ÍR vann fyrsta leik, Akureyri verður að vinna næsta


Fréttir - Leikir tímabilsins - Leikmenn - Stjórn - Saga og tölfræði - Höllin - Lagið - Myndir - Myndbönd - Tenglar
- Úrvalsdeild karla - Senda skilaboð - Vefur KA - Vefur Þór - Fréttaleit

Meistarafl. karla

Næstu leikir

Nýjustu úrslit

Stjarnan-Akureyri 28-23
Þri. 4. apr. 2017
Olís deild karla

ÍBV-Akureyri 22-22
Mið. 29. mar. 2017
Olís deild karla

Stjarnan U-Akureyri U 35-30
Fös. 7. apr. 2017
1. deild karla

Akureyri U-KR 34-30
Fös. 31. mar. 2017
1. deild karla

deildin staðan

Fréttir

Þú flettir milli frétta með örvalyklunum eða smellir á bláu örvarnar!


Heiddi og Hreiðar voru bestu menn Akureyrar í kvöld		8. apríl 2015 - Akureyri handboltafélag skrifar ÍR vann fyrsta leik, Akureyri verður að vinna næsta Þá er fyrsta leik í viðureign ÍR og Akureyrar lokið og það með sigri ÍR-inga. Þetta var alvöru úrslitakeppnisleikur, mikil barátta og hiti í mönnum þó handboltinn hafi ekki verið ýkja fallegur. Mikil óvissa hafði verið fyrir leik hvort ÍR myndi geta stillt upp sínu sterkasta liði en það kom svo engum á óvart að þeir voru svo með enda gefa menn allt í úrslitakeppnina. Akureyri byrjaði leikinn og skoraði fyrsta markið þegar Kristján Orri skoraði úr horninu eftir frábæra sendingu frá Sissa. Björgvin Hólmgeirsson byrjaði með ÍR og fór mikinn í upphafi, hann var óstöðvandi skoraði mörk fyrir utan og galopnaði vörnina fyrir liðsfélagana á víxl. Það var því viss léttir þegar Björgvin meiddist og kom ekki meira við sögu. Staðan var 8-5 fyrir ÍR þegar Björgvin yfirgaf völlinn og það sem eftir lifði fyrri hálfleiks náði Akureyri að minnka forskotið og jafnaði á endanum í 12-12 þegar fyrri hálfleikur var við það að klárast. Þá hinsvegar geystust ÍR-ingar upp og skutu á markið, dómararnir töldu Kristján Orra hafa sett fótinn vísvitandi fyrir skotið og gáfu honum brottvísun, Atli Hilmarsson var alls ekki sáttur og lét dómarana heyra það. Atli fékk einnig brottvísun og til að bæta gráu ofan á svart skoruðu ÍR-ingar úr aukakastinu og voru yfir í hálfleik 13-12. Atli fer yfir málin í leikhléi. Mynd: Ernir Eyjólfsson, visir.is Mikil spenna einkenndi svo síðari hálfleikinn en aldrei tókst Akureyringum að jafna metin en ÍR-ingar náðu heldur aldrei að sleppa lengra en þremur mörkum frá okkar mönnum fyrr en undir lok leiks. Þegar upp var staðið sigraði ÍR 24-20 og áttu sigurinn skilinn. Akureyri var að spila ágætis vörn lengstum og Hreiðar varði vel eftir að hann kom inná. Reyndar vantaði oft herslumuninn á að klára brotin til að standa vörnina almennilega en það vantaði smá neista í menn í dag. En þar sem Björgvin fór fljótt útaf og kom ekki aftur inná eftir öfluga byrjun hefði ég viljað sjá einhver ráð til að stöðva Arnar Birki í hægri skyttu ÍR. Annan leikinn í röð lék drengurinn á alls oddi og skoraði næstum að vild og opnaði fyrir samherja sína. Hefði verið áhugavert að prófa að taka hann úr umferð og sjá hvernig ÍR myndi tækla það en Akureyrarliðið prófaði það einungis þegar leikurinn var í raun búinn. Eitt er ljóst að lið Akureyrar á klárlega nóg inni fyrir næsta leik. Tomas fann sig ekki í markinu en Hreiðar kom að vísu sterkur inn. Halldór Logi átti erfitt uppdráttar á línunni og hefur oft nýtt færin betur, Þrándur hefði alveg mátt fá sénsinn í kvöld. Nicklas Selvig náði í nokkur vítaköst og skoraði 2 mörk en á tíðum reyndi hann kannski full mikið. Ég hefði viljað sjá Brynjar Hólm fá meiri séns í dag en drengurinn kom virkilega sterkur inn í síðasta leik en fékk varla tækifæri í kvöld. Einnig hefði ég viljað sjá Ingimund spila einhvern sóknarleik en hann hefur verið öflugur sóknarlega eftir áramót. Sigþór átti nokkrar flottar sendingar sem gáfu mörk en annars hefur oft komið meira frá Sissa. Heiðar Þór með eitt af átta mörkum af vítalínunni. Mynd: Ernir Eyjólfsson, visir.is Bergvin var í erfiðleikum sóknarlega og nokkuð ljóst að hann gengur ekki heill til skógar eftir bakslagið í FH leiknum á dögunum. Kristján Orri og Heiðar Þór sáust minna í dag en oft áður en nýttu hornafærin sín vel. Þá var Heiddi mjög öruggur á vítalínunni og skoraði 8 mörk úr 9 vítum, vonandi halda vítin áfram að gefa enda er liðið að fá mikið af vítum. Heimir Örn sótti nokkur vítaköst í leiknum og stjórnaði spilinu en heilt yfir þá varð sóknin liðinu að falli í dag. Hvort að 6-0 vörn ÍR hafi komið mönnum svona á óvart veit ég ekki en ég trúi ekki að menn muni leika svona tvo leiki í röð. Þó leikurinn í kvöld hafi tapast þá verð ég að viðurkenna það að það var ótrúlega gaman að upplifa þennan leik og stemninguna. Mikið hefur maður saknað 8-liða úrslitakeppni og hvet ég því alla til að mæta í Höllina á föstudaginn til að upplifa þessa stöku snilld. Mætum og styðjum Akureyri í mikilvægasta leik tímabilsins, sigur tryggir oddaleik á sunnudaginn á meðan tap þýðir einfaldlega sumarfrí. Það er gjörsamlega allt undir í þessum leik!
Fletta milli frétta	Til baka Senda á Facebook

Umsjón og hönnun: Stefán Jóhannsson og Ágúst Stefánsson