2. flokkur: Magnaður sigur á FH í skrautlegum leik

Strákarnir í 2. flokki Akureyrar stigu sannkallaðan stríðsdans í lok leiks gegn hinu toppliðinu, FH í gærkvöldi og engin furða því lengst af benti ekkert til annars en að FH færi með öruggan sigur af hólmi.

FH liðið fór betur af stað í leiknum, reyndar var jafnt í stöðunni 3-3 og raunar lítið skorað framan af leik og staðan 6-7 fyrir FH eftir tuttugu mínútna leik. Í kjölfarið hófust dómarar leiksins handa við brottvísanir og framan af fuku sérstaklega leikmenn Akureyrar útaf í kippum. FH-ingar með Ásbjörn Friðriksson fremstan í flokki gengu á lagið, tveimur fleiri og náðu átta marka öruggri forystu 7-15 og höfðu sex marka forystu í hálfleik 10-16.

Eins og tölurnar bera með sér var fyrri hálfleikurinn frekar dapur og ráðleysislegur hjá liðinu, boltinn gekk ekki nógu vel í sókninni, FH-ingar reyndar að spila fína vörn og góð markvarsla hjá þeim. Hjá Akureyri byrjaði Elmar vel í markinu en dalaði þegar á hálfleikinn leið og kom Siguróli í markið en fann sig ekki nægilega vel heldur.

Það var því ljóst að eitthvað mikið þurfti að gerast í seinni hálfleik, hann byrjaði reyndar ekki gæfulega, FH endurheimti strax átta marka forystu, 10-18 og skömmu síðar 13-21 og einungis 20 mínútur eftir af leiknum.

Dómararnir misstu í raun alveg tökin á leiknum og ráku leikmenn og þjálfara út af við minnstu yfirsjónir þannig að oft var mjög fáliðað á vellinum. Liðsmenn Akureyrar virtust þó höndla ástandið betur, Bjarni Jónasson og Oddur Gretarsson drifu liðið áfram og á örfáum mínútum vann liðið upp muninn og staðan breyttist í 21-22 fyrir FH og skyndilega gjörtapaður leikur orðinn æsispennandi.

Akureyri náði loks að jafna í stöðunni 24-24 en FH náði aftur tveggja marka forystu 25-27. Ásbjörn var rekinn útaf í liði FH fyrir gróft brot á Oddi Gretarssyni, og hefði raunar verðskuldað rautt spjald fyrir það. Akureyrarliðið efldist enn frekar við þetta og jafnaði í 27-27 og komst yfir í fyrsta sinn í leiknum 28-27 og áfram í 29-27. Strákarnir héldu haus síðustu mínúturnar og lönduðu dramatískum og ákaflega mikilvægum sigri 31-29 að lokum.

Liðið endurheimti stemminguna og sjálfstraustið, Elmar kom aftur í markið þegar 10 mínútur voru liðnar af seinni hálfleik og datt strax í sinn besta ham og átti svo sannarlega sinn þátt í viðsnúningi liðsins. Til marks um stemminguna sem komin var í hópinn varð Elmari það á að fagna einni glæsimarkvörslu með því að klappa duglega á öxl hornamanns FH og sá annar dómarinn ástæðu til að víkja Elmari af leikvelli fyrir.

Með þessum sigri styrkti liðið stöðu sína á toppi deildarinnar en það hefur einungis tapað tveim stigum á meðan FH hefur nú tapað 4 stigum.

Mörk Akureyrar: Oddur 10 (4 úr vítum), Bjarni 8 (2 úr vítum), Jón Þór 3, Atli, Hákon og Heiðar Þór 2 mörk hver, Ágúst, Anton, Hlynur og Halldór 1 mark hver.

Elmar varði 17 skot, þar af 11 í seinni hálfleik og Siguróli varði 1 skot.

Staðan á Íslansmótinu er svohljóðandi eftir leikinn:

Nr. Félag Leik U J T Mörk Nett Stig
1. Akureyri 13 12 0 1 435:332 103 24
2. FH 12 10 0 2 423:310 115 20
3. Selfoss 11 6 1 4 356:319 37 13
4. Víkingur 12 5 2 5 339:317 22 12
5. Valur 11 5 2 4 337:323 14 12
6. ÍR 11 6 0 5 318:316 2 12
7. Haukar 12 4 4 4 330:318 12 12
8. HK 12 5 1 6 357:346 11 11
9. Afturelding 12 5 1 6 329:359 -30 11
10. Fram 13 5 0 8 375:396 -21 10
11. Stjarnan 10 2 1 7 270:295 -25 5
12. Fjölnir 13 0 0 13 256:494 -238 0

Fletta milli frétta

Til baka

Senda á Facebook

Efst á síðu

Umsjón og hönnun:
Stefán Jóhannsson og Ágúst Stefánsson