Fréttir  -   Úrslit  -   Næstu leikir  -   Deildin

Fréttir                       Þú flettir milli frétta með örvalyklunum eða smellir á bláu örvarnar!  Hafþór hefur staðið fyrir sínu í vetur 23. október 2008 - Akureyri handboltafélag skrifar Viðtal við Hafþór Einarsson markvörð Hafþór Einarsson markvörður Akureyrar Handboltafélags ákvað að taka fram skóna að nýju fyrir þetta tímabil. Hann hefur byrjað veturinn af krafti og var meðal annars valinn besti markvörður Greifamótsins á undirbúningstímabilinu. - Hvað varð til þess að þú ákvaðst að byrja aftur? - Rúnar hafði samband við mig í sumar og óskaði eftir því að ég þurrkaði rykið af skónum og tæki þátt í þessu verkefni með þeim. Það hljómaði spennandi sem hann hafði í huga. Síðan eftir að hafa athugað líkamlegt ástand þá taldi ég rétt í að minnsta að athuga hvort að líkaminn hefði eitthvað í þetta eftir tveggja ára fjarveru. Í að minnsta þá myndi maður ná upp forminu á undirbúningstímabilinu. - Var ekkert erfitt að koma sér aftur af stað? - Formið var augljóslega ekki nægilega gott í upphafi. Þetta var auðvitað erfitt að fara úr kyrrsetu yfir í fulla þjálfun en þetta gekk þokkalega. Ég er reyndar stoltur af því að ég var aldrei síðastur og það stoppaði aldrei ökumaður fyrir mér til þess að bjóða mér far í erfiðum útihlaupum, eins og raunin var með suma! Það sem gerði þetta líka svo skemmtilegt var hvað það eru margir skemmtilegir strákar sem eru að taka þátt í þessu og allar þær sérstöku uppákomur sem komu á undirbúningstímabilinu. Andinn, gleðin og áhuginn sem einkenndi þennan hóp var líka svo góður að það var mjög skemmtilegt að mæta á æfingar og skríða síðan heim. Við vorum náttúrulega að renna svolítið blint í sjóinn með þennan hóp og vissum í raun ekki hvar við stóðum. Á Reykjavík Open sáum við að við áttum fullt erindi í þessa deild og uppfrá því fór þetta að vera virkilega gaman og sú stemming sem myndaðist þar hefur haldið áfram. - Ertu sáttur við þína frammistöðu framan af móti? - Já svona þokkalega, þegar maður setur sér raunhæf markmið er auðveldara að vera sáttur með sjálfan sig. Annars tekur maður bara einn leik í einu og gerir sitt besta. Mér finnst aðallega gaman að vera byrjaður aftur, enda er þetta gífurlega góður og samheldinn hópur sem við höfum á að skipa. - Hvernig líst þér á deildina í vetur? - Bara vel, við getum gert allt það sem við viljum ef við höldum áfram á þessari braut. Við höfum sýnt það að þegar við spilum okkar leik þá getur allt gerst. Við þurfum að halda áfram að sýna kjark, hörku og ákefð, þá verðum við illviðráðanlegir. - Hvaða lið heldurðu að verði sterkust í N1 deildinni í vetur? - Ég bara veit það ekki. Mér er nokkuð sama um önnur lið. Það skiptir ekki máli hvað önnur lið eru að gera, það sem skiptir máli erum við sjálfir. Þetta er algjörlega undir okkur komið. - Átt þú þér eitthvað markmið fyrir veturinn? - Reyna að hafa eins gaman að þessu og ég mögulega get. Ekki væri verra að taka eins og eina dollu en það er eitthvað sem tíminn mun leiða í ljós. Það er stígandi í þessum hóp. Frábært að sjá hversu góður andi er í liðinu og hvað hver og einn er tilbúinn að gefa sig í það sem verið er að gera. Þar kemur auðvitað inn í þessi frábæra umgjörð sem er í kringum liðið. Stjórnin hefur unnið gríðarlega gott starf núna síðustu mánuði og á mikinn heiður skilinn fyrir verkið. Þá er líka margir aðrir sem eru að koma þessu með okkur t.d. með blaðaútgáfu, undirbúa og starfa á leikjum hjá okkur. Allt þetta fólk er að standa sig alveg frábærlega og gerir þetta enn skemmtilegra að fá að taka þátt í þessu. Þá hafa áhorfendur verið hreint út sagt frábærir í þessum fyrstu leikjum og ég hvet alla til að halda áfram að sanna fyrir landanum að hér eru bestu áhorfendur á Íslandi. - Nú er þetta frekar ungur hópur og sem dæmi hefur þú þjálfað nokkra af þessum strákum í gegnum tíðina. Finnst þér eins og þú sért elstur í hópnum? - Nei !!! Rúnar og Valdi eru auðvitað þarna og ég er bara unglamb við hliðina á þeim. En það er rétt að ef við sleppum þeim sem eru búnir að upplifa tvær heimsstyrjaldir þá er ég víst í eldri kantinum. Enda hafði maður á orði þegar að maður var að mæta á fyrstu æfingarnar að meðal aldur, hæð og þyngd hefði bara rokið upp. Mér finnst ég samt vera langtum yngstur í anda og hjarta. Fyrir utan Odd kannski sem tekur þennan titil nokkuð auðveldlega, en ég þjálfaði hann einmitt þegar hann var í 6. flokk. Þannig að árin eru farin að færast yfir. - Er eitthvað sem þú vilt segja við Akureyringa að lokum? - Ég vil endilega hvetja alla til að halda áfram að mæta á leiki og taka þátt í þessu með okkur. Það er breiður og skemmtilegur hópur sem er að taka þátt í þessu með okkur og sá hópur er sífellt að stækka, sem er auðvitað frábært. Ekkert framlag er of lítið eða of stórt. Fletta milli frétta Til baka    Senda á Facebook

Efst á síðu

Umsjón og hönnun:
Stefán Jóhannsson og Ágúst Stefánsson