Rúnar sáttur við spilamennskuna
| | 3. september 2007 - Akureyri Handboltafélag skrifarLið Akureyrar í úrslitum á Reykjavík OpenLið Akureyrar komst alla leið í úrslitaleik Opna Reykjavíkurmótsins í handbolta sem lauk á laugardaginn. Rúnar Sigtryggsson þjálfari liðsins var ánægður með frammistöðu sinna manna á mótinu, þrátt fyrir tapið í síðasta leiknum. Mótið fór fram í Austurbergi.
Akureyri sigraði í öllum leikjunum í riðlinum, en þar voru mótherjarnir HK, ÍR, FH og ungmennalið Hauka. "Ég var ánægður með strákana miðað við að þetta voru fyrstu æfingaleikirnir okkar og ég held að segja megi að það hafi komið á óvart hvað handboltinn á mótinu var góður - betri en menn eru vanir að sjá á svona æfingamóti," sagði Rúnar í viðtali við heimasíðuna.
Hver leikur var 2 x 20 mínútur, nema úrslitaleikurinn sem var í fullri lengd.
Úrslitaleikur mótsins var gegn Stjörnunni og tapaðist 24:34. Leikmenn Akureyrar byrjuðu illa í leiknum og það varð þeim að falli. Leikmenn voru bersýnilega þreyttir, eftir tvo leiki á föstudegi og tvo snemma á laugardegi, en úrslitaleikurinn fór fram síðdegis. Stjarnan lauk keppni í riðlinum á fimmtudag og Garðbæingarnir komu því úthvíldir í úrslitaleikinn.
"Við litum á þetta mót sem góða æfingu og hún var vel heppnuð. Byggt var á liðsheildinni og menn stóðu sig vel, margt af því sem við höfum verið að æfa undanfarið skilaði sér," sagði Rúnar Sigtryggsson. |
Fréttir 
Þú flettir milli frétta með örvalyklunum eða smellir á bláu örvarnar!
Efst á síðu