Með þessari spilamennsku styttist í sigurleikinn
| | 15. janúar 2008 - Akureyri handboltafélag skrifarNaumt tap gegn Stjörnunni - mikil batamerki á leik liðsinsÁ laugardaginn spiluðu stelpurnar í Akureyri Handboltafélag sinn fyrsta leik á nýju ári og voru það Stjörnustelpur sem komu í heimsókn til Akureyrar. Leikurinn var spilaður í Íþróttahöllinni vegna 80 ára afmælishátíðar KA í KA-heimilinu um kvöldið.
Fyrirfram var ljóst að leikurinn myndi verða erfiður fyrir okkar stúlkur enda Stjörnuliðið í þriðja sæti deildarinnar og með geysiöflugt lið, á meðan okkar stúlkur eru stigalausar í botnsætinu. Leikurinn byrjaði afar rólega hjá báðum liðum og var sóknarleikur beggja liði ekki mjög merkilegur fyrstu mínúturnar. Það var þó alveg ljóst frá byrjun að talsvert slen var á leikmönnum Stjörnunnar sem töldu greinilega að hlutirnir myndu koma af sjálfu sér gegn botnliði Akureyrar. En þrátt fyrir vandræðalegar fyrstu sóknir okkar stúlkna var varnarleikurinn til mikillar fyrirmyndar allan fyrri hálfleikinn og sóknarleikurinn varð alltaf betri og betri. Okkar stúlkur leiddu allan fyrri hálfleikinn og náðu mest þriggja marka forustu 13-10 þegar aðeins þrjár mínútur voru eftir af fyrri hálfleik. Agaleysi í sókninni og klaufalegir glataðir boltar urðu hins vegar til þess að Stjörnustúlkur náðu að minnka muninn í eitt mark í hálfleik, 13-12.
Inga Dís Sigurðardóttir fór mikinn í hálfleiknum og var öryggið uppmálað á vítapunktinum auk þess sem Emelía varði nokkuð vel í markinu.
Það bar á góma áhorfenda í hálfleik að vonandi næðu stelpurnar loksins að halda dampi í seinni hálfleik og klára leikinn af sama krafti og fyrri hálfleikur hefði þróast.
Fyrsta korterið í seinni hálfleik var hélt lið Akureyrar sjó og forustan var áfram þeirra, 17-16. En þá skipti Ragnar Hermannsson, sem stjórnaði liði Stjörnunnar þar sem Aðalsteinn Eyjólfsson er sem kunnugt er í löngu banni, Florentinu Grecu inná í mark Stjörnunnar. Skemmst er frá því að segja að Florentina lokaði markinu svo um munaði og var maðurinn á bak við að Stjarnan seig fram úr á lokasprettinum og sigraði að lokum 18-21.
Það verður að hrósa stelpunum fyrir góða frammistöðu í 45 mínútur í leiknum á laugardaginn gegn stjörnum prýddu Stjörnuliði en reynsluleysið varð þeim að falli sem og að stelpurnar virtust hræddar við Florentinu Grecu sem varði hvert dauðafærið á fætur öðru. Ljóst er að allt annað er að sjá til liðsins frá því í fyrstu leikjunum í haust og vonandi að þær fari nú að fá stig í deildinni. Þó er ljóst að sóknarleikurinn mætti vera betri hjá liðinu. Erfitt er að minnast á einhvern einn leikmann liðsins, en baráttan, vörnin og markvarslan var í góðu lagi lengst af og ekkert að því að halda liði Stjörnunnar í 21 marki. |
Fréttir 
Þú flettir milli frétta með örvalyklunum eða smellir á bláu örvarnar!
Efst á síðu