyrstu 7 umferðunum og oft hafa úrslit leikja fallið til liðsins með hans frammistöðu.

Við tókum stöðuna á Tomasi um helgina og spurðum fyrst um gengi liðsins það sem af er vetri.
„Þetta er búið að vera erfið fæðing undanfarið, við erum í smá brekku en það er ekkert sem hægt er að kalla einhverja krísu. Við erum með góðan mannskap sem getur spilað frábæran handbolta bæði sóknar og varnarlega. Leikur liðsins hefur kannski einkennst af að vera of sveiflukenndur og það er mitt mat að við þurfum fyrst og fremst meiri stöðugleika í leik liðsins. En liðið er frábær blanda sem getur spilað frábæra vörn og sókn.“


Tomas með þennan bolta á hreinu

Eins og áður sagði hefur Tomas verið minna áberandi undanfarin tvö ár þar sem hann hefur verið í skugganum af Kukobat sem var frábær með liðinu í fyrra, en það sást strax á Hafnarfjarðarmótinu í haust að þarna væri mikið efni á ferðinni, enda átti Tomas flott mót þar. Við spurðum Tomas út í það að vera allt í einu orðin kannski óvænt aðalmarkvörður liðsins.
„Ég hugsaði ekkert út í það og passaði mig bara á að æfa vel og hugsa fyrst og fremst um að ég yrði í standi, hvort sem ég yrði markmaður númer 1 eða 2. Það gerðist seint að Kukobat fór og ég hef ekkert lagt neitt extra meira á mig síðan, ég hef bara passað að æfa vel og er ekkert að láta eitthvað annað trufla mig. Undirbúningurinn fyrir þetta tímabil hefur ekkert verið neitt öðruvísi hjá mér, nema bara að ég er með meiri fókus á sjálfan mig og hvað ég er að gera. Ég fékk að lokum traust frá þjálfurum liðsins og get bara sagt að ég er þakklátur fyrir það. Mér er sýnt traust og ég reyni bara að svara því“.

Það hefur mikið verið rætt um hina umtöluðu Peking vörn sem átti að sigra flestar sóknir andstæðingana, Tomas stendur fyrir aftan þessa vörn, er hann sáttur við hvernig varnarleikur liðsins hefur verið til þessa?
„Já og nei. Ég er þeirrar skoðunar eftir þessa fáu leiki sem við höfum leikið saman að Diddi og Sverre eru bestu varnarmenn sem ég hef spilað fyrir aftan og nafnið kemur frá þeim. Vörnin í heild sinni hefur brugðist allt of oft, menn hafa verið að láta tæla sig frá sínu hlutverki. það sem okkur vantar er meiri tengsl milli manna. Ég hef sjálfur brugðist vörninni og það hafa boltar farið í markið sem áttu ekkert erindi þangað. Ég átti til að mynda slæma daga á móti ÍBV og Haukum.“


Sverre og Tomas leggja á ráðin í leiknum gegn FH

Tomas kemur eins og áður sagði frá Danmörku og þar spilaði hann með Odder en einnig hefur hann verið í hópi með yngri landsliðum Dana. Okkur langaði að heyra hvernig hann sér danskan handbolta við hliðina á þeim íslenska.
„Hér á Íslandi er mikið meira lagt upp úr því að vera sterkur og það er meiri harka hér, það vantar einnig mikið uppá snerpuna hér. Í Danmörku er meira lagt upp með að vera snöggur og teknískur heldur en sterklega byggður fyrir mikil átök“.

Tomas lætur vel af dvölinni hér og segist í raun aldrei hafa kynnst annarri eins gestrisni og beið hans á Akureyri, þar hafi allir lagst á eitt að koma honum eins þægilega fyrir og unnt var.
„Þetta er meiriháttar bær, algerlega magnað fólk sem býr hér. Þegar ég kom hingað fyrst þekkti ég aðeins einn mann, hann Andra Snæ sem ég spilaði með í Odder. Ég gisti til að byrja með hjá fjölskyldu sem hafði aldrei séð eða talað við mig áður og þar var ég bara gerður að fjölskyldumeðlim undir eins, þessi fjölskylda tók mig algerlega að sér og hugsaði algerlega um mig þangað til ég fékk svo sér húsnæði. Ég hef bara aldrei kynnst svona“.

„Fólk hér hefur minnst á það við mig að ég verði að kunna á skíði þar sem ég búi hér, en það er íþrótt sem ég er bara hreinlega drulluhræddur við. Ég hef aldrei farið á skíði og þrátt fyrir að þetta sé skíðabær, þá er þetta líklega það eina sem ég algerlega tek ekki þátt í. Það má reyna allt annað, en á skíði fer ég ekki“.


Tomast átti frábæran leik gegn Fram og hafði ástæðu til að fagna duglega í leikslok

Það er varla hægt að sleppa þessum hávaxna Dana nema að minnast á það að Hreiðar Leví sé að koma eftir áramót, en menn hafa sagt frá upphafi móts að hann vanti þó að Tomas hafi staðið sig frábærlega. Svo við spyrjum bara hreint út, er þetta að trufla hann?
„Nei, alls ekki, ég hef aðeins kynnst Hreiðari og hann hefur komið hingað og tekið léttar æfingar með okkur og mér hefur bara fundist þetta frábær náungi. Ég er algerlega með það á hreinu að samvinna okkar á eftir að skila miklu til liðsins. Ég er með markmið og þau snúast um að bæta mig, ég ætla að verða bestur. Ég hef heyrt að Hreiðar sé góður markmaður og ég veit að hann er það, en hann þarf að sanna sig eins og ég þurfti. Fyrst og fremst hlakkar mig til að fá hann til liðs við okkur,“ sagði þessi rúmlega 2 metra Dani við okkur að lokum og það verður virkilega áhugavert að fylgjast með með honum áfram.“
Fletta milli frétta Til baka    Senda á Facebook
Umsjón og hönnun: Stefán Jóhannsson og Ágúst Stefánsson