Warning: Undefined array key "frettanr" in /web/akhandadmin/public_html/index.php on line 15
Vonbrigði á móti Selfossi - viðtöl - Akureyri Handboltafélag
  Fréttir  -  Leikir tímabilsins  -  Leikmenn  -  Stjórn  -  Saga og tölfræði  -  Höllin  -  Lagið  -  Myndir  -  Myndbönd  -  Tenglar
  - Úrvalsdeild karla - Senda skilaboð - Vefur KA - Vefur Þór - Fréttaleit
Meistarafl. karla
Næstu leikir
Nýjustu úrslit
Stjarnan-Akureyri 28-23
Þri. 4. apr. 2017
Olís deild karla
ÍBV-Akureyri 22-22
Mið. 29. mar. 2017
Olís deild karla
deildin staðan

Ungmennalið karla
Næstu leikir
Nýjustu úrslit
Stjarnan U-Akureyri U 35-30
Fös. 7. apr. 2017
1. deild karla
Akureyri U-KR 34-30
Fös. 31. mar. 2017
1. deild karla
deildin staðan
Ljósmyndir frá leiknum     Myndband frá leiknum      Textalýsing frá leiknum     Tölfræði leiksins 
    Akureyri - Selfoss  24-26 (11-15)
Olís deild karla
KA Heimilið
Fim. 16. mar. 2017 klukkan: 19:00
Dómarar: Bjarni Viggósson og Jón Karl Björnsson, eftirlit Hlynur Leifsson
Umfjöllun

Brynjar og Patrekur létu að sér kveða í sókninni



17. mars 2017 - Akureyri handboltafélag skrifar

Vonbrigði á móti Selfossi - viðtöl

Það var mikil eftirvænting hjá Akureyringum að taka á móti Selfyssingum á fimmtudagskvöldið, með sigri hefði liðið spyrnt sér býsna vel frá botnsvæðinu, og raunar gilti það sama hjá Selfyssingum. Það voru einmitt gestirnir sem komu rétt stemdir í leikinn og virtust gjörsamlega ætla að ganga frá leiknum strax í upphafi.

Eftir að Igor kom heimamönnum yfir í 1-0 komu átta mörk í röð frá Selfyssingum og allt gekk upp hjá þeim á meðan leikur Akureyrar var í molum. Það þurfti að bíða í ellefu mínútur eftir öðru marki Akureyrar sem tókst í kjölfarið að lagfæra stöðuna dálítið. Brynjar Hólm Grétarsson kom með krafti inn í leikinn og með fjórða marki sínu minnkaði hann muninn í þrjú mörk, 9-12. En Selfyssingar héldu þó fjögurra marka forskoti, 11-15 í hálfleik.


Gangur fyrri hálfleiksins

Ekkert mark var skorað fyrstu fimm mínútur seinni hálfleiksins en Akureyri minnkaði muninn í tvö mörk, 14-16 og virtist vera að snúa leiknum sér í vil. En Selfyssingar svöruðu fyrir sig og juku forskotið í sex mörk, 15-21 þegar rúmar tíu mínútur voru eftir af leiknum.

Þessar lokamínútur kviknaði á Akureyrarliðinu aftur og með harðfylgi minnkuðu þeir muninn niður í eitt mark, 24-25 en þá voru einungis 20 sekúndur eftir af leiknum. Selfyssingar stóðu af sér maður á mann Akureyrar og fengu opið færi á lokasekúndunni sem skilaði þeim lokamarkinu og þar með tveggja marka sigri 24-26 og bæði stigin dýrmætu sem voru í boði.


Gangur seinni hálfleiksins

Þessi hörmulega byrjun á leiknum gerði í raun út um leikinn líkt og heimaleikurinn gegn Fram í desember þá var liðið komið í of djúpan pytt til að ná að krafla sig upp þrátt fyrir hetjulega baráttu. Tomas Olason stóð svo sannarlega fyrir sínu í markinu og varði oft á tíðum frábærlega enda valinn maður leiksins í lokin.


Tomas Olason með mikilvæga vörslu í leiknum

Brynjar Hólm Grétarsson var ekki í byrjunarliðinu en kom af miklum krafti inn í sóknarleikinn með 6 mörk. Sama má segja um Patrek Stefánsson sem skoraði þrjú mörk og fiskaði þrjú vítaköst. Báðir nýkomnir til leiks eftir meiðslavanda.

Mörk Akureyrar: Brynjar Hólm Grétarsson 6, Mindaugas Dumcius 5, Igor Kopyshynskyi 3, Patrekur Stefánsson 3, Bergvin Þór Gíslason 2, Friðrik Svavarsson 2, Kristján Orri Jóhannsson 2 (bæði úr vítum)og Andri Snær Stefánsson 1 (úr víti).
Tomas eins og áður segir góður í markinu með 16 varin skot.

Mörk Selfoss: Elvar Örn Jónsson 10, Teitur Örn Einarsson 5 (3 úr vítum), Einar Sverrisson 4, Hergeir Grímsson 4, Guðni Ingvarsson 2 og Alexander Már Egan 1 mark.
Í markinu stóð Helgi Hlynsson og tók 10 skot flest úr opnum færum, þar á meðal vítakast.

Önnur úrslit í umferðinni voru ekki til að bæta hag Akureyrar en nú má segja að allir fjórir leikirnir sem eftir eru séu hálfgerðir bikarleikir þar sem ekkert nema sigur kemur til greina. Sá slagur hefst á sunnudaginn þegar liðið sækir topplið Hauka heim.

Viðtöl eftir leikinn

Það var Bjarni Jónasson sem fjallaði um leikinn af hálfu mbl.is og hann ræddi við gömlu félagana Andra Snæ Stefánsson og Stefán Árnason strax eftir leikinn:

Andri Snær: Algjört kjarkleysi af okkar hálfu

Fyrirliði Akureyringa, Andri Snær Stefánsson, var öllu brúnaþyngri en Stefán Árnason þegar hann gaf sig á tal við blaðamann eftir tap á heimavelli gegn Selfossi, 26:24. Akureyringar byrjuðu leikinn afar illa og voru lentir 6 mörkum undir eftir 15 mínútna leik. Aðspurður sagði Andri þetta um fyrri hálfleikinn:

„Það er erfitt að útskýra þetta upphaf okkar á leiknum öðruvísi, en að við erum bara algjörlega kjarklausir. Við mættum mjög tilbúnu Selfossliði, sem var bara einfaldlega miklu tilbúnara í slaginn en við. Þeir voru bara klárari í þetta frá upphafi,“ sagði Andri Snær við mbl.is.

Akureyringar sitja nú í 9. sæti deildarinnar, þremur stigum á eftir næsta liði. Andri sagði að sínir menn yrðu hreinlega girða sig í brók fyrir lokasprettinn í deildinni.
„Það er alveg ljóst að allir leikir í þessari deild eru mikilvægir. Við eigum fjóra mjög svo mikilvæga leiki eftir í deildinni og við verðum bara að sýna hvað í okkur býr og sýna meiri kjark og þor í þeim leikjum en við sýndum hér í kvöld. Þetta var hreinlega afhroð af okkar hálfu.“


Fyrirliðinn, Andri Snær hvetur sína menn áfram

Stefán Árnason: Dagsplanið að keyra á þá frá upphafi

Það var létt yfir Stefáni Árnasyni á bernskuslóðum þegar blaðamaður náði af honum tali eftir fallbaráttuslag í KA-heimilinu í kvöld en leiknum lauk með sigri Selfyssinga, 26:24. Selfyssingar byrjuðu leikinn af fítonskrafti og keyrðu hreinlega yfir Akureyringa í upphafi leiks.

„Við vorum búnir að ákveða það að mæta hér með mjög sókndjarfa nálgun á þennan leik, vera „aggressívir“ frá fyrstu mínútu og mæta þeim framarlega á vellinum. Við ætluðum að reyna að keyra á þá, ef við ynnum boltann, og það gekk vel í upphafi leiks. Við unnum marga bolta og uppskárum mörg ódýr mörk í kjölfarið. Það virkaði vel og gaf okkur gott veganesti.
Svo í seinni hálfleik spilum við gífurlega góða vörn, sex á móti sex, í raun mun betri vörn en í fyrri hálfleik. Mörkin sem þeir skora á okkur í seinni hálfleik voru mörk sem þeir skora þegar við erum manni færri. Þegar við náum að stilla upp í okkar varnarleik vorum við mjög öflugir. Þeir setja svo aukamann inn á í lokin og við fáum fullt af brottvísunum. Okkur tókst þó að sigla þessu í höfn, enda markvarslan hjá okkur til fyrirmyndar allan leikinn. Mér fannst við klókir undir lokin og það var eflaust það sem kláraði leikinn að lokum fyrir okkur.“

Spurður um framhaldið og þá baráttu sem framundan er, hafði Stefán þetta að segja:
„Við þurfum að taka tvo sigra í viðbót í þessum fjórum leikjum sem eftir eru. Við erum í baráttu fyrir lífi okkar áfram og á meðan liðin í kringum okkur eru að ná sér í stig verðum við að halda ótrauðir áfram þangað til yfir lýkur.“


Stefán Árnason tekur leikhlé


Tengdar fréttir

Þetta er leikur sem þú vilt svo sannarlega ekki missa af!

16. mars 2017 - Akureyri handboltafélag skrifar

Í dag: Akureyri - Selfoss í beinni á Akureyri-TV

Það er óhætt að segja að það sé mikið undir þegar Akureyri og Selfoss mætast í Olís deild karla í dag. Selfyssingar tóku enga áhættu og mættu norður í gær og koma því vel einbeittir til leiks.

Við verðum að sjálfsögðu með leikinn í beinni útsendingu á Akureyri-TV, leikurinn sjálfur hefst klukkan 19:00 og útsendingin nokkrum mínútum fyrr.

SMELLTU HÉR TIL AÐ FYLGJAST MEÐ ÚTSENDINGUNNI.


Það er ekkert gefið eftir þegar þess lið mætast

15. mars 2017 - Akureyri handboltafélag skrifar

Mikilvægur leikur gegn Selfyssingum á fimmtudag

Það er engin lognmolla í Akureyskum handbolta þessa dagana. Akureyri á gríðarlega mikilvægan heimaleik á morgun, fimmtudag gegn Selfyssingum og óhætt að stigin sem þar eru í boði séu gulls ígildi fyrir bæði lið. Í dag eru liðin í 8. og 9. sæti deildarinnar en sigurvegarinn á kost á að klifra upp um þó nokkur sæti.

Frá áramótum hefur Akureyri leikið þrjá heimaleiki og unnið góða sigra í þeim öllum, tvisvar gegn Val og eftirminnilegan sigur á Aftureldingu. Menn þurfa þó að vera á tánum því skemmst er að minnast þess að liðið fékk skell í síðasta heimaleiknum í desember þegar Fram kom, sá og sigraði býsna sannfærandi.

Selfyssingar byrjuðu tímabilið með látum en hefur ekki alveg gengið upp á það besta í síðustu leikjum. Tvö jafntefli í síðustu sex leikjum er klárlega undir væntingum á þeim bænum og þeir munu örugglega gefa allt í að komast á sigurbraut á ný.
Þjálfari Selfyssinga er sem kunnugt er Akureyringurinn Stefán Árnason og bjóðum við hann að sjálfsögðu velkominn á heimaslóðir.


Stefán Árnason þjálfari Selfyssinga

Þrjár öflugar skyttur eru áberandi í markaskorun þeirra, Elvar Örn Jónsson með 141 mark, Einar Sverrisson með 125 og Teitur Örn Einarsson með 96 mörk. Það þarf greinilega að hafa góðar gætur á þeim félögunum.

Liðin hafa mæst tvisvar í deildinni það sem af er, Akureyri vann útileikinn á Selfossi 29-32 og heimaleikinn 25-32. Hörkuleikir báðir og ekkert gefið eftir.

Leikur Akureyrar og Selfoss hefst klukkan 19:00 í KA heimilinu fimmtudaginn 16. mars. Við stefnum að sjálfsögðu að því að sýna leikinn hér á Akureyri TV.

Það er síðan stutt í næsta verkefni hjá liðinu því strax á sunnudaginn halda strákarnir suður í Hafnarfjörð þar sem þeir mæta toppliði Hauka á Ásvöllum.

Akureyrarslagur í 1. deild karla á föstudaginn

Það er svo áhugaverður leikur í 1. deild karla á föstudagskvöldið þegar Akureyri U og Hamrarnir mætast í Íþróttahöllinni. Leikurinn hefst klukkan 20:00 og ljóst að þar verður ekkert gefið eftir enda má segja að montrétturinn í bænum sé undir.

Liðin mættust í eftirminnilegum leik í nóvember þar sem Akureyri U vann eins marks sigur, 24-25 og fengu í leikslok bikar frá Hömrunum þar sem Akureyri U var lýstur Akureyrarmeistari 2016. Jafnframt hétu Hamrarnir því að þeir ætluðu að endurheimta bikarinn í næsta leik þannig að á föstudagskvöldið kemur í ljós hvort liðið verður Akureyrarmeistari 2017.

Leikurinn hefst eins og áður segir klukkan 20:00 á föstudaginn og það verður frítt inn.


Til baka    Senda á Facebook

Umsjón og hönnun: Stefán Jóhannsson og Ágúst Stefánsson